హార్దిక్ పాండ్య 'నో లుక్ షాట్'- ఏమి కాన్ఫిడెన్స్ బాసు!- వీడియో వైరల్ - Hardik No Look Shot

Pandya No Look Shot : భారత్- బంగ్లాదేశ్ మధ్య తొలి టీ20లో పాండ్య బాదిన ఓ షాట్ సోషల్ మీడియాలో వైరల్​గా మారింది.

Pandya No Look Shot : బంగ్లాదేశ్​తో జరురుగుతున్న టీ20 సిరీస్​ను భారత్ ఘనంగా ఆరంభించింది. ఆదివారం జరిగిన తొలి టీ20లో టీమ్ఇండియా 7 వికెట్ల తేడాతో నెగ్గింది. బంగ్లా నిర్దేశించిన 128 పరుగుల లక్ష్యాన్ని భారత్ 11.5 ఓవర్లలోనే ఛేదించింది. అయితే ఈ మ్యాచ్​లో స్టార్ ఆల్​రౌండర్ హార్దిక్ పాండ్య బ్యాటింగే హైలైట్. హార్దిక్ (39 పరుగులు;16 బంతులు: 5x4, 2x6) సత్తా చాటాడు. ఈ ఇన్నింగ్స్​లో హార్దిక్ బాదిన ఓ షాట్ ప్రస్తుతం సోషల్ మీడియాలో తెగ వైరల్ అవుతోంది.

12వ ఓవర్లో​ తస్కిన్ అహ్మద్ వేసిన బంతిని హార్దిక్ బౌండరీకి తరలించాడు. అయితే ఈ బౌండరీ బాదిన విధానానికి మాత్రం క్రికెట్ ఫ్యాన్స్ అంతా ఒక్కసారిగా ఆశ్చర్యపోయారు. ఆ ఓవర్​లో మిడిల్ లైన్ అండ్ లెంగ్త్​తో తస్కిన్​ విసిరిన మూడో బంతిని క్రీజులో ఉన్న హార్దిక్, వెనుక వైపునకు జస్ట్ ఫ్లిక్ ఇచ్చాడు. అది కీపర్ తలపై నుంచి బ్యాక్​సైడ్ బౌండరీకి వెళ్లింది. అయితే పాండ్య షాట్ బాదిన తర్వాత కనీసం ఆ బంతిని తిరిగి చూడలేదు కూడా. ఫుల్ కాన్ఫిడెన్స్​తో కామ్​గా కనిపించాడు. దీంతో ఇది పాండ్య 'నో లుక్ షాట్' (Pandya Look Shot From) అంటూ ఫ్యాన్స్ సోషల్ మీడియాలో ట్రెండ్ చేస్తున్నారు. ఇక అదే ఓవర్లో తర్వాత రెండు బంతులకు వరుసగా ఫోర్, సిక్స్​ బాదిన పాండ్య మ్యాచ్​ను 11.5 ఓవర్లలోనే ముగించాడు.

That No Look Shot was literally fab🔥

I want his level of confidence.#HardikPandya pic.twitter.com/HqY0NtvTQR

— Isha28💙 (@Psych_Vamp) October 6, 2024

ఛేదనలో టీమ్ఇండియా ఓపెనర్ అభిషేక్ శర్మ (16 పరుగులు, 7బంతుల్లో) ఇన్నింగ్స్ వేగంగా ఆరంభించినా త్వరగానే రనౌట్ అయ్యాడు. ఇక సంజూ శాంసన్ (29 పరుగులు), సూర్యకుమార్ యాదవ్ (29 పరుగులు) ఫర్వాలేదనిపించారు. డెబ్యూ మ్యాచ్ ఆడుతున్న నితీశ్ రెడ్డి (16* పరుగులు) ఆకట్టుకున్నాడు.

అంతకుముందు బ్యాటింగ్ చేసిన బంగ్లా 19.5 ఓవర్లలో 127 పరుగులుకు కుప్పకూలింది. మెహిదీ హసన్ (35 పరుగులు), కెప్టెన్ షాంటో (27 పరుగులు) ఫర్వాలేదనిపించారు. ఇక మిగత బ్యాటర్లెవరూ పెద్దగా రాణించలేదు. టీమ్ఇండియా బౌలర్లలో అర్షదీప్, వరుణ్ చక్రవర్తి చెరో 3, హార్దిక్ పాండ్య, మయంక్ యాదవ్, వాషింగ్టన్ సుందర్ తలో 2 వికెట్ దక్కించుకున్నారు.