ఒంటిచేత్తో సిక్సర్స్ కొట్టిన స్టార్ క్రికెటర్ - వింటేజ్ ధోనీ ఈజ్ బ్యాక్ - IPL 2024

MS Dhoni CSK : అహ్మదాబాద్ వేదికగా గుజరాజ్ టైటాన్స్తో జరిగిన పోరులో చెన్నై సూపర్ కింగ్స్ స్టార్ క్రికెటర్ ఎంఎస్ ధోనీ ఓ అరుదైన రికార్డును నమోదు చేశాడు. అదేంటంటే?

MS Dhoni CSK (Source : Associated Press)

Published : May 11, 2024, 9:54 AM IST

MS Dhoni CSK : ఐపీఎల్ సీజన్ 17లో భాగంగా అహ్మదాబాద్లో జరిగిన మ్యాచ్లో చెన్నై సూపర్ కింగ్స్‌ ఓటమి చవి చూసింది. గుజరాత్ టైటాన్స్ నిర్దేశించిన 231 పరుగుల లక్ష్యాన్ని చేధించలేక వెనుతిరిగింది. మిచెల్‌ (63), మొయిన్‌ అలీ (56), పోరాడినప్పటికీ చెన్నై విజయాన్ని అందుకోలేకపోయింది. అయితే ఆఖరిలో వచ్చిన ధోనీ మాత్రం తన ఇన్నింగ్స్తో అభిమానుల్లో జోష్ నింపాడు. మ్యాచ్ ఓడినప్పటికీ పలు గుర్తుండిపోయే రికార్డులను నమోదు చేశాడు. అవేంటంటే ?

మ్యాచ్ మొదటి నుంచి తడబడ్డ చెన్నై జట్టు తొలి 10 పరుగులకే మూడు వికెట్లను కోల్పోయి పీకల్లోతు కష్టాల్లో పడింది. సరిగ్గా అదే సమయంలో క్రీజులోకి వచ్చిన మిచెల్, మొయిన్ జట్టుకు మంచి స్కోర్ అందించారు. నాలుగో వికెట్‌ పడే సమయానికి 57 బంతుల్లో 109 పరుగుల భాగస్వామ్యాన్ని నెలకొల్పారు. అయితే ఆ తర్వాత చెన్నై జట్టుకు మళ్లీ కష్టాలు తప్పలేదు. వరుసగా వికెట్లు కోల్పోడం వల్ల ఇక ఓటమి ఖాయమైంది. అయితే ఆఖరిలో బ్యాటింగ్కు దిగిన ధోనీ తన ఇన్నింగ్స్లో 26 అజేయ పరుగులు చేశాడు. సిక్సర్లు బాది అందరినీ అలరించాడు.

ఇదంతా ఒక ఎత్తైతే ధోనీ ఒంటిచేత్తో సిక్సర్లు బాదటం మరో ఎత్తు. ఈ మ్యాచ్లో ధోనీ మూడు సిక్సర్లు బాదగా అందులో రెండింటినీ ఒంటి చేత్తోనే కొట్టాడు. ఇక మూడోసారి హెలికాఫ్టర్ షాట్‌తో బాదిన సిక్సర్ మ్యాచ్కు హైలైట్గా నిలిచింది. దీంతో ఫ్యాన్స్ ఉత్సాహం రెట్టింపయ్యింది.

ఇదిలా ఉండగా, ఇదే వేదికగా ఓ అరుదైన రికార్డును నమోదయ్యింది. ఈ సీజన్‌ మొత్తానికి ఇప్పటివరకు 1063 సిక్సర్లు నమోదయ్యాయి. దీంతో ఐపీఎల్‌లో అత్యధిక సిక్సర్లు నమోదైన రెండో సీజన్‌గా ఈ ఐపీఎల్-2024 సీజన్ రికార్డు సృష్టించింది. ఐపీఎల్-2022 సీజన్లో 1062 సిక్సర్లు నమోదయ్యాయి. కానీ అత్యధిక సిక్సర్లు నమోదైన సీజన్ల జాబితాలో ఐపీఎల్ -2023 తొలి స్థానాన్ని కైవసం చేసుకుంది.

ఐపీఎల్లో 100వ సెంచరీ : ఈ మ్యాచ్లో గిల్ శతకంతో ఐపీఎల్లో 100వ సెంచరీ నమోదైంది. వెంటనే సాయి సుదర్శన్ కూడా 100 పరుగుల మార్క్ అందుకున్నాడు. దీంతో ఇప్పటివరకు ఐపీఎల్లో 101 సెంచరీలు నమోదయ్యాయి. కాగా, ఐపీఎల్లో గిల్కు ఇది 4వ శతకం. ఈ లిస్ట్లో ఆర్సీబీ స్టార్ బ్యాటర్ విరాట్ కోహ్లీ 8 సెంచరీలతో అందరి కంటే ముందున్నాడు.