LSG VS PBKS IPL 2024 : ఐపీఎల్ సీజన్ 17లో భాగంగా తాజాగా లఖ్నవూ సూపర్ జెయింట్స్, పంజాబ్ కింగ్స్ మధ్య ఉత్కంఠ పోరు జరిగింది. ఈ పోరులో గెలిచి లఖ్నవూ సూపర్‌జెయింట్స్‌ బోణీ కొట్టింది. తమ తొలి మ్యాచ్లో రాజస్థాన్‌ రాయల్స్పై ఓడిన ఆ జట్టు శనివారం జరిగిన మ్యాచ్లో 21 పరుగుల తేడాతో పంజాబ్‌పై విజయాన్ని దక్కించుకుంది.
200 పరుగుల లక్ష్యంతో బ్యాటింగ్కు దిగిన పంజాబ్ టీమ్ నిర్ణీత ఓవర్లలో ఐదు వికెట్లు కోల్పోయి 178 పరుగులు చేసింది. శిఖర్ ధావన్ సూపర్ ఇన్నింగ్ ఆడుతూ చెలరేగిపోయాడు. 50 బంతుల్లో 7×4, 3×6 సాయంతో 70 హాఫ్ సెంచరీ చేశాడు. బెయిర్‌స్టో (29 బంతుల్లో 3×4, 3×6 సాయంతో 42 పరుగులు చేశాడు. అలా వీరిద్దరు కలిసి జట్టుకు మంచి ఆరంభాన్ని అందించినా ఆ తర్వాత ఇన్నింగ్స్ గాడి తప్పింది. అరంగేట్ర బౌలర్‌ మయాంక్ యాదవ్ (3/27), మోసిన్‌ ఖాన్ (2/34) కలిసి పంజాబ్‌ను దెబ్బ కొట్టారు.
అంతకుముందు తొలుత బ్యాటింగ్ చేసిన లఖ్నవూ జట్టు భారీ స్కోరు సాధించింది. నిర్ణీత 20 ఓవర్లలో 8 వికెట్ల నష్టానికి 199 పరుగులు చేసింది. ఓపెనర్ క్వింటన్ డికాక్‌ (38 బంతుల్లో 5×4, 2×6 సాయంతో 54 పరుగులు) అర్ధ శతకంతో రాణించాడు. కెప్టెన్ నికోలస్ పూరన్ (21 బంతుల్లో 3×4, 3×6 పరుగులు సాయంతో 42 పరుగులు) కూడా జట్టుకు మంచి స్కోర్ అందించాడు. అయితే చివర్లో కృనాల్ పాండ్య (22 బంతుల్లో 4×4, 2×6 సాయంతో 43 నాటౌట్‌) కూడా మెరుపులు మెరిపించాడు. ఫోర్లు సిక్సర్లు బాదుతూ చెలరేగిపోయాడు. ఇక పంజాబ్ బౌలర్లలో సామ్ కరన్ (3/28), అర్ష్దీప్ సింగ్ (2/30), కగిసో రబాడ, రాహుల్ చాహర్ ఒక్కో వికెట్ పడగొట్టారు. అయితే ఈ మ్యాచ్‌కు కేఎల్ రాహుల్‌కు బదులుగా నికోలస్ పూరన్ లఖ్నవూ కెప్టెన్సీ బాధ్యతలు చూసుకున్నాడు.
లఖ్నవూ తుది జట్టు : నికోలస్ పూరన్ (కెప్టెన్), క్వింటన్ డి కాక్ (వికెట్ కీపర్‌), కేఎల్ రాహుల్, దేవదత్ పడిక్కల్, ఆయుష్ బదోని, మార్కస్ స్టాయినిస్, రవి బిష్ణోయ్, కృనాల్ పాండ్య, మోసిన్‌ ఖాన్, మయాంక్ యాదవ్, మణిమారన్ సిద్ధార్థ్.
ఇంపాక్ట్ సబ్‌స్టిట్యూట్‌లు: అష్టన్ టర్నర్, నవీనుల్ హక్‌, అమిత్ మిశ్రా, దీపక్ హుడా, కృష్ణప్ప గౌతమ్.
పంజాబ్ తుది జట్టు :
శిఖర్ ధావన్ (కెప్టెన్), జానీ బెయిర్‌స్టో, లియామ్ లివింగ్‌స్టోన్, సామ్ కరన్, జితేష్ శర్మ (వికెట్ కీపర్‌), శశాంక్ సింగ్, హర్‌ప్రీత్ బ్రార్, హర్షల్ పటేల్, కగిసో రబాడ, రాహుల్ చాహర్, అర్ష్దీప్ సింగ్.
సబ్‌స్టిట్యూట్‌లు: ప్రభ్‌సిమ్రన్ సింగ్, రిలీ రోసో, తనయ్, విద్వాత్ కావేరప్ప, హర్‌ప్రీత్ భాటియా
ఆర్సీబీతో మ్యాచ్ - నా సూపర్ ఇన్నింగ్స్కు కారణం ఆమెనే : వెంకటేశ్ అయ్యర్ - IPL 2024 RCB VS KKR
500 క్లబ్‌లోకి సునీల్ నరైన్ - ఈ సీజన్‌లో తొలి జట్టుగా కోల్‌కతా ఘనత - IPL 2024 RCB VS KKR
