బంగ్లాను ఆదుకున్న లిట్టన్ దాస్- పాక్​పై వీరోచిత శతకం - Litton Das vs Pakistan

Litton Das vs Pakistan: బంగ్లాదేశ్ బ్యాటర్ లిట్టన్ దాస్, పాకిస్థాన్​తో జరుగుతున్న రెండో టెస్టులో వీరోచితంగా పోరాడాడు. పీకల్లోతు కష్టాల్లో ఉన్న జట్టుకు గౌరవప్రదమైన స్కోర్ అందించాడు.

Litton Das vs Pakistan: బంగ్లాదేశ్ బ్యాటర్ లిట్టన్ దాస్ పాకిస్థాన్​తో జరుగుతున్న రెండో టెస్టులో వీరోచిత ఇన్నింగ్స్​తో ఆకట్టుకున్నాడు. తొలి ఇన్నింగ్స్​లో బంగ్లా 26 పరుగులకే 6 వికెట్లు కోల్పోయిన దశలో బ్యాటింగ్​కు వచ్చిన దాస్ పాక్ బౌలర్లకు ఎదురొడ్డి సెంచరీ (138 పరుగులు) బాదాడు. మరో ఎండ్​లో మెహదీ హసన్ మిరాజ్ హాఫ్ సెంచరీ (78 పరుగులు)తో రాణించాడు. ఫలితంగా బంగ్లాదేశ్ 262 పరుగులు చేసి ఆలౌటైంది

26-6 నుంచి 262-10
తొలి ఇన్నింగ్స్​లో బ్యాటింగ్​కు దిగిన బంగ్లాకు ఆరో ఓవర్లోనే ఎదురు దెబ్బ తగిలింది. 14 పరుగుల వద్ద ఓపెనర్ జాకీర్ హసన్ (1) క్యాచౌట్​గా వెనుదిరిగాడు. ఆ తర్వాత పాక్ బౌలర్ల ధాటికి బంగ్లా బ్యాటర్లు నిలువలేకపోయారు. 12 పరుగుల వ్యవధిలో 5 వికెట్లు కోల్పోయి బంగ్లా పీకల్లోతు కష్టాల్లో మునిగింది. ఈ దశలో లిట్టన్ దాస్, మెహదీ హసన్ అద్భుతంగా పోరాడారు. వీరిద్దరూ కలిసి 7వ వికెట్​కు 165 పరుగుల భాగస్వామ్యం నెలకొల్పారు. ఫలితంగా బంగ్లాకు తొలి ఇన్నింగ్స్​లో మంచి స్కోర్ లభించింది. దీంతో తొలి ఇన్నింగ్స్​ ముగిసేసరికి బంగ్లా కేవలం 12 పరుగులు వెనుకంజలో ఉంది. లేకపోతే బంగ్లా 50లోపే ఆలౌట్ అయ్యి ఉండేదేమో! ఇక పాక్ బౌలర్లలో ఖుర్రమ్ షహజాద్ 6, మీర్ హమ్జా, అఘ సల్మాన్ తలో 2 వికెట్లు దక్కించుకున్నారు.

అంతకుముందు బ్యాటింగ్ చేసిన పాకిస్థాన్ 85.1 ఓవర్లలో 274 పరుగులకు ఆలౌటైంది. సయిమ్ ఆయుబ్ (58 పరుగులు), కెప్టెన్ మసూద్ (57 పరుగులు), అఘ సల్మాన్ (54 పరుగులు) హాఫ్ సెంచరీలతో రాణించారు. బంగ్లా బౌలర్లలో మెహదీ మిర్జా 5 వికెట్లు పడగొట్టగా, తస్కిన్ అహ్మద్ 3, నహిద్ రానా, షకీబ్ అల్ హసన్ చెరో 1 వికెట్ దక్కించుకున్నారు.

ఇక పాకిస్థాన్ రెండో ఇన్నింగ్స్​ ప్రారంభంలోనే తడబాటుకు గురైంది. 9 పరుగులకే 2 వికెట్లు కోల్పోయింది. ఓపెనర్ అబ్దుల్లా షఫీక్ (3), ఖుర్రమ్ (0) స్వల్ప స్కోర్లకే వెనుదిరిగారు. మూడో రోజు ముగిసే సరికి పాకిస్థాన్ 3.4 ఓవర్లలో 9-2తో నిలిచింది.