IPL 2024 CSK VS DC : ఐపీఎల్ 17వ సీజన్లో భాగంగా విశాఖపట్నంలో జరిగిన మ్యాచ్లో దిల్లీ క్యాపిటల్స్ బోణీ కొట్టింది. వరుసగా రెండు ఓటముల నుంచి పుంజుకుని చెన్నైసూపర్ కింగ్స్పై 20 పరుగులు తేడాతో విజయం సాధించింది. ముందుగా బ్యాటింగ్ చేసిన దిల్లీ 20 ఓవర్లలో 5 వికెట్లకు 191 పరుగులు చేసింది. డేవిడ్ వార్నర్(35 బంతుల్లో 5 ఫోర్లు, 3 సిక్స్‌ల సాయంతో 52), రిషభ్ పంత్(32 బంతుల్లో 4 ఫోర్లు, 3 సిక్స్‌ల సాయంతో 51) హాఫ్ సెంచరీలతో చెలరేగగా పృథ్వీ షా(27 బంతుల్లో 4 ఫోర్లు, 2 సిక్స్‌ల సాయంతో 43) మెరుపులు మెరిపించాడు. చెన్నై బౌలర్లలో మతీషా పతిరణ మూడు వికెట్లు తీయగా ముస్తాఫిజుర్ రెహ్మాన్, రవీంద్ర జడేజా తలో వికెట్ పడగొట్టారు.
ఛేదనలో ముకేశ్‌ కుమార్‌ (3/21), ఖలీల్‌ అహ్మద్‌ (2/21) దెబ్బకు చెన్నై సూపర్ కింగ్స్ 20 ఓవర్లలో 6 వికెట్లకు 171 పరుగులే చేయగలిగింది. రహానె (30 బంతుల్లో 5×4, 2×6 సాయంతో 45) పోరాడాడు. ధోనీ (16 బంతుల్లో 4×4, 3×6 సాయంతో 37 నాటౌట్‌) అభిమానులను అలరించాడు.
ధోనీ రికార్డ్(IPL 2024 CSK VS DC Dhoni) - చెన్నై సూపర్ కింగ్స్ మాజీ కెప్టెన్ మహేంద్ర సింగ్ ధోనీ చరిత్ర సృష్టించాడు. టీ20 క్రికెట్ చరిత్రలోనే 300 వికెట్లలో పాలు పంచుకున్న తొలి వికెట్ కీపర్‌గా నిలిచాడు. ఐపీఎల్ 2024 సీజన్లో భాగంగా ఢిల్లీ క్యాపిటల్స్‌తో జరిగిన మ్యాచ్లో ధోనీ ఈ ఘనతను అందుకున్నాడు. దిల్లీ క్యాపిటల్స్ డాషింగ్ ఓపెనర్ పృథ్వీ షా ఇచ్చిన క్యాచ్‌‌తో 300 ఔట్ల మైలు రాయిని అందుకున్నాడు. ఈ జాబితాలో మరే వికెట్ కీపర్ కూడా ధోనీకి దరిదాపుల్లో కూడా లేరు. ఈ జాబితాలో 300 డిసిమిసల్స్‌తో ధోనీ అగ్రస్థానంలో ఉండగా కమ్రాన్ అక్మల్(274), దినేశ్ కార్తీక్(274) రెండో స్థానంలో కొనసాగుతున్నారు. క్వింటన్ డికాక్(270), జోస్ బట్లర్(209) తర్వాతి స్థానాల్లో ఉన్నారు.
