Ind vs Nep U19 World Cup 2024: అండర్- 19 వరల్డ్కప్లో యువ భారత్ సెమీల్లోకి దూసుకెళ్లింది. శుక్రవారం (ఫిబ్రవరి 02)న నేపాల్తో జరిగిన మ్యాచ్లో భారత్ 132 పరుగులు తేడాతో నెగ్గింది. భారత్ నిర్దేశించిన 298 పరుగుల లక్ష్య ఛేదనలో నేపాల్ నిర్ణీత 50 ఓవర్లలో 9 వికెట్ల నష్టానికి 165 పరుగులే చేయగలిగింది. కెప్టెన్ దేవ్ కనల్ (33) టాప్ స్కోరర్. టీమ్ఇండియా బౌలర్లలో సౌమీ పాండే 4 వికెట్లతో అదరగొట్టాగా, అర్శిన్ కులకర్ణి 2, మురుగన్ అభిషేక్, ఆరాధ్య శుక్లా, రాజ్ లింబని తలో వికెట్ దక్కించుకున్నారు. ఇక ఫిబ్రవరి 6న భారత్ సెమీస్లో సౌతాఫ్రికాను ఢీ కొట్టనుంది.
లక్ష్య ఛేదనలో నేపాల్ను భారత్ తొలి నుంచే దెబ్బకొట్టింది. ఓపెనర్లు దీపక్ (22 పరుగులు, 42 బంతుల్లో), అర్జున్ కుమల్ (26 పరుగులు, 64 బంతుల్లో) క్రీజులో కుదురుకొని తొలి వికెట్కు 48 పరుగులు జోడించారు. అయితే కీలకమైన ఈ పార్ట్నర్షిప్ను రాజ్ లింబని విడగొట్టాడు. తర్వాత కాసేపటికే వన్ డౌన్లో వచ్చిన ఉత్తమ్ తపా మంగర్ (8)ను సౌమి పాండే వెనక్కిపంపాడు. ఈ తర్వాత నేపాల్ వరుసగా వికెట్లు కోల్పోయింది. అర్జున్ కుమల్, దేవ్ ఖనల్, బిషల్ బిక్రమ్ (1), దీపక్ దమ్రే (0), గుల్సన్ ఝా (1), దీపేశ్ ఖండేల్ (0), సుభాశ్ (5) పెవిలియన్కు క్యూ కట్టారు. ఓ దశలో నేపాల్ ఆలౌట్ అవుతుందని భావించారంతా. కాని 10వ వికెట్కు టెయిలెండర్లు ఆకాశ్ చాంద్ (19), దుర్గేశ్ గుప్తా (29) అజేయంగా 45 పరుగుల భాగస్వామ్యం నెలకొల్పారు. దీంతో నేపాల్ ఆలౌట్ భారి నుంచి తప్పించుకుంది.
టాస్ గెలిచి బ్యాటింగ్ ఎంచుకున్న భారత్ నిర్ణీత 50 ఓవర్లలో 7 వికెట్ల నష్టానికి 297 పరుగుల చేసింది. 62 పరుగులకే మూడు వికెట్లు కోల్పోయి ఓ దశలో భారత్ కష్టాల్లో పడింది. అయితే కెప్టెన్ ఉదయ్ సహారన్ (100 పరుగులు, 109 బంతుల్లో: 9x4), సచిన్ దాస్ (116 పరుగులు, 101 బంతుల్లో: 11x4, 3x6) సెంచరీలతో అదరగొట్టారు. వీరిద్దరూ నాలుగో వికెట్కు ఏకంగా 215 పరుగుల జోడించారు. ఇక ఆఖర్లో ఈ ఇద్దరూ పెవిలియన్ చేరారు. నేపాల్ బౌలర్లలో గుల్సన్ ఝా 3, ఆకాశ్ చాంద్ 1 వికెట్ దక్కించుకున్నారు.
