IND Vs IRE T20 World Cup 2024 : భారత్, ఐర్లాండ్ టీ20 పోరుకు మరికొద్ది గంటలే ఉన్నాయి. ఇప్పటికే ఈ రెండు జట్లు తమ తొలి విజయం కోసం మైదానంలో తీవ్ర కసరత్తులు చేస్తున్నాయి. న్యూయార్క్ వేదికగా ఈ మ్యాచ్ నేడు ( జూన్ 5) రాత్రి 8 గంటలకు జరగనుంది. అయితే ఈ మ్యాచ్కు వర్షం ముప్పు పొంచి ఉందని సమచారం. మ్యాచ్ వేదికైన న్యూయార్క్లో వర్షం కురిసే అవకాశం ఉందని వాతావరణ శాఖ నివేదికలు వెల్లడిస్తున్నాయి.
మరోవైపు ఉదయానికల్లా వర్షం తగ్గుముఖం పట్టి వాతావరణం మేఘావృతమై అవకాశాలు కూడా ఉన్నాయని సమాచారం. మ్యాచ్ అక్కడి కాలమానం ప్రకారం ఉదయం 10.30 గంటలకు ప్రారంభం కానుంది. అలా చూస్తే ఈ సమయంలో వర్షం కురిసే అవకాశాలు చాలా తక్కువని సమాచారం. కాబట్టి ఈ మ్యాచ్కు ఆ సమయంలో ఆటంకాలు తక్కువే అని అంటున్నారు.
వర్షం కారణంగా ఈ మ్యాచ్కు అంతరాయం కలిగితే అప్పుడు మేనేజ్మెంట్ నిర్ణయం ప్రకారం పరిమిత ఓవర్లతోనే మ్యాచ్ను కొనసాగిస్తారు. అయితే రిజర్వ్ డే ఆట ఉండనందున ఈ మ్యాచ్ రద్దయితే మాత్రం ఇరు జట్లు కూడా చెరో పాయింట్ను అందుకుంటాయి. ఇది ఐర్లాండ్కు ప్లస్ పాయింట్ అవుతుంది. అందుకే 2 పాయింట్లు సాధించాలంటే టీమ్ఇండియా నేటి మ్యాచ్ను కచ్చితంగా ఆడాల్సిందే.
డల్లాస్లోనూ అదే పరిస్థితి
ఇప్పటికే ఇంగ్లాండ్, స్కాట్లాండ్ మధ్య జరగాల్సిన మ్యాచ్ వర్షం కారణంగా వాయిదా పడింది. బార్బడోస్లో జరిగిన ఈ మ్యాచ్లో తొలి ఇన్నింగ్స్లో వర్షం రావడం వల్ల మ్యాచ్ మొత్తానికి రద్దయింది. అంతే కాకుండా డల్లాస్లో జరిగిన కొన్ని మ్యాచ్లకు కూడా వర్షం అంతరాయం కలిగించింది. దీంతో ఈ మ్యాచ్కు ఆ ముప్పు పొంచి ఉండే అవకాశాలున్నాయని విశ్లేషకుల మాట.
మ్యాచ్ ఎక్కడ చూడొచ్చంటే ?
అమెరికా టైమ్ ప్రకారం ఈ మ్యాచ్ ఉదయం 10.30 గంటలకు జరగనుంది. అది మన భారత కాలమానం ప్రకారం రాత్రి 8 గంటలు. ఇక ఈ మ్యాచ్ టాస్ రాత్రి 7.30కి జరగనుంది. ప్రముఖ స్పోర్ట్స్ ఛానల్ స్టార్ స్పోర్ట్స్లో ఈ మ్యాచ్ను మీరు లైవ్లో వీక్షించవచ్చు. దూరదర్శన్ ఛానెల్లోనూ ఈ మ్యాచ్ ప్రసారం కానుంది. దీంతో పాటు ప్రముఖ ఓటీటీ స్ట్రీమింగ్ ప్లాట్ ఫామ్ డిస్నీ ప్లస్ హాట్స్టార్లోనూ ఈ మ్యాచ్ స్ట్రీమ్ అవుతుంది.
కోచ్గా 2007 టీమ్ కెప్టెన్ - ఈ టోర్నీతో ఆ ఇద్దరి కల తీరేనా? - T20 World Cup 2024
భారత్ x ఐర్లాండ్ - చిన్న జట్టే అయినా తగ్గేదేలే! - T20 World Cup 2024