రాజ్కోట్‌ వేదికగా మంగళవారం జరిగిన మూడో టీ20లో భారత జట్టుపై ఇంగ్లాండ్ 26 పరుగుల తేడాతో గెలుపొందింది. 172 పరుగుల లక్ష్య ఛేదనలో బ్యాటింగ్కు దిగిన టీమ్ఇండియా 9 వికెట్లు కోల్పోయి 145 పరుగులే చేయగలిగింది. దీంతో మ్యాచ్ ఇంగ్లిష్ జట్టు వశమైంది. అయితే భారత జట్టు సుమారు 426 రోజుల తర్వాత స్వదేశంలో జరిగిన టీ20 మ్యాచ్లో ఓటమి చవిచూసింది. అంతకుముందు 2023 నవంబర్ 28న గువాహటిలో జరిగిన టీ20 మ్యాచ్లో ఆసీస్ 5 వికెట్ల తేడాతో భారత్ను ఓడించింది. అయితే ఈ స్టోరీలో మూడో టీ20లో టీమ్ ఇండియా ఓటమికి గల ఐదు కారణాలను తెలుసుకుందాం.
షమీ పేలవ ఫామ్
టీమ్ఇండియా పేసర్ షమీ 436 రోజుల తర్వాత అంతర్జాతీయ క్రికెట్లోకి రీఎంట్రీ ఇచ్చాడు. మూడో టీ20లో అర్ష్దీప్ సింగ్ స్థానంలో షమీ ప్లేయింగ్-11లో చోటు దక్కించుకున్నాడు. అయితే తన ఇన్నింగ్స్లో అద్భుతాలు సృష్టించడంలో విఫలమయ్యాడు. 3 ఓవర్లు బౌలింగ్ వేసి 25 పరుగులు ఇచ్చాడు. ఒక్క వికెట్ కూడా తీయలేకపోయాడు. గత రెండు మ్యాచ్ల్లో ప్రారంభ ఓవర్లలో అర్ష్దీప్ వికెట్లు తీసి ఇంగ్లాండ్ జట్టుపై ఒత్తిడిని పెంచడంలో సఫలమయ్యాడు.
సంజు విఫలం
ఇంగ్లాండ్తో జరుగుతున్న టీ20 సిరీస్లో వరుసగా మూడో మ్యాచ్లో సంజూ శాంసన్ విఫలమయ్యాడు. మళ్లీ జోఫ్రా ఆర్చర్కే వికెట్ సమర్పించుకున్నాడు. గత రెండు మ్యాచ్ల్లోనూ ఆర్చర్ ఓవర్లోనే శాంసన్ పెవిలియన్కు చేరాడు. అభిషేక్ శర్మతో కలిసి ఇన్నింగ్స్ ప్రారంభించిన శాంసన్(3) తక్కువ స్కోరుకే వెనుదిరిగాడు. జట్టుకు గొప్ప ఆరంభం అందించడంలో విఫలమయ్యాడు. ఇది కూడా టీమ్ ఇండియా ఓటమికి ఓ కారణమైందని విశ్లేషకుల మాట.
సూర్యకుమార్ యాదవ్ బ్యాడ్ ఫామ్
భారత కెప్టెన్ సూర్యకుమార్ యాదవ్ ఫ్లాప్ షో రాజ్కోట్‌ లోనూ కొనసాగింది. మొదటి రెండు టీ20ల్లో స్వల్ప స్కోర్లకే ఔట్ అయిన సూర్య, మూడో టీ20లోనూ నిరాశపరిచాడు. భారీ షాట్ కొట్టే ప్రయత్నంలో 14 పరుగుల వద్ద ఔటై పెవిలియన్ బాట పట్టాడు.
వాషింగ్టన్ సుందర్ నో మ్యాజిక్
ఆల్రౌండర్ కోటాలో ప్లేయింగ్-11లో చోటు దక్కించుకున్న వాషింగ్టన్ సుందర్ మూడో టీ20లో విఫలమయ్యాడు. బ్యాట్, బాల్తో రాణించడంలో ఫెయిల్ అయ్యాడు. సుందర్ ఒక ఓవర్ వేసి 15 పరుగులు సమర్పించుకున్నాడు. అలాగే బ్యాటింగ్లోనూ నిరాశపరిచాడు. ధ్రువ్ జురెల్, అక్షర్ పటేల్ కంటే బ్యాటింగ్ ఆర్డర్ లో ముందొచ్చి 15 బంతుల్లో 6 పరుగులు మాత్రమే చేసి ఔట్ అయ్యాడు. సుందర్ ఆడిన డాట్ బాల్స్ కారణంగా రన్ రేట్ మరింత పెరిగిపోయి బ్యాటర్లపై మరింత ఒత్తిడి పెరిగిపోయింది.
లెఫ్ట్- రైట్ కాంబినేషన్
అలాగే బ్యాటింగ్ ఆర్డర్ కూడా టీమ్ ఇండియా ఓటమి కారణమైంది. మూడో టీ20ల్లో లెఫ్ట్-రైట్ కాంబినేషన్ కు ఎక్కువ ప్రాధాన్యం ఇచ్చారు. దీంతో బ్యాటింగ్ ఆర్డర్ లో మార్పులు వచ్చి పరుగులు చేయడంలో బ్యాటర్లు విఫలమయ్యారు. శాంసన్ ఔటైన తర్వాత తిలక్ వర్మ రావాల్సి ఉంది. అయితే సూర్య బ్యాటింగ్కు వచ్చాడు. నాలుగో స్థానంలో బ్యాటింగ్కు వచ్చిన తిలక్ వర్మ 18 పరుగులకే వెనుదిరిగాడు. అలాగే ధ్రువ్ జురెల్ స్థానంలో సుందర్ ఆరో ప్లేస్లో పంపగా, అతడు కూడా విఫలమయ్యాడు.
