IND VS BAN First Test : చెన్నై చెపాక్ స్టేడియం వేదికగా బంగ్లాదేశ్‌తో జరుగుతున్న మొదటి టెస్ట్ మ్యాచ్‌లో టీమ్ ఇండియా స్టార్ బ్యాటర్లు పూర్తిగా నిరాశపరిచారు. భారీ అంచనాలతో బరిలోకి దిగిన టాప్‌-3 భారత స్టార్ బ్యాటర్లు కెప్టెన్ రోహిత్ శర్మ, శుభ్‌మన్‌ గిల్, విరాట్‌ కోహ్లీ విఫలమయ్యారు. తొలి ఇన్నింగ్స్లో ఓపెనర్‌ రోహిత్ ఆరు పరుగులు మాత్రమే, వన్‌డౌన్‌ బ్యాటర్‌ గిల్ డకౌట్గా వెనుదిరిగాడు. ఇక నాలుగో స్థానంలో బ్యాటింగ్కు దిగిన కోహ్లీ కూడా ఆరు పరుగులకే వెనుదిరిగి అభిమానులను నిరాశపరిచాడు. అయితే ఈ ముగ్గురిని బంగ్లాదేశ్ యువ పేసర్‌ హసన్ మహ్మద్ ఔట్ చేయడం విశేషం. రోహిత్ సెకెండ్‌ స్లిప్‌లో షాంటోకు క్యాచ్‌ ఇచ్చి ఔట్ అయ్యారు. శుభ్‌మన్‌, కోహ్లీ వికెట్‌కీపర్‌ లిట్టన్‌ దాస్‌ చేతికి చిక్కారు.
ఇంతకీ హసన్ మహ్మద్ ఎవరంటే?(Who is Hasan Mahmud?)
హసన్ మహ్మద్ బంగ్లాదేశ్లోని చటోగ్రామ్లో 1999లో జన్మించాడు. ఇప్పుడు ఇతడి వయసు 24 ఏళ్లు. 2020లో జింబాబ్వేతో జరిగిన టీ20 మ్యాచ్తో అంతర్జాతీయ క్రికెట్లోకి అడుగుపెట్టాడు. అప్పటి నుంచి 18 టీ20లు ఆడి 18 వికెట్లు తీశాడు. వన్డేల్లోనూ అద్భుతంగా రాణిస్తున్నాడు. 22 వన్డేలు ఆడి 30 వికెట్లు పడగొట్టాడు.
తన టెస్ట్ అరంగేట్రాన్ని ఈ ఏడాది లంక జట్టుపై చేశాడు. తన డెబ్యూ మ్యాచ్లోనే 6 వికెట్లు తీసి అందరి దృష్టిని ఆకర్షించాడు. పాకిస్థాన్పై టెస్ట్ సిరీస్ గెలిచిన సమయంలో మరింత వెలుగులోకి వచ్చాడు. ఈ సిరీస్లో 8 వికెట్లు తీశాడు. అందులో ఐదు వికెట్ల ప్రదర్శన కూడా ఉంది.
కాగా, వరల్డ్‌ టెస్టు చాంపియన్‌షిప్‌(డబ్ల్యూటీసీ) 2023-25 భాగంగా భారత్‌- బంగ్లాదేశ్ రెండు టెస్ట్ మ్యాచ్‌లు ఆడనున్నాయి. మొదటి టెస్టుకు చెన్నై, రెండో టెస్టుకు కాన్పూర్‌ వేదికగా ఉంది. మొదటి టెస్ట్ మ్యాచ్‌లో భారత్‌ ముగ్గురు పేసర్లు, ఇద్దరు స్పిన్నర్లతో బరిలోకి దిగింది. బంగ్లాదేశ్ కూడా ఇదే ఫార్ములాను ఉపయోగించింది. ఎర్రమట్టి పిచ్‌పై మ్యాచ్ జరుతుండటం వల్ల ఇరు జట్లు పేసర్లకు ప్రాధాన్యత ఇచ్చాయి.
632 రోజుల తర్వాత 'టెస్ట్'కు సిద్ధమైన పంత్‌ - గంభీర్‌ ఏమన్నాడంటే? - IND VS BAN Pant Test Cricket
