INTERNATIONAL CRICKET BALL MAKING PROCESS : ఉత్తరప్రదేశ్‌లోని మీరట్ ప్రపంచవ్యాప్తంగా స్పోర్ట్స్ సిటీగా ప్రసిద్ధి చెందింది. అత్యుత్తమ నాణ్యతతో క్రీడా వస్తువులు, క్రికెట్ పరికరాలను తయారు చేయడంలో గుర్తింపు పొందింది. అక్కడ ఈ పరిశ్రమలోని టాప్‌ కంపెనీల్లో ఒకటి శాన్స్ పేరిల్ గ్రీన్‌ల్యాండ్స్ (SG). ఈ సంస్థ ప్రపంచ స్థాయి మూడు రకాల క్రికెట్ బాల్స్‌ను కూడా తయారు చేస్తుంది. భారత్‌లో అంతర్జాతీయ మ్యాచ్‌లకు ఎక్కువగా ఎస్జీ బాల్స్‌నే వినియోగిస్తారు. ఇప్పుడు ఈ SG క్రికెట్ బాల్ ప్రయాణం గురించి తెలుసుకుందాం.
SG క్రికెట్ బాల్ కథ - సాధారణంగా SGగా పేర్కొనే సాన్స్‌పేరిల్స్ గ్రీన్‌ల్యాండ్స్ దశాబ్దాలుగా క్రికెట్ ఉత్పత్తులను తయారు చేస్తోంది. 1939లో ప్రారంభమైన ఈ కంపెనీని ప్రస్తుత మేనేజింగ్ డైరెక్టర్ పరాస్ ఆనంద్ తాతగారు స్థాపించారు. పాకిస్థాన్‌ విభజన తర్వాత, వీరి కుటుంబం సియాల్‌కోట్ నుంచి భారతదేశానికి వచ్చింది. క్రికెట్ ఉత్పత్తులను తయారు చేయడం కొనసాగించింది. అప్పటి నుంచి SG క్రికెట్ పరికరాలకు ప్రత్యేక గుర్తింపు లభించింది.
ఎస్జీ బాల్స్ ఎలా తయారు చేస్తారు? - SG క్రికెట్ బాల్‌ను తయారు చేసే ప్రక్రియ సుదీర్ఘమైంది. చాలా మంది కళాకారుల చేతి పనితో బాల్ తయారు అవుతుంది. ఒక క్రికెట్ బాల్ పూర్తయ్యే సరికి దాదాపు 12 నుంచి 15 మంది కళాకారుల చేతుల్లోకి వెళ్తుంది. ముడి పదార్థాన్ని కత్తిరించడం, బంతి ఆకృతిని చేయడం లేదా కలిపి కుట్టడం వంటి పనులను వివిధ కళాకారులు చేస్తారు. ఈ దశలన్నింటి తర్వాత, మార్కెట్‌కు పంపే ముందు చివరిగా బంతిని పాలిష్ చేస్తారు.
SG క్రికెట్ బంతుల రకాలు -
SG ప్రస్తుతం మూడు రకాల క్రికెట్ బంతులు ఉత్పత్తి చేస్తోంది.
రెడ్ బాల్ : టెస్ట్ మ్యాచ్‌లకు ఉపయోగిస్తారు.
వైట్ బాల్ : టీ20, వన్డే ఇంటర్నేషనల్ (ODI) మ్యాచ్‌లకు వాడుతారు.
పింక్ బాల్ : ఇది కొత్త రకం బంతి. డే/నైట్‌ టెస్ట్ మ్యాచ్‌లకు వాడుతారు. కోల్‌కతాలో జరిగిన ఇండియా వర్సెస్ బంగ్లాదేశ్ టెస్ట్ మ్యాచ్‌లో మొదట ఉపయోగించారు.
ఈ మూడు రకాల బంతులు భారతదేశంలోనే కాకుండా ప్రపంచవ్యాప్తంగా వివిధ క్రికెట్ ఫార్మాట్‌లలో విస్తృతంగా ఉపయోగిస్తున్నారు. రంజీ ట్రోఫీ వంటి ప్రధాన దేశీయ టోర్నమెంట్‌లలో అలాగే అంతర్జాతీయ మ్యాచ్‌లలో వాడుతారు.
ఎంత ఉత్పత్తి జరుగుతుంది? - SG మీరట్‌లోని తన ఫ్యాక్టరీలో ప్రతిరోజూ సుమారు 1,500 క్రికెట్ బంతులను ఉత్పత్తి చేస్తుంది. కంపెనీకి భారతదేశం అంతటా డీలర్లు ఉన్నారు. SG క్రికెట్ ఉత్పత్తులను క్రికెట్ ఆడే ఇతర దేశాలకు కూడా ఎగుమతి చేస్తుంది. ప్రపంచవ్యాప్తంగా గుర్తింపు పొందిన బ్రాండ్‌గా నిలిచింది. రిషబ్ పంత్, హార్దిక్ పాండ్యా, కృనాల్ పాండ్యా, సంజూ శాంసన్‌ సహా ప్రముఖ క్రికెటర్లు SG ప్రొడక్టులు ఉపయోగిస్తున్నారు. ఈ ఆటగాళ్ళు ప్రాక్టీస్, మ్యాచ్‌లు రెండింటికీ SG బంతులను ఇష్టపడతారు.
ధర, లభ్యత - వివిధ అవసరాలకు అనుగుణంగా SG క్రికెట్ బంతులు అందుబాటులో ఉన్నాయి. SG బాల్‌కు ప్రారంభ ధర దాదాపు రూ.600. ప్రొఫెషనల్ మ్యాచ్‌లలో ఉపయోగించే హై-ఎండ్ మోడల్‌ ధర దాదాపు రూ.4,500 వరకు ఉంటుంది.
