ICC T20 Rankings : మహిళల టీ20 ర్యాంకింగ్స్ను తాజాగా విడుదల చేసింది ఐసీసీ. ఈ ర్యాంకింగ్స్లో టీమ్ఇండియా స్టార్ బ్యాటర్ స్మృతి మందాన టాప్ 10లో నిలిచింది. 729 పాయింట్లతో తన 5వ స్థానాన్ని పదిలం చేసుకుంది. టీమ్ఇండియా ఓపెనర్ షెఫాలీ వర్మ, కెప్టెన్ హర్మన్ ప్రీత్ కౌర్ తమ స్థానాలను మెరుగుపరుచుకున్నారు. వర్మ(605 పాయింట్లు) రెండు స్థానాలు ఎగబాకి 15వ ర్యాంకును న్యూజిలాండ్ అమెలియా కేర్, ఇంగ్లాండ్ డాని వ్యాట్తో పంచుకుంది. ఇక మూడు ర్యాంకులు ముందుకు జరిగి 12 స్థానంలో నిలిచింది కెప్టెన్ హర్మన్ ప్రీత్ కౌర్(613 పాయింట్లు). రీసెంట్గా జరిగిన దక్షిణాఫ్రికాతో సిరీస్తో మంచి ప్రదర్శన చేసి ఈ మార్క్ను అందుకున్నారు.
బౌలింగ్ విభాగంలో 738 పాయింట్లతో దీప్తి శర్మ తన మూడో స్థానాన్ని పదిలం చేసుకుంది. రాధా యాదవ్ 8 స్థానాలను ఎగబాకి 15వ ర్యాంకుకు, పూజా వస్త్రాకర్ ఆరు ర్యాంకులు ముందుకు జరిగి 23వ స్థానానికి, శ్రేయంక పాటిల్ తొమ్మిది స్థానాలు ఎగబాకి 60వ ర్యాంకుకు చేరుకున్నారు. తొలి రెండు స్థానాల్లో సోఫీ ఎక్లేస్టోన్, సారా గ్లెన్ నిలిచారు. వీరిలో సోఫీ కెరీర్ హై రేటింగ్ పాయింట్స్ను(768) దక్కించుకుంది. ఇక ఆల్రౌండర్ విభాగంలోనూ 387 పాయింట్లతో మూడు స్థానంలో నిలిచింది దీప్తి శర్మ. టాప్ - 10లో ఇతర టీమ్ఇండియా ప్లేయర్లు ఎవరూ చోటు దక్కించుకోలేదు.
