Shivam Dube Duck Out: చెన్నై సూపర్ కింగ్స్ యంగ్ బ్యాటర్ శివమ్ దూబే వరుసగా రెండోసారి డకౌట్ అయ్యాడు. ఈ సీజన్లో పంజాబ్తో ఆడిన రెండు మ్యాచ్ల్లోనూ దూబే పరుగుల ఖాతా తెరవకుండానే పెవిలియన్ చేరాడు. మే 1న జరిగిన మ్యాచ్లో హరిప్రీత్ బ్రార్కు వికెట్ సమర్పిచుకోగా, తాజాగా రాహుల్ చాహర్ దూబేను ఔట్ చేశాడు. అయితే టీ20 వరల్డ్కప్ టోర్నమెంట్కు ఎంపికైన తర్వాత దూబే ఒక్క పరుగు కూడా సాధించలేదు. దీంతో ఫామ్ కోల్పోయాడంటూ దూబేపై సోషల్ మీడియాలో విమర్శలు వస్తున్నాయి. ఇది టీమ్ఇండియా ఫ్యాన్స్ను అందోళనలో పడేస్తోంది.
ఈ రెండు మ్యాచ్ల్లో శివమ్ దూబే స్పిన్నర్లను ఆడడంలో కాస్త ఇబ్బంది పడుతున్నట్లు కనిపించాడు. ఈ సీజన్ ఫస్ట్ హాఫ్లో అద్భుత ఫామ్తో సెలక్టర్ల దృష్టిని ఆకర్షించిన దూబేకు పొట్టికప్లో ఆడే ఛాన్స్ వచ్చింది. కానీ, వరల్డ్కప్కు ఎంపికైన తర్వాత దూబే ఆడిన రెండు మ్యాచ్ల్లోనూ గోల్డెన్ డకౌట్ అవ్వడం అభిమానులను కలవర పెడుతోంది. ఇకనైనా దూబే మళ్లీ సక్సెస్ ట్రాక్ ఎక్కితేనే వరల్డ్కప్లో తుదిజట్టులో ఉండే అవకాశం ఉంటుంది. లేదంటే బెంచ్కే పరిమితమయ్యే ప్రమాదం ఉంది.
ఇక ఈ మ్యాచ్లో తొలుత బ్యాటింగ్ చేసిన చెన్నై సూపర్ కింగ్స్ నిర్ణీత 20 ఓవర్లలో 9 వికెట్ల నష్టానికి 167 పరుగులు చేసింది. ఓపెనర్ అజింక్యా రహానే (9) స్వల్ప స్కోరుకే వెనుదిరిగినా, కెప్టెన్ రుతురాజ్ గైక్వాడ్ (32 పరుగులు), డారిల్ మిచెల్ (30 పరుగులు) పవర్ప్లేలో స్కోర్ బోర్డను పరుగులు పెట్టించారు. వీరిద్దరూ రెండో వికెట్కు 57 పరుగులు జోడించారు.
ఇన్నింగ్స్ సాఫీగా సాగుతుందనుకున్న సమయంలో రాహుల్ చాహర్ బ్రేక్ ఇచ్చాడు. వరుస బంతుల్లో రుతురాజ్, దూబేను పెవిలియన్ చేర్చాడు. తర్వాతి ఓవర్లోనే హర్షల్ పటేల్ మిచెల్ను వెనక్కి పంపాడు. దీంతో ఒక్కసారిగా చెన్నై ఇన్నింగ్స్ గాడి తప్పింది. 101కే 5 వికెట్లు కోల్పోయింది. ఈ దశలో రవీంద్ర జడేజా (43 పరుగులు) కీలక ఇన్నింగ్స్తో జట్టుకు పోరాడగలిగే స్కోర్ అందించాడు. ఇక పంజాబ్ బౌలర్లలో రాహుల్ చాహర్, హర్షల్ పటేల్ చెరో 3, అర్షదీప్ సింగ్ 2, శామ్ కరన్ 1 వికెట్ దక్కించుకున్నారు.
IPLలో రప్ఫాడిస్తున్న 'దూబే'- హార్దిక్ టీమ్ఇండియా ప్లేస్పై ఎఫెక్ట్? - Shivam Dube IPL 2024
