చరిత్ర సృష్టించిన కివీస్ ప్లేయర్ - ఒకే వేదికగా ఎక్కువ వికెట్లు తీసిన బౌలర్​గా రికార్డు!

మూడో టెస్టులో అదరగొట్టిన అజాజ్ పటేల్- మ్యాన్ ఆఫ్ ది మ్యాచ్ అవార్డు సొంతం- మరో రికార్డు కూడా!

Azaj Patel India Vs New Zealand : న్యూజిలాండ్‌ స్పిన్నర్‌ అజాజ్‌ పటేల్‌ సరికొత్త చరిత్ర సృష్టించాడు. భారత్​లో ఒకే వేదికపై అత్యధిక వికెట్లు(25) తీసిన విదేశీ బౌలర్​గా రికార్డు సృష్టించాడు. ముంబయిలోని వాంఖడే స్టేడియంలో జరిగిన మూడో టెస్టులో రెండు ఇన్నింగ్స్​ల్లో కలిపి 11 వికెట్లు తీయడంలో ఈ ఫీట్​ను అందుకున్నాడు కివీస్ స్పిన్నర్.

ఓకే ఇన్నింగ్స్ లో 10 వికెట్లు
కివీస్ సంచలన బౌలర్ అజాజ్ పటేల్ 2021 భారత పర్యటనలో అదరగొట్టాడు. వాంఖడే వేదికగా జరిగిన టెస్టు మ్యాచ్​లో ఒక ఇన్నింగ్స్‌ లోనే ఏకంగా పది వికెట్లు తీసి చరిత్ర సృష్టించాడు. ఆ తర్వాత అదే టెస్టులో రెండో ఇన్నింగ్స్​లోనూ మరో 4 వికెట్లు పడగొట్టాడు. దీంతో మొత్తం ఆ మ్యాచ్ లో 14 వికెట్లు అజాజ్​కు దక్కాయి. తాజాగా వాంఖడే వేదికగా భారత్​తో జరిగిన టెస్టులోనూ అజీజ్ తొలి ఇన్నింగ్స్​లో 5, రెండో ఇన్నింగ్స్​లో 6 వికెట్లు పడగొట్టాడు. దీంతో ముంబయి స్టేడియంలో మొత్తం 25 వికెట్లు పడగొట్టినట్లైంది. ఈ క్రమంలో భారత్​లో ఒకే వేదికపై అత్యధిక వికెట్లు తీసిన విదేశీ బౌలర్​గా నిలిచాడు.

'దాన్ని సద్వినియోగం చేసుకున్నాను'
"స్పిన్ బౌలింగ్ అనేది రిథమ్​కి సంబంధించినది. మంచి రిథమ్​లో ఉన్నప్పుడు దాన్ని సద్వినియోగం చేసుకోవాలి. అలాంటప్పుడే వరుస వికెట్లు తీసి జట్టు విజయంలో సాయపడగలం. ఉదయం సెషన్​లో (రెండో రోజు) కూడా నేను నమ్మకంగా ఉన్నాను. కానీ వికెట్ దక్కలేదు. లంఛ్ తర్వాత మంచి రిథమ్​తో బౌలింగ్ తీసి వికెట్లు పడగొట్టాను. " అని మ్యాచ్ అనంతరం అజాజ్ పటేల్ తెలిపాడు.

కాగా, మూడో టెస్టులోనూ భారత బ్యాటర్లు విఫలమయ్యారు. 147 పరుగుల లక్ష్య ఛేదనలో టీమ్​ఇండియా 121 పరుగులకే కుప్పకూలింది. దీంతో కివీస్ 25 పరుగుల తేడాతో గెలుపొందింది. మూడు టెస్టుల సిరీస్​లో భారత్ వైట్​వాష్‌ కావడం ఇదే తొలిసారి. కివీస్ స్పిన్నర్ అజాజ్‌ పటేల్ (6/57), గ్లెన్ ఫిలిప్స్‌ (3/42), మాట్ హెన్రీ (1/10) దెబ్బకు భారత బ్యాటర్లు విలవిల్లాడారు. భారత బ్యాటర్లలో రిషభ్‌ పంత్ (64) మినహా ఎవరూ రాణించలేదు. ఈ క్రమంలో 'ప్లేయర్‌ ఆఫ్‌ ది మ్యాచ్‌'గా అజాజ్ పటేల్, 'ప్లేయర్ ఆఫ్‌ ది సిరీస్‌' అవార్డును విల్‌ యంగ్‌ సొంతం చేసుకున్నాడు.