స్కాట్లాండ్​పై ఆసీస్ విక్టరీ- ఇంగ్లాండ్ సూపర్ 8కు లైన్ క్లియర్ - T20 World cup 2024

Australia vs Scotland T20 World Cup: 2024 టీ20 ప్రపంచకప్​లో ఆదివారం స్కాట్లాండ్​తో జరిగిన మ్యాచ్​లో ఆస్ట్రేలియా నెగ్గింది. ఈ ఓటమితో స్కాట్లాండ్ ఇంటిబాట పట్టింది.

Australia vs Scotland T20 World Cup: 2024 టీ20 వరల్డ్​కప్​లో ఆస్ట్రేలియా వరుసగా నాలుగో విజయం నమోదు చేసింది. ఆదివారం స్కాట్లాంట్​తో జరిగిన మ్యాచ్​లో ఆసీస్ 5 వికెట్ల తేడాతో నెగ్గింది. స్కాట్లాండ్ నిర్దేశించిన 181 పరుగుల టార్గెట్​ను ఆస్ట్రేలియా 19.4 ఓవర్లలో 5 వికెట్లు కోల్పోయి ఛేదించింది. ట్రావిస్ హెడ్ (68 పరుగులు), మార్కస్ స్టాయినిస్ (59 పరుగులు) అదరగొట్టారు. చివర్లో టిమ్ డేవిడ్ (22*) రాణించాడు. స్కాట్లాండ్ బౌలర్లలో మార్క్ వాట్, షరీఫ్ తలో 2, బ్రాడ్ వీల్ 1 వికెట్ దక్కించుకున్నారు. ఇక ఈ ఓటమితో స్కాట్లాండ్ సూపర్- 8కు చేరకుండానే టోర్నీ నుంచి నిష్క్రమించింది.

అయితే భారీ లక్ష్య ఛేదనలో ఆసీస్ రెండో ఓవర్లోనే ప్రమాదకర డేవిడ్ వార్నర్ (1)ను కోల్పోయింది. ఆరో ఓవర్లో మిచెల్ మార్ష్ (8) ఔటయ్యాడు. కాసేపటికే మ్యాక్స్​వెల్ (11) కూడా పెవిలియన్ బాట పట్టాడు. దీంతో ఆసీస్ 60కే 3 వికెట్లు కోల్పోయి కష్టాల్లో పడింది. ఈ పరిస్థితిలో హెడ్, స్టాయినిస్ స్కాట్లాండ్​ను రఫ్పాడించారు. ఎడాపెడా బౌండరీలు బాదుతూ ఆసీస్​ను లక్ష్యానికి చేరువ చేశారు. ఆఖర్లో వీరిద్దరూ ఔటైనా, టిమ్ డేవిడ్ మిగిలిన పని పూర్తి చేశాడు. కాగా, ఈ మ్యాచ్​లో ఆసీస్ నెగ్గినప్పటికీ స్కాట్లాండ్ అద్భుతంగా పోరాడింది.

టాస్ ఓడి బ్యాటింగ్​కు దిగిన స్కాట్లాండ్ నిర్ణీత 20 ఓవర్లలో 5 వికెట్ల నష్టానికి 180 పరుగులు చేసింది. తొలి ఓవర్ ఆఖరి బంతికి ఓపెనర్ జోన్స్ (2) ఔటైయ్యాడు. ఇక వన్​ డౌన్​లో వచ్చిన బ్రెండన్ మెక్​మెల్లన్ (60 పరుగులు, 34 బంతుల్లో; 2x4, 6x6), మరో ఓపెనర్ మున్సీ (35 పరుగులు) కలిసి స్కోర్ బోర్డును పరుగులు పెట్టించాడు. వీరిద్దరూ రెండో వికెట్​కు 89 పరుగుల భాగస్వామ్యం చేశారు. ఈ క్రమంలోనే మెక్​మెల్లన్ కేవలం 26 బంతుల్లోనే హాఫ్ సెంచరీ పూర్తి చేశాడు. మిడిలార్డర్​లో బెరింగ్​టన్ (42 పరుగులు*) కూడా రాణించాడు. ఓ క్రమంలో స్కాట్లాండ్ 200 పరుగులు చేసేలా కనిపించింది. ఆఖర్లో ఆసీస్ బౌలర్లు కాస్త పట్టు బిగించడం వల్ల స్కాట్లాంట్ 180 వద్దే ఆగిపోయింది. ఆస్ట్రేలియా బౌలర్లలో మ్యాక్స్​వెల్ 2, ఏగర్, నథన్ ఎల్లిస్, ఆడమ్ జంపా తలో వికెట్ దక్కించుకున్నారు.

• Turning the tide in Australia's favour 🌊
  
  Marcus Stoinis is awarded the @aramco POTM for his game-changing 59 from 29 balls 🏅 #T20WorldCup #AUSvSCO pic.twitter.com/PGROqjdNcL

  — T20 World Cup (@T20WorldCup) June 16, 2024

ఇంగ్లాండ్​కు లైన్ క్లియర్: స్కాట్లాండ్ ఓటమితో గ్రూప్ బీ నుంచి ఆస్ట్రేలియాతోపాటు తాజాగా ఇంగ్లాండ్ సూపర్- 8కు అర్హత సాధించింది. పట్టికలో ఇంగ్లాండ్, స్కాట్లాంట్ రెండు జట్లు 5​ పాయింట్లతో సమానంగా ఉన్నప్పటికీ మెరుగైన రన్​రేట్​ కారణంగా ఇంగ్లాండ్ సూపర్- 8 కి దూసుకెళ్లింది. దీంతో స్కాట్లాండ్​కు నిరాశ ఎదురైంది.