బద్దలైన బీఆర్​ఎస్​ కంచుకోట - మెదక్​లో మూడో స్థానానికే పరిమితమైన గులాబీ పార్టీ - Medak Parliament Constituency

Story on Medak MP Constituency : రాష్ట్రంలో 2004 నుంచి బీఆర్​ఎస్​కు మెదక్​ నియోజకవర్గ స్థానం కంచుకోటగా ఉంది. కానీ ఈసారి గులాబీ పార్టీ ఆ నియోజకవర్గంలో ఘోర పరాజయానికి గురైంది. లోక్​సభ ఎన్నికల ప్రచారం మొదలైనప్పటి నుంచి ఎన్నికల ఫలితాల వరకు మెదక్​లో బీఆర్​ఎస్సే వస్తుందని ధీమాతో ఉన్న ఆ పార్టీ నేతలంతా ఒక్కసారిగా షాక్​కు గురయ్యారు. ఇప్పుడు ఆ స్థానంలో కాషాయం జెండా రెపరెపలాడుతోంది. కనీసం బీఆర్​ఎస్​కు సమీప ప్రత్యర్థి స్థానం కూడా దక్కకుండా మూడో స్థానానికి పరిమితమైంది.

BRS in Medak Parliament in Telangana : రాష్ట్రంలో లోక్​సభ ఫలితాలు ఉత్కంఠభరితంగా వెల్లడయ్యాయి. కాంగ్రెస్​, బీజేపీలు పోటాపోటీగా చెరో ఎనిమిది స్థానాలు సాధించగా బీఆర్​ఎస్​ కనీస ప్రభావం కూడా చూపలేకపోయింది. తెలంగాణలో గులాబీ పార్టీకి కంచుకోటగా ఉన్న మెదక్​లోనూ మూడోస్థానంతో సరిపెట్టుకుంది. ఈ నియోజకవర్గంలో బీజేపీ అభ్యర్థి రఘునందన్ రావు 32 వేల ఓట్ల స్వల్ప ఆధిక్యంతో కాంగ్రెస్‌ అభ్యర్థి నీలం మధుపై విజయం సాధించారు. బీఆర్​ఎస్​ అభ్యర్థి వెంకట్రామిరెడ్డి 3 లక్షల 96 వేల 790 ఓట్లతో మూడోస్థానానికి పరిమితమయ్యారు.

తెలంగాణలో మెదక్​ లోక్​సభ స్థానం 2004 నుంచి 2019 వరకు బీఆర్​ఎస్​కు కంచుకోటగా ఉంటూ జరిగిన ప్రతి ఎంపీ ఎన్నికల్లో ప్రతిసారి గులాబీ జెండా రెపరెపలాడింది. ఇక్కడ ఎంపీగా ఆ పార్టీ నుంచి ఎవరు పోటీ చేసినా గెలిచే అవకాశాలు ఎక్కువగా ఉండేది. మెదక్ పార్లమెంటు పరిధిలో మొత్తం ఏడు నియోజకవర్గాలు ఉన్నాయి. అయితే ఈసారి ఎంపీ ఎన్నికల్లో మెదక్​ స్థానంలో బీఆర్​ఎస్​ నుంచి పోటీ చేసిన వెంకట్రామిరెడ్డి గెలుపుపై భారీగా అంచనా వేశారు. ఆయన ప్రచారంలో చేసిన రూ.100 కోట్ల ట్రస్టు గురించి ఆ నియోజకవర్గంలో చర్చగా మారింది. పైగా ఆయన మాజీ కలెక్టర్ కావడంతో ఇతర పార్టీలు సైతం మెదక్​ స్థానంపై గురిపెట్టి పోటాపోటీగా ప్రచారాలతో హోరెత్తించాయి.

1952లో ఆవిర్భవించిన మెదక్ పార్లమెంట్‌ నియోజకవర్గం : మాజీ మంత్రి హరీశ్​రావు సైతం మెదక్​ నియోజకవర్గంలో బీఆర్​ఎస్​ ఎంపీ అభ్యర్థి తరుఫున విస్తృతంగా ప్రచారం చేశారు. మెదక్‌ స్థానం బీఆర్​ఎస్​కు అత్యంత కీలకంగా భావించి, తప్పనిసరిగా ఇక్కడ గెలిచే దిశగా అభ్యర్థి ఎంపిక దగ్గరి నుంచి విజయం వరకు వ్యూహాలు రచించింది. మెదక్ పార్లమెంట్‌ నియోజకవర్గం 1952లో ఆవిర్భవించింది. ఇప్పటికి వరకు 18 సార్లు ఎన్నికలు జరిగాయి. మొదట్లో మెదక్​, ఆందోలు, సంగారెడ్డి, జహీరాబాద్​, నారాయణఖేడ్​, ఎల్లారెడ్డి, కామారెడ్డి అసెంబ్లీ సెగ్మెంట్ల పరిధిలో మెదక్​ పార్లమెంటు నియోజకవర్గం ఏర్పాటైంది.

2009లో నియోజకవర్గాల పునర్విభజన జరగడంతో మెదక్​ పార్లమెంటు నియోజకవర్గ స్వరూపం మారింది. దీని పరిధిలోని ప్రస్తుతమున్న సంగారెడ్డి, పటాన్​చెరు, సిద్దిపేట, గజ్వేల్​, దుబ్బాక, మెదక్​, నర్సాపూర్​ అసెంబ్లీ సెగ్మెంట్లు వచ్చి చేరాయి. 1980లో జరిగిన మధ్యంతర ఎన్నికల్లోనూ ఇందిరాగాంధీ కూడా మెదక్​ నుంచి పోటీ చేసి గెలిచారు. ఆ ఎన్నికల్లో ఆమెకు, 15,077 ఓట్లు వచ్చాయి. మెదక్​ ఎంపీగా ఉంటూనే ప్రధాని పదవిలో కొనసాగుతూ 1984 అక్టోబరు 31న మరణించారు. ప్రస్తుతం ఆ నియోజకవర్గం బీఆర్​ఎస్​ కంచుకోటగా ఉంటూ ఇవాళ వెలువడిన ఫలితాలతో తీవ్ర నిరాశకు గురైంది.