కాంగ్రెస్​లో చేరాలంటే - ఇక ఆ కమిటీ ఆమోదం తప్పనిసరి - T CONGRESS JOININGS COMMITTEE

Telangana Congress Committee on to Joinings : రాష్ట్ర కాంగ్రెస్‌లో ఇటీవల చేరికలు భారీగా ఉంటుండడంతో క్రమబద్ధీకరణకు ఏఐసీసీ కమిటీని ఏర్పాటు చేసింది. హస్తం పార్టీ సిద్ధాంతం పట్ల విశ్వాసం, భావ సారూప్యత కలిగిన నాయకులను మాత్రమే పార్టీలో చేర్చుకోవాలని అధిష్ఠానం నిర్ణయించింది. జగ్గారెడ్డి, మహేశ్‌కుమార్ గౌడ్, కోదండరెడ్డితో ముగ్గురు సభ్యుల కమిటీని ఏర్పాటు చేసింది. ఇకపై వీరి ఆమోదంతోనే చేరికలు ఉండేటట్లు చూడాలని పీసీసీ నిర్ణయించింది.

PCC Committee on Joinings in Congress : తెలంగాణలో అధికార కాంగ్రెస్‌లో చేరేందుకు బీఆర్ఎస్‌, బీజేపీ నాయకులు పెద్ద సంఖ్యలో చేరేందుకు చొరవ చూపుతున్నారు. ఇటీవల కేసీ వేణుగోపాల్ రాష్ట్ర పర్యటన వచ్చినప్పుడు చేరికల విషయం చర్చకు వచ్చింది. ఎవరు పార్టీలో చేరేందుకు చొరవ చూపినా ఆహ్వానించాలని సూచించారు. అయితే గడిచిన పదేళ్లుగా క్షేత్రస్థాయిలో హస్తం పార్టీకి అండగా ఉంటూ భారత్ రాష్ట్ర సమితి, కమలం పార్టీకి ఎదురొడ్డి కొట్లాడిన కార్యకర్తలు, నేతలు తీవ్ర అసంతృప్తిగా ఉన్నట్లు తెలుస్తోంది.

Lok Sabha Elections 2024 : ఇప్పటివరకు అప్పటి అధికార పార్టీ నాయకులు పెట్టిన కేసులు ఎదుర్కొన్న పార్టీ శ్రేణులు, చోటా నాయకులు కొత్తగా పార్టీలోకి వచ్చిన వారితో కలిసి వెళ్లలేని పరిస్థితి నెలకొంది. ఇంతకాలం కేసులు పెట్టి ఇబ్బందులకు గురి చేసిన నేతలు కాంగ్రెస్‌లో చేరితే కలిసి పనిచేయడం ఎలా సాధ్యమని ప్రశ్నిస్తున్నారని తెలుస్తోంది. అధికారం కోసమో, ఆస్తుల రక్షణ కోసమో బీఆర్ఎస్‌, బీజేపీకి చెందిన మండల, నియోజకవర్గ స్థాయి నాయకులు పెద్ద సంఖ్యలో హస్తం పార్టీలోకి వస్తున్నారు. అయితే డీసీసీ అధ్యక్షులకు తెలియకుండానే స్థానిక కాంగ్రెస్‌ నేతల ఆమాదముద్ర లేకుండా కొంతమందిని చేర్చుకుంటూ ఉండడంతో అభ్యంతరాలు వ్యక్తమవుతున్నాయి.

ముగ్గురు సీనియర్ నాయకుల నేతృత్వంలో కమిటీ : ఈ పరిస్థితులను అధిగమించేందుకు పార్టీకి విధేయత చూపి, భావ సారూప్యత కలిగిన నాయకులను మాత్రమే చేర్చుకోవాలని ఏఐసీసీ నిర్ణయానికి వచ్చినట్లు తెలుస్తోంది. కష్ట కాలంలో పార్టీని అంటిపెట్టుకొని ఉన్న కాంగ్రెస్ శ్రేణులకు ఎలాంటి ఇబ్బంది కలగకుండా క్షేత్రస్థాయిలో నాయకుల అంగీకారంతో చేర్చుకునే దిశగా పీసీసీ చొరవ చూపుతోంది. ఈ నేపథ్యంలోనే ముగ్గురు సీనియర్ నాయకుల నేతృత్వంలో కమిటీని ఏర్పాటు చేసినట్లు పీసీసీ వెల్లడించింది.

ఇకపైన ఎవరిని పార్టీ చేర్చుకోవాలన్నా పూర్తిస్థాయిలో చర్చించి స్థానిక నాయకుల దృష్టికి తీసుకెళ్లి కాంగ్రెస్‌లోకి ఆహ్వానించాలని పీసీసీ నిర్ణయించింది. ఏఐసీసీ ఇచ్చిన నిర్దిష్ట ఆదేశాల మేరకు చేరికల కోసం హస్తం పార్టీ టీపీసీసీ వర్కింగ్ ప్రెసిడెంట్‌ జగ్గారెడ్డి, ఎమ్మెల్సీ మహేశ్‌కుమార్ గౌడ్, కిసాన్ కాంగ్రెస్ జాతీయ ఉపాధ్యక్షుడు కోదండరెడ్డిలతో కలిసి ముగ్గురు సభ్యుల కమిటీని ఏర్పాటు చేసింది. ఇవాళ, రేపు రెండు రోజులు గాంధీభవన్‌లో చేరికలు ఉంటాయని పీసీసీ వర్గాలు వెల్లడించాయి.

బీజేపీపై కాంగ్రెస్ ఛార్జిషీట్ : మరోవైపు బీజేపీపై హస్తం పార్టీ ఛార్జిషీట్ విడుదల చేయనుంది. ఈ కార్యక్రమంలో ముఖ్యమంత్రి, పీసీసీ అధ్యక్షుడు రేవంత్‌రెడ్డి, రాష్ట్ర వ్యవహారాల ఇంఛార్జ్‌ దీపాదాస్ మున్షీ, ఉప ముఖ్యమంత్రి భట్టి విక్రమార్క, మంత్రులు, ఎంపీలు, ఎమ్మెల్యేలు, ఎమ్మెల్సీలు, ఏఐసీసీ కార్యదర్శులు, సీనియర్ నాయకులుసీనియర్ నేతలు పాల్గొంటారు.