MP Raghunandan Rao On CM Revanth : సీఎం రేవంత్ రెడ్డిపై బీజేపీ ఎంపీ రఘునందన్ రావు సంచలన వ్యాఖ్యలు చేశారు. ఎఫ్-1 రేస్ కార్లకు ఎలాంటి జీవో లేకుండా కేటీఆర్ చెబితే రూ.50 కోట్ల ఇచ్చామని హెచ్ఎండీఏ గ్రోత్ కమిషనర్ అర్వింద్ కుమార్ చెప్పి ఆరు నెలలవుతున్నా కేటీఆర్ను రేవంత్ రెడ్డి ఇప్పటివరకు ఎందుకు అరెస్టు చేయడం లేదని ప్రశ్నించారు. దీనిపై రేవంత్ రెడ్డి కేటీఆర్తో అమెరికాలో చీకటి ఒప్పందం చేసుకుంటున్నారేమో తెలంగాణ సమాజం ఆలోచించాలన్నారు. సంగారెడ్డిలో హర్ఘర్ తిరంగా ర్యాలీలో పాల్గొన్న ఆయన కాంగ్రెస్, బీఆర్ఎస్లపై పలు విమర్శలు గుప్పించారు.
బీఆర్ఎస్, కాంగ్రెస్లు తోడు దొంగలు : కాంగ్రెస్, బీఆర్ఎస్లు మొదటి నుంచి తోడుదొంగల పార్టీలు అని రఘనందన్రావు విమర్శించారు. ఈ రెండు పార్టీలు నాణేనికి బొమ్మబొరుసు లాంటివని అభివర్ణించారు. కాళేశ్వరం, మేడిగడ్డ, సుంకిశాల విషయంలో రెండు పార్టీలు ప్రెస్మీట్లతో సరిపెడుతున్నాయి తప్ప ఎలాంటి చర్యలు తీసుకోవడం లేదని ఆరోపించారు.
రేవంత్ పెద్దపెద్ద మాటలు మాట్లాడుతున్నారు : తప్పు చేసిన వాడు కొడుకైనా, కుమార్తైనా శిక్షించడానికి వెనుకాడనని ఆనాడు మాజీ సీఎం కేసీఆర్ అన్నారని కానీ ఆయన మనసు ఒప్పలేదని పేర్కొన్నారు. సీఎం రేవంత్ పెద్ద పెద్ద మాటలు మాట్లాడుతున్నారు తప్ప చేతల్లో ఏమీ చేయట్లేదని ఆరోపించారు. కాంగ్రెస్, బీఆర్ఎస్ల తీరు అత్త కొట్టింది కోడలు ఏడ్చింది అన్న చందంగా ఉందన్నారు.
సుంకిశాల కూలిపోయిన విషయంపై అసెంబ్లీలో చర్చించడానికి కాంగ్రెస్కి దమ్ము లేదని రఘనందన్ ఆరోపించారు. పాలకపక్షం నిద్రపోతే ప్రతిపక్ష బాధ్యత బీఆర్ఎస్ ఎందుకు తీసుకోలేదని ఆయన ప్రశ్నించారు. ఔటర్ రింగ్రోడ్డు వ్యవహారంలో రూ.1000కోట్లకు నోటీసులిచ్చిన హెచ్ఎండీఏ అధికారి అరవింద్ను ఎందుకు అరెస్టు చేయడం లేదని నిలదీశారు.
"అరవింద్ కుమార్ అనే ఓ హెచ్ఎండీఏ హైదరాబాద్ గ్రోత్ కారిడార్ లిమిటెడ్కు కమిషనర్గా చేసిన ఆయన ఎఫ్-1 రేసు కార్లకు ఎలాంటి జీఓలు లేకుండా కేటీఆర్ చెబితే తాను రూ.50 కోట్ల ఇచ్చానని చెప్పి ఆరు నెలలు అవుతుంది. కేటీఆర్ను ఇంకా అరెస్టు చేయకపోవడం చూస్తుంటే అతడితో రేవంత్ రెడ్డి అమెరికా పోయి చీకటి ఒప్పందాలు చేస్తున్నారనే అనుమానం కలుగుతుంది. ఏడున్నాడు అర్వింద్ కుమార్? అర్వింద్ కుమార్ను ఎందుకు అరెస్టు చేస్తలేరు?" - రఘునందన్ రావు, ఎంపీ
