KTR Meeting With Malkajgiri BRS Leaders : హైదరాబాద్‌లోని తెలంగాణ భవన్‌లో మల్కాజిగిరి లోక్‌సభ స్థానానికి సంబంధించి బీఆర్ఎస్ సన్నాహక సమావేశం జరిగింది. ఈ సమీక్షకు పార్టీ కార్య నిర్వాహక అధ్యక్షుడు కేటీఆర్, మాజీ మంత్రులు హరీశ్‌రావు, మల్లారెడ్డి సహా పార్లమెంటు నియోజకవర్గ ప్రజా ప్రతినిధులు, మాజీ ప్రజా ప్రతినిధులు హాజరయ్యారు. అసెంబ్లీ ఎన్నికల్లో ఓటమి, పార్లమెంటు ఎన్నికలపై నేతలు, కార్యకర్తల నుంచి నేతలు అభిప్రాయాలు స్వీకరించారు. ఈ సమావేశంలో మాట్లాడిన కేటీఆర్, శాసనసభ ఎన్నికల్లో దొంగ మాటలు చెప్పి కాంగ్రెస్ అధికారంలోకి వచ్చిందని విమర్శించారు.
200 యూనిట్లలోపు విద్యుత్ బిల్లులు జనవరి నుంచి కట్టొద్దని రేవంత్ రెడ్డి, నవంబర్ నుంచే కట్టొద్దని కోమటిరెడ్డి వెంకట్ రెడ్డి పిలుపునిచ్చారని కేటీఆర్ గుర్తు చేశారు. వారి మాటలనే తాను గుర్తు చేశానన్న కేటీఆర్, నిజాలు మాట్లాడితే ఉప ముఖ్యమంత్రి భట్టి విక్రమార్కకు విధ్వంసకర మనస్తత్వంగా కనిపిస్తుందా? అని కేటీఆర్ ప్రశ్నించారు. సోనియానే (Sonia Gandhi) బిల్లులు కడుతుందని కాంగ్రెస్ నేతలు చెప్పారని, బిల్లులు ఆవిడకే పంపుదామని అన్నారు.
KTR on Congress Leaders : నిరుద్యోగ భృతిపై కాంగ్రెస్ తప్పించుకున్నట్లే పాలమూరు-రంగారెడ్డికి జాతీయ హోదాపై మాట మార్చిందని కేటీఆర్ పేర్కొన్నారు. కాంగ్రెస్ హామీల నుంచి తప్పించుకుంటున్న తీరును ప్రజా కోర్టులోనే సాధికారికంగా ఎండగట్టాలని నేతలకు సూచించారు. ప్రగతి భవన్‌లో విలాసవంతమైన సౌకర్యాలు అంటూ దుష్ప్రచారం చేశారన్న కేటీఆర్, విలాసాలు ఉంటే అక్కడ ఉంటున్న భట్టి ఇప్పటికే టాంటాం చేయక పోయేవారా? అని ప్రశ్నించారు.
కారు కేవలం సర్వీసింగ్కు వెళ్లిందన్న కేటీఆర్, మళ్లీ రెట్టింపు వేగంతో పరుగెత్తుతుందని పునరుద్ఘాటించారు. మోదీకి (PM Modi), రేవంత్ రెడ్డికి భయపడే పార్టీ బీఆర్ఎస్ కాదన్న కేటీఆర్, దిల్లీలో తెలంగాణ గొంతుక వినబడాలంటే బీఆర్ఎస్ గెలవాలని పేర్కొన్నారు. కాంగ్రెస్, బీజేపీ కలిసి తెలంగాణ గొంతుక బీఆర్ఎస్ను ఖతం చేయాలని చూస్తున్నాయని ఆరోపించారు.
Harish Rao on Congress : పార్లమెంట్ ఎన్నికల కోడ్ (Election Code) బూచీ చూపి హామీల అమలు వాయిదా చేయాలని చూస్తోందన్న మాజీ మంత్రి హరీశ్ రావు, ఆ లోపే హామీలు నెరవేర్చాలని డిమాండ్ చేశారు. మార్చ్ 17తో కాంగ్రెస్ ప్రభుత్వానికి వంద రోజులు నిండుతాయన్న ఆయన, అప్పటికి పార్లమెంటు ఎన్నికల కోడ్ వస్తుందన్నారు. బీఆర్ఎస్కు విజయాలతో పాటు అపజయాలు ఉన్నాయని, గత అపజయాలకు కేసీఆర్ కుంగిపోతే తెలంగాణ వచ్చేదా? అని హరీశ్ రావు వ్యాఖ్యానించారు.
2009లో పది సీట్లే వచ్చాయి, ఇక పని అయిపోయిందని కేసీఆర్ ఊరుకుంటే తెలంగాణ వచ్చేదా? అని మాజీ మంత్రి హరీశ్ రావు అన్నారు. ఓటమి స్పీడ్ బ్రేకర్ మాత్రమే అన్న ఆయన, భవిష్యత్ లేదని కార్యకర్తలు కుంగిపోవద్దని చెప్పారు. సీఎం రేవంత్ ప్రాతినిథ్యం వహించిన మల్కాజిగిరి నియోజకవర్గంలో ఈసారి గెలిచి సత్తా చాటాలని పేర్కొన్నారు.
లోక్‌సభ ఎన్నికల్లో బీఆర్ఎస్కు ఓటేస్తే మూసీలో వేసినట్లే : కిషన్ రెడ్డి
హైదరాబాద్ బీఆర్ఎస్ నేతల్లో వర్గపోరు - ప్రాధాన్యం లేకుండా ఎన్నాళ్లు పనిచేయాలంటూ అసహనం
