మాయగాళ్ల మాటలు నమ్మి అభివృద్ధిని అడ్డుకోవద్దు: సీఎం రేవంత్‌రెడ్డి

వెనకబడిన మహబూబ్‌నగర్‌ జిల్లాను అభివృద్ధి చేస్తామంటే అడుగడుగునా అడ్డుకుంటున్నారు - జిల్లాను అభివృద్ధి చేయాలంటే భూ సేకరణ చేయాలా ? వద్దా ?

CM Revanth Speech in Rythu Panduga Meeting: మాయమాటలు నమ్మి అభివృద్ధిని అడ్డుకోవద్దని తెలంగాణ సీఎం రేవంత్‌రెడ్డి పిలుపునిచ్చారు. 70 ఏళ్ల తర్వాత వచ్చిన అవకాశాన్ని పోగొట్టుకోవద్దని విజ్ఞప్తి చేశారు. తెలంగాణలోని మహబూబ్‌నగర్‌లో ఏర్పాటు చేసిన రైతు పండుగ సభలో సీఎం రేవంత్ రెడ్డి మాట్లాడారు. ప్రభుత్వం రైతుల కోసం ఇప్పటి వరకు రూ.54 వేల కోట్లు ఖర్చు పెట్టిందని వివరించారు. రైతులను అన్ని విధాలుగా ఆదుకున్నది కాంగ్రెస్ ప్రభుత్వాలేనని సీఎం రేవంత్ అన్నారు.

నవంబరు 29కి ఎంతో ప్రత్యేకత ఉందని సరిగ్గా ఏడాది క్రితం ప్రజాప్రభుత్వం కోసం ఉత్సాహంగా ఓట్లు వేశారని సీఎం రేవంత్ అన్నారు. నిరంకుశ ప్రభుత్వాన్ని దింపి ప్రజాప్రభుత్వాన్ని గద్దనెక్కిచ్చారని కొనియాడారు. పాలమూరు జిల్లాలో కృష్ణా నది పారుతున్నా ప్రజల కష్టాలు తీరలేదని అన్నారు. ఉపాధి కోసం ఎన్నో కుటుంబాలు వలసలు పోతున్నాయని అన్నారు. బూర్గుల రామకృష్ణారావు తర్వాత మళ్లీ ఇన్నాళ్లకు పాలమూరు బిడ్డ సీఎం అయ్యారని వ్యాఖ్యానించారు.

మూడేళ్లు నిండకుండానే ప్రాజెక్టు కూలింది: గత ప్రభుత్వం రైతు రుణమాఫీని పూర్తి చేసిందా అని సీఎం ప్రశ్నించారు. వరి వేస్తే ఉరి వేసుకున్నట్లే అని గత సీఎం అనలేదా అని గుర్తు చేశారు. కానీ కాంగ్రెస్ ప్రభుత్వం వరి వేస్తే రైతులకు రూ.500 బోనస్‌ ఇచ్చిందని అన్నారు. గత ప్రభుత్వం రూ.1.02 లక్షల కోట్లు ఖర్చు పెట్టి కాళేశ్వరం కట్టింది కానీ మూడేళ్లు నిండకుండానే ఆ ప్రాజెక్టు కూలిందని ఆరోపించారు. ఈ ఏడాది తెలంగాణలో 1.50లక్షల మెట్రిక్‌ టన్నుల వరి పండిందని వివరించారు. గత ప్రభుత్వం వడ్డీతో సహా రూ.లక్ష రుణమాఫీ చేస్తామని చెప్పి మోసం చేసిందని కానీ ప్రజా ప్రభుత్వం వచ్చాక ఏడాదిలో 25 లక్షల రైతులకు రూ.21వేల కోట్ల రుణమాఫీ చేసిందని వెల్లడించారు. రైతులకు ఉచిత కరెంట్‌ ఇచ్చిన ఘనత కాంగ్రెస్‌దేనని గుర్తు చేశారు.

ప్రజల రుణం తీర్చుకుంటా: గతంలో ఎవరూ భూసేకరణ చేయలేదా? ప్రాజెక్టులు, పరిశ్రమలు నిర్మించలేదా? అని సీఎం రేవంత్ రెడ్డి ప్రశ్నించారు. నా సొంత జిల్లాలో పరిశ్రమలు ఏర్పాటు చేసి ప్రజలకు ఉపాధి కల్పించాలని భావించాను కానీ, మాయగాళ్ల మాటలు విని దీన్ని ప్రజలు అడ్డుకుంటున్నారని అన్నారు. మాయగాళ్ల మాటలు విని లగచర్ల ప్రజలు కేసుల్లో ఇరుక్కున్నారని తెలిపారు. జిల్లాను అభివృద్ధి చేయాలంటే భూ సేకరణ చేయాలా ? వద్దా ? అని అడిగారు. అధికారులను కొడితే శ్రీశైలం, నాగార్జునసాగర్‌ ప్రాజెక్టులు పూర్తయ్యేవా అని అన్నారు. కేసీఆర్‌, కేటీఆర్‌, హరీశ్‌రావు చెప్పే మాయమాటలు విని అభివృద్ధిని అడ్డుకోవద్దని సీఎం కోరారు.

ఇంటికో ఉద్యోగం వస్తే ఆ కుటుంబం తలరాత మారుతుందని అన్నారు. భూముల కోసం నష్టపరిహారం ఎక్కువ ఇచ్చేందుకైనా సిద్ధంగా ఉన్నామని, మళ్లీ ఇలాంటి పరిశ్రమలు ఏర్పాటు చేసేందుకు అవకాశం రాదని అన్నారు. కేసీఆర్‌కు గజ్వేల్‌లో 1000 ఎకరాల ఫామ్‌హౌస్‌ ఉందని కానీ పరిశ్రమల కోసం 1300 ఎకరాల భూమి సేకరించొద్దా అని ప్రశ్నించారు. పాలమూరు ప్రజలకు ఉద్యోగ, ఉపాధి కల్పించి పెండింగ్‌లో ఉన్న ప్రాజెక్టులన్నీ పూర్తి చేస్తామని సీఎం రేవంత్‌రెడ్డి అన్నారు.