CM Revanth Chit Chat Comments on KCR : రాష్ట్ర అవతరణ దశాబ్ది ఉత్సవాలను ప్రభుత్వం ఘనంగా నిర్వహిస్తుంటే కేసీఆర్ రాననడంపై ముఖ్యమంత్రి రేవంత్‌రెడ్డి తీవ్రస్థాయిలో మండిపడ్డారు. కేసీఆర్‌ను ఓ కమర్షియల్ వ్యాపారిగా పోల్చిన సీఎం, తెలంగాణను ఆయన వ్యాపార వస్తువులా మార్చి గత పదేళ్లపాటు లాభాలు పొందారని ఆరోపించారు. ఇంకా లాభాలు పొందాలని చూస్తున్నారని రేవంత్‌రెడ్డి విమర్శించారు.
కేసీఆర్‌కు ఇష్టం లేకనే రావడం లేదు : శనివారం సాయంత్రం తన నివాసంలో మీడియా ప్రతినిధులతో చిట్‌చాట్‌లో సీఎం రేవంత్‌రెడ్డి మాట్లాడారు. రాష్ట్ర అవతరణ దినోత్సవాలకు రమ్మని ఆహ్వానిస్తే రానంటున్న కేసీఆర్, అసెంబ్లీకి వస్తానంటే నమ్మేదెవరని ప్రశ్నించారు. తెలంగాణ ఆవిర్భావ వేడుకలకు ఒకరోజు ముందుగానే గన్‌పార్క్‌కు వెళ్లడానికి ఆయన ఎన్నికల సంఘం అనుమతి తీసుకున్నారా అని అడిగారు. ఒకరోజు ముందుగా అమరవీరుల స్థూపం వద్దకు వెళ్లడం ఎందుకన్న రేవంత్, పాకిస్థాన్‌ మాదిరిగా ఒకరోజు ముందుగానే ఉత్సవాలను చేసుకుంటున్నారని విమర్శించారు. అవతరణ వేడుకలంటే కేసీఆర్‌కు ఇష్టం, గౌరవం లేకనే రావడం లేదని చెప్పారు. ఇలా హాజరుకాని ప్రధానప్రతిపక్ష నాయకుడెవరైనా ఉంటారా అని? రేవంత్‌రెడ్డి అన్నారు.
తెలంగాణ గీతం రాసిన అందెశ్రీ ఎవరని అంటున్న మాజీ ముఖ్యమంత్రికి మానసిక స్థితి బాగా లేనట్టుందని రేవంత్‌రెడ్డి అనుమానం వ్యక్తంచేశారు. రాష్ట్ర గీతం తయారీ బాధ్యతంతా అందెశ్రీకే అప్పగించామని చెప్పారు. గీతం పాడిందెవరనే దానికి ప్రాధాన్యం లేదన్నారు. అధికారిక చిహ్నంపై మార్పులు చేయాలా వద్దా అనే అంశంపై బీఆర్ఎస్‌ తన అభిప్రాయం ప్రభుత్వానికి చెప్పకుండానే, ముందుగానే ఎందుకు ధర్నాలు చేసిందని ప్రశ్నించారు. వారి ఉద్దేశం ఏంటనేది కనీసం వినతిపత్రం కూడా ఇవ్వకుండా నిరసనలతో వారి అభిప్రాయం చెప్పిన తర్వాత ఇక వారిని సర్కార్‌ ఏం అడుగుతుందని రేవంత్‌రెడ్డి తెలిపారు.
ఆ నివేదికల ఆధారంగా తదుపరి చర్యలు : పార్లమెంటు ఎన్నికలు వంద రోజుల ప్రభుత్వ పరిపాలననే కొలమానంగా తీసుకుంటున్నానని రేవంత్‌రెడ్డి అన్నారు. తాను గతంలో చెప్పిన మాటలకు కట్టుబడి ఉన్నట్లు స్పష్టం చేశారు. మేడిగడ్డ విషయంలో కేసీఆర్ మాదిరి ఏలా పడితే ఆలా ముందుకు వెళ్లేది ఉండదని చెప్పారు. దీనిపై రెండు సంస్థలు విచారణ చేస్తున్నాయని, ఆ నివేదికల ఆధారంగా తదుపరి చర్యలు ఉంటాయని రేవంత్‌రెడ్డి వెల్లడించారు.
కేసీఆర్‌ను కాపాడాలని బీజేపీ చూస్తోంది : ఫోన్‌ ట్యాపింగ్‌ కేసులో కేసీఆర్‌ను కాపాడటానికే దానిని సీబీఐకి అప్పగించాలని బీజేపీ కోరుతోందని సీఎం రేవంత్‌రెడ్డి ఆరోపణలు చేశారు. కిషన్‌రెడ్డి గతంలో కేంద్ర హోంశాఖ సహాయ మంత్రిగా ఉన్నప్పుడే ఆయన తెలంగాణలో తన ఫోన్‌ ట్యాప్‌ అవుతోందని ఆరోపించారు. మరి అప్పుడు కిషన్‌రెడ్డి సీబీఐతో ఎందుకు విచారణ చేయించలేదని ప్రశ్నించారు. ఇప్పుడు కేంద్ర దర్యాప్తు సంస్థకు ఇస్తే కేసీఆర్‌ను లొంగదీసుకోవచ్చనేది కమలం పార్టీ ఉద్దేశమని అనుమానం వ్యక్తంచేశారు. ఈ కేసును విచారిస్తున్న రాష్ట్ర పోలీసు అధికారుల నైతిక స్థైర్యాన్ని ఎందుకు దెబ్బతీస్తున్నారని అన్నారు. ఎన్నికల కోడ్‌ కారణంగా తాను ఫోన్‌ ట్యాపింగ్‌ కేసుపై ఇంకా సమీక్ష చేయలేదని రేవంత్‌రెడ్డి వ్యాఖ్యానించారు.
ఆహ్వానించినట్లే ఆహ్వానించి అవమానించదలిచారు - కేసీఆర్ బహిరంగ లేఖ - KCR letters to CM Revanth
