'ఊర్జావీర్‌' ఇంటి నుంచే ఆదాయం - యువతకు ఇదో మార్గం: సీఎం చంద్రబాబు

కృష్ణా జిల్లాలో జరిగిన ఊర్జావీర్‌ కార్యక్రమంలో కేంద్ర విద్యుత్‌ శాఖ మంత్రి మనోహర్‌లాల్‌ ఖట్టర్‌తో పాటు కలిసి సీఎం చంద్రబాబు పాల్గొన్నారు.

CM Chandrababu Inaugurated Urjaveer Program: దేశ, రాష్ట్ర భవిష్యత్తు అంతా విద్యుత్​పైనే ఆధారపడి ఉందని, గృహోపకరణాల నుంచి వాహనాల వరకూ అన్నీ ఎలక్ట్రికల్‌గా మారబోతున్నాయని సీఎం చంద్రబాబు పేర్కొన్నారు. రాబోయే ఐదేళ్లలో రూ.10 లక్షల కోట్ల పెట్టుబడులు విద్యుత్​ రంగంలో రానున్నాయని తెలిపారు. 7.5 లక్షల మందికి ఉద్యోగాలు వస్తాయని వివరించారు. కేంద్ర విద్యుత్​ శాఖ, రాష్ట్ర ప్రభుత్వం, ఎనర్జీ ఎఫీషియన్సీ సర్వీసెస్‌ లిమిటెడ్‌ సంయుక్త ఆధ్వర్యంలో కృష్ణా జిల్లా పోరంకిలోని మురళీ రిసార్ట్స్‌లో నిర్వహించిన ఊర్జావీర్‌ కార్యక్రమం ప్రారంభోత్సవం జరిగింది. ఈ కార్యక్రమంలో కేంద్ర విద్యుత్​ శాఖ మంత్రి మనోహర్‌ లాల్‌ ఖట్టర్‌తో కలిసి సీఎం చంద్రబాబు పాల్గొన్నారు.

విద్యుత్​ను ఆదా చేయడం ద్వారా రాష్ట్ర ప్రగతికి బాటలు వేయొచ్చని, దానికోసమే ఊర్జావీర్‌ కార్యక్రమాన్ని అందుబాటులోనికి తీసుకొచ్చినట్టు సీఎం వెల్లడించారు. రాష్ట్రంలోని తలసరి విద్యుత్​ వినియోగం తలసరి ఆదాయానికి చిహ్నమని అన్నారు. దేశంలోనే తొలిసారిగా 1998 లోనే విద్యుత్​ రంగంలో సంస్కరణలకు నాంది పలికిన ఘనత మనకే దక్కిందని చెప్పారు. 2004 నాటికి విద్యుత్​ వినియోగంలో మనం పొదుపులో ఉన్నామని ఒక్క యూనిట్‌ను ఆదా చేస్తే 2 యూనిట్లను ఉత్పత్తి చేసినట్టేనని అన్నారు. కేవలం వారం వ్యవధిలోనే ఆన్‌లైన్‌లో ఊర్జావీర్‌ రిజిస్ట్రేషన్‌ను 12 వేల మంది చేసుకున్నారని, వీళ్లు వారి ఉద్యోగాలు చేసుకుంటూనే నెలకు 15 వేల వరకు అదనంగా సంపాదించుకోవచ్చని పేర్కొన్నారు.

రాష్ట్రంలోని 55,607 మంది అంగన్‌వాడీలకు ఇండక్షన్‌ స్టౌవ్‌లు, కుక్కర్లు, వంట సామగ్రిని అందజేసినట్టు సీఎం చంద్రబాబు వెల్లడించారు. 2 నెలల్లో మొత్తం అన్ని అంగన్‌వాడీ కేంద్రాలకూ వీటిని అందిస్తామని తెలిపారు. వీటిని వినియోగించడం వల్ల 30 శాతం విద్యుత్​ను ఆదా చేయొచ్చని అన్నారు. రాష్ట్రంలోని ప్రతి ఇళ్లు, పొలంలో సౌర విద్యుత్​ ప్యానెళ్లను ఏర్పాటు చేయాలని అప్పుడే శాశ్వతంగా విద్యుత్​ బిల్లులుండవని అన్నారు. రాష్ట్రంలో విద్యుత్​ రంగంలో పరిశోధనల కోసమే ప్రత్యేకంగా ఓ విశ్వవిద్యాలయం ఏర్పాటు చేయనున్నట్టు ముఖ్యమంత్రి చంద్రబాబు తెలిపారు. విద్యుత్​ వాహనాల వినియోగం గణనీయంగా పెరగబోతోందని అందుకే రాష్ట్రంలో ప్రతి 30 కిలోమీటర్లకు ఒక ఛార్జింగ్‌ స్టేషన్‌ చొప్పున కనీసం 5వేలకు పైగా పెట్టాలని నిర్ణయించామని తెలిపారు.

విద్యుత్​ రంగాన్ని గత ఐదేళ్లలో పూర్తిగా సంక్షోభంలోనికి నెట్టారు. విద్యుత్​ బిల్లులు విచ్చలవిడిగా పెంచేశారు. ప్రస్తుతం సమూలంగా ప్రక్షాళన చేసి గాడిలో పెడుతున్నాము. విద్యుత్​ ఛార్జీలు పెరగకుండా ఉండేందుకు ఉన్న అన్ని మార్గాలనూ అన్వేషిస్తున్నాము. గత ప్రభుత్వంలో జరిగిన పొరపాట్లు పునరావృతం కాకుండా చూడడంతో పాటు, ప్రజలపై బిల్లుల భారం లేకుండా చూస్తాము.- చంద్రబాబు, సీఎం

విద్యుత్​ వినియోగానికి సంబంధించిన కీలకమైన ఊర్జావీర్‌ కార్యక్రమంలో పాల్గొనడం ఆనందంగా ఉందని కేంద్ర విద్యుత్ శాఖ మంత్రి మనోహర్ లాల్ ఖట్టర్ తెలిపారు. మెరుగైన విద్యుత్​ ఉపకరణాలను అందించడమే కాకుండా లక్షల మందికి ఆర్థిక అవకాశాలను అందుబాటులోనికి తెస్తుందని అన్నారు. విద్యుత్​ బిల్లు భారం తగ్గించడంలో కీలకంగా ఉంటుందని కేంద్రమంత్రి అన్నారు. 2047 నాటికి అభివృద్ధి చెందిన దేశాల జాబితాలో భారత్‌ను చేర్చే లక్ష్యంతో సాగుతున్నామని ఊర్జావీర్‌ లాంటి కార్యక్రమాలు దీనికి దోహద పడతాయని వివరించారు. నవ ఆవిష్కరణలకు నాంది పలికే చంద్రబాబును నేను హర్యాణా ముఖ్యమంత్రిగా ఉన్నప్పటి నుంచి చూస్తున్నానని అన్నారు.