Chandrababu Pawan Kalyan Delhi Tour: బీజేపీతో పొత్తులపై చర్చించేందుకు తెలుగుదేశం అధినేత చంద్రబాబు (Chandrababu Naidu), జనసేన అధ్యక్షుడు పవన్ కల్యాణ్ (Pawan Kalyan) దిల్లీ చేరుకున్నారు. కేంద్ర హోం మంత్రి అమిత్‌షా (Amit Shah), బీజేపీ అధ్యక్షుడు నడ్డాతో చంద్రబాబు, పవన్ కల్యాణ్ సమావేశం అయ్యారు. ఈ సమావేశంలో పొత్తులపై చర్చలు కొలిక్కి వచ్చే అవకాశం ఉందని ఇరు పార్టీలు భావిస్తున్నాయి. బీజేపీతో (BJP) పొత్తుకి సంబంధించి చంద్రబాబు కొన్ని రోజుల క్రితం అమిత్‌షాతో భేటీ అయ్యారు. దానికి కొనసాగింపుగా ఇప్పుడు మరోసారి సమావేశం అయ్యారు.
బుధవారం చంద్రబాబుతో పవన్ కల్యాణ్ సమావేశమయ్యారు. ఉండవల్లిలోని చంద్రబాబు నాయుడు నివాసంలో సమావేశం జరిగింది. తెలుగుదేశం అధినేత చంద్రబాబు, జనసేన అధినేత పవన్ కల్యాణ్ వీలైనంత త్వరగా అభ్యర్థుల రెండో జాబితా ప్రకటించాలనే నిర్ణయానికి వచ్చారు. మలివిడత అభ్యర్థుల ఎంపికపై చంద్రబాబు - పవన్ కల్యాణ్ కీలక చర్చలు జరిపారు.
మరోవైపు టీడీపీ - జనసేన కూటమిలో (TDP - Janasena Alliance) బీజేపీ చేరే అంశంపై గత కొంతకాలంగా చర్చలు జరుగుతున్న విషయం తెలిసిందే. దీంతో బుధవారం జరిగిన సమావేశంలో దిల్లీ పరిణామాలపైనా ఇరువురు అధినేతలు మధ్య కీలక చర్చ జరిగింది. దాదాపు గంటన్నర పాటు చంద్రబాబుతో పవన్ కల్యాణ్ చర్చలు సాగాయి. ఈ నేపథ్యంలోనే నేడు చంద్రబాబు, పవన్ కల్యాణ్ దిల్లీ వెళ్తున్నారు.
మలి విడత అభ్యర్థుల ఎంపికపై టీడీపీ-జనసేన కసరత్తు - నేడు దిల్లీకి చంద్రబాబు
దిల్లీకి వెళ్లేందుకే చంద్రబాబు బుధవారం సాయంత్రమే అమరావతి నుంచి హైదరాబాద్ వెళ్లారు. అక్కడి నుంచి నేడు దిల్లీ బయల్దేరారు. సార్వత్రిక ఎన్నికలకు పొత్తులో భాగంగా చంద్రబాబు దిల్లీలో కీలక మంతనాలు జరపనున్నట్లు సమాచారం. పొత్తు అంశంతో పాటు దిల్లీ పరిణామాలపై జనసేనాని పవన్ కల్యాణ్ ఇప్పటికే సమావేశమై, చర్చించిన విషయం తెలిసిందే.
మలివిడత అభ్యర్థుల ఎంపికపైనా కొనసాగుతోన్న కసరత్తు: మరోవైపు మలివిడత అభ్యర్థుల ఎంపికపై టీడీపీ - జనసేన కూటమి కసరత్తు చేస్తోంది. మలివిడత అభ్యర్థుల ఎంపికపై ఇరువురు నేతలు ఇప్పటికే కీలక చర్చలు సైతం జరిపారు. ఇప్పటికే 99 మందితో తొలి జాబితాను టీడీపీ- జనసేన కూటమి ప్రకటించింది. బీజేపీ పొత్తు కలసి వస్తే, మిగిలిన స్థానాల్లో అభ్యర్దుల పేర్లను ప్రకటిస్తామని తొలి జాబితా విడుదల సందర్భంగా చంద్రబాబు తెలిపారు. దీంతో నేటి భేటీ అనంతరం పొత్తులపై క్లారిటీ వస్తే మలివిడత అభ్యర్థుల జాబితాను సైతం కొద్ది రోజుల్లోనే ప్రకటించే అవకాశం ఉంది.
