BJP Purandeswari Fire on YSRCP: వైఎస్సార్సీపీ తమ ఐదేళ్ల పాలనలో సాగించిన అరాచకాలపై ఆత్మపరిశీలన చేసుకోవాలని బీజేపీ రాష్ట్ర అధ్యక్షురాలు, రాజమహేంద్రవరం ఎంపీ దగ్గుబాటి పురందేశ్వరి అన్నారు. విజయవాడ బీజేపీ రాష్ట్ర కార్యాలయంలో రాయలసీమ ప్రాంతానికి చెందిన వివిధ పార్టీల నేతలు, కార్యకర్తలు సుమారు 200 మంది పురందేశ్వరి సమక్షంలో పార్టీలో చేరారు. వారికి పార్టీ కండువాలు కప్పి సాదరంగా ఆహ్వానించారు. ఈ సందర్భంగా మాట్లాడిన ఆమె.. అనంతపురం, ప్రకాశం, సత్యసాయి, కడప, చిత్తూరు జిల్లాలకు చెందిన ముఖ్యమైన నాయకులు పార్టీలో చేరడం ఆహ్వానించదగిన పరిణామంగా పేర్కొన్నారు.
ప్రధాని మోదీపై ప్రజలకు ఉన్న నమ్మకంతోనే ఎన్డీయేకి మూడోసారి విజయం ఇచ్చారని.. పేద, మధ్య తరగతి ప్రజల సంక్షేమం పార్టీకి ముఖ్యమని అన్నారు. సబ్ కా సాత్, సబ్ వికాస్ నినాదాన్ని కార్యాచరణలో పెడుతున్నామని చెప్పారు. ఐదేళ్ల వైఎస్సార్సీపీ పాలనలో ప్రజలు చాలా ఇబ్బంది పడ్డారని, స్థానిక సంస్థల ఎన్నికల్లో నెల్లూరులో బీజేపీ మహిళా నేతపై జరిగిన దాడి వంటి విషయాలు ప్రధానికి లేఖ రాసే ముందు వైఎస్సార్సీపీ నేతలకు గుర్తుకు రాలేదా? అని ప్రశ్నించారు. ఉత్తరాంధ్రలో కరోనా సమయంలో డాక్టర్ సుధాకర్‌ పట్ల అప్పటి ప్రభుత్వం వ్యవహరించిన తీరు ఎవరూ మరువలేనిదన్నారు. ప్రజాహిత పాలనను రాష్ట్రంలో చంద్రబాబు అందిస్తారని భావిస్తున్నామని పురందేశ్వరి అన్నారు.
జగన్ పాలనలో జరిగిన దారుణాలపై వైఎస్సార్సీపీ ఎప్పుడూ స్పందించలేదని, ప్రధానికి లేఖ రాయడం కాదు.. రాసిన వారు ఆత్మ పరిశీలన చేసుకోవాలని సూచించారు. రాష్ట్రానికి అన్ని విధాల కేంద్ర ప్రభుత్వం సహకారం అందించిందనడానికి మెడ్ టెక్ ఓ ఉదాహరణగా పేర్కొన్నారు. మాజీ మంత్రి పేర్ని నాని, పీసీసీ అధ్యక్షురాలు వైఎస్ షర్మిల పసలేని విమర్శలు చేస్తున్నారన్నారు. రాష్ట్ర వ్యాప్తంగా ఇటీవల జరుగుతున్న దాడులు చాలా హేయమైనవిగా అభిప్రాయపడ్డారు. సామాజిక మాధ్యమాల విషయంలో రాష్ట్ర ప్రభుత్వం ఒకసారి ఆలోచించాలని కోరారు. రాష్ట్ర వ్యాప్తంగా వర్షాలు కురుస్తున్నందున- విషజ్వరాలు ప్రబలకుండా అధికారులు తగిన చర్యలు తీసుకోవాలని పురందేశ్వరి విజ్ఞప్తి చేశారు.
