తెలుగు రాష్ట్రాల సీఎంలు విభజన సమస్యలు పరిష్కరించుకోవాలి : బీజేపీ ఎంపీ లక్ష్మణ్ - BJP MP Laxman said CMs Meeting

BJP MP Laxman Fires on Congress : కేంద్రం రెండు తెలుగు రాష్ట్రాల అభివృద్ధికి కట్టుబడి ఉందని బీజేపీ నేత లక్ష్మణ్​ తెలిపారు. గత ఎన్నికల్లో కాంగ్రెస్​ ఓటు బ్యాంకు రాజకీయాలు చేసిందని ఆరోపించారు. విభజన సమస్యలపై ఇద్దరు సీఎంలు పరిష్కార మార్గం చూపించాలని అన్నారు. హైదరాబాద్​లోని బీజేపీ ఆఫీసులో ఆయన మాట్లాడారు.

BJP MP Laxman Said to Telugu States CMs Meeting : రెండు రాష్ట్రాల ముఖ్యమంత్రులు విభజన సమస్యలను పరిష్కరించుకోవాలని బీజేపీ రాజ్యసభ సభ్యుడు లక్ష్మణ్​ తెలిపారు. కేంద్రం రెండు రాష్ట్రాల అభివృద్ధికి కట్టుబడి ఉందని అన్నారు. అలాగే తిరుపతి పవిత్రతను కాపాడాలని ఏపీ ముఖ్యమంత్రి చంద్రబాబుకి ఆయన బహిరంగ లేఖ రాశారు. హైదరాబాద్​లోని బీజేపీ రాష్ట్ర కార్యాలయంలో నిర్వహించిన శ్యామా ప్రసాద్​ ముఖర్జీ జయంతి వేడుకలకు ముఖ్య అతిథిగా హాజరైన లక్ష్మణ్, ఆయన చిత్రపటం వద్ద నివాళులు అర్పించారు.

అనంతరం బీజేపీ ఎంపీ లక్ష్మణ్ మాట్లాడుతూ, కాంగ్రెస్​ పార్టీ ఓటు బ్యాంకు రాజకీయాలకు పాల్పడిందని ఆరోపించారు. కాంగ్రెస్​ నెహ్రూ విధానాలను మరిచిపోయి ఈ ఎన్నికల్లో లబ్ధి పొందాలని చూసిందని విమర్శించారు. బీజేపీ ముస్లింలకు వ్యతిరేకమని కాంగ్రెస్​ పార్టీ విష ప్రచారం చేసిందని ధ్వజమెత్తారు. మతపరమైన రిజర్వేషన్లను మాత్రమే బీజేపీ వ్యతిరేకించిందని చెప్పుకొచ్చారు. రిజర్వేషన్లు రద్దు, రాజ్యాంగాన్ని మారుస్తారని కాంగ్రెస్​ పార్టీ తప్పుడు ప్రచారం చేసి లోక్​సభ ఎన్నికల్లో లబ్ధి పొందిందని చెప్పారు. కుల, మతాల మధ్య చిచ్చు పెట్టి భారతదేశం విచ్ఛిన్నానికి కాంగ్రెస్​ పాల్పడిందని లక్ష్మణ్​ తీవ్రస్థాయిలో ఆరోపించారు.

భారతదేశ సమగ్రత కోసం తన ప్రాణాలు సైతం అర్పించిన వ్యక్తి శ్యామా ప్రసాద్​ ముఖర్జీ అని బీజేపీ నేత లక్ష్మణ్ కొనియాడారు. భావితరాలకు, నేటి తరాలకు స్ఫూర్తిని కలిగించేలా శ్యామా ప్రసాద్​ ముఖర్జీ పేరుతో అనేక కార్యక్రమాలు నిర్వహించామని గుర్తుచేశారు. పశ్చిమ బంగాల్​ను తూర్పు పాకిస్థాన్​లో కలుపుతారనే కుట్రల నేపథ్యంలో ఎదురొడ్డి నిలుచున్న వ్యక్తి ఆయనే అని గర్వంగా చెప్పారు. ఆయన చొరవ వల్లే పశ్చిమ బెంగాల్​ భారతదేశంలోనే ఉండి సురక్షితంగా జీవించగల్గుతున్నారన్నారు. ఆయన త్యాగ ఫలితమే ప్రధాని నరేంద్ర మోదీ 370 ఆర్టికల్​ను రద్దు చేశారన్నారు. 370 ఆర్టికల్​ రద్దు తర్వాత నరేంద్ర మోదీ జమ్మూకశ్మీర్​ ప్రజలకు రిజర్వేషన్లు కల్పించారని తెలిపారు.మోదీ ప్రభుత్వం మహిళలకు 33 శాతం రిజర్వేషన్లు కల్పించిందని వివరించారు.

తిరుమల శ్రీవారిని దర్శించుకున్న ఎంపీ రఘునందన్​రావు : ఏపీలోని తిరుమల శ్రీవారిని బీజేపీ ఎంపీ రఘునందన్​రావు దర్శించుకున్నారు. ఉభయ రాష్ట్రాల ప్రజలకు ఆనందాన్నిచ్చేలా సీఎంలు భేటీ ఉండాలని అన్నారు. ఇద్దరు సీఎంల మధ్య సన్నిహిత సంబంధాలు ఉన్నాయని కావున అన్ని సమస్యలకు పరిష్కారం దిశగా సమావేశం జరపాలని ఎంపీ రఘునందన్​రావు కోరారు.