చాపింగ్​ బోర్డ్ అలాగే వదిలేస్తున్నారా? - ఇలా క్లీన్​ చేస్తే కొత్తదానిలా మారుతుంది!

చాపింగ్​ బోర్డు దుర్వాసన రాకుండా శుభ్రం చేయడం తప్పనిసరి - డీప్ క్లీన్ చేయాలంటున్న నిపుణులు

Tips to Clean Chopping Board : చాలా మంది మహిళలు వంటింట్లో కూరగాయలు కట్ చేయడం కోసం చాపింగ్‌ బోర్డు ఎక్కువగా ఉపయోగిస్తున్నారు. కాయగూరలు శుభ్రంగా కడిగి వాటిని చాపింగ్ బోర్డుపై ఉంచి చకచకా కట్​ చేస్తున్నారు. వెజిటబుల్స్​ తరిగిన తర్వాత ఎక్కువ మంది చాపింగ్ బోర్డ్​ ట్యాప్​ కింద ఉంచి పైపైన కడిగి పక్కన పెట్టేస్తుంటారు. ఆపై కూరగాయలు కట్​ చేయాల్సి వచ్చినప్పుడు మళ్లీ శుభ్రం చేస్తుంటారు. అయితే, ఇలా చాపింగ్ బోర్డు పైపైన శుభ్రం చేయడం వల్ల బ్యాక్టీరియా తయారై కొన్నిరోజులకు దుర్వాసన వస్తుంది. ఈ క్రమంలో చాపింగ్​ బోర్డు బ్యాడ్​స్మెల్​ రాకుండా డీప్​ క్లీన్​ చేయాలని నిపుణులు సూచిస్తున్నారు. ఆ చిట్కాలు మీ కోసం.

బేకింగ్​ సోడా :

సాధారణంగా బజ్జీలు, కేక్‌ల రుచిని పెంచడానికి బేకింగ్​ సోడా వంటింట్లో వాడుతుంటాం. ఈ వంటసోడాతో చాపింగ్​ బోర్డ్​ దుర్వాసనను కూడా తొలగించవచ్చు. ఇందుకోసం చాపింగ్​బోర్డుపై కొద్దిగా నీళ్లు చిలకరించండి. ఆపై బేకింగ్ సోడా చల్లి, నిమ్మచెక్కతో 5 నిమిషాల పాటు రుద్దండి. ఇప్పుడు చాపింగ్​ బోర్డ్​ 15 నిమిషాలు పక్కన ఉంచండి. అనంతరం నీటితో శుభ్రం చేస్తే సరిపోతుంది. చాపింగ్​ ఎలాంటి దుర్వాసన రాకుండా ఉంటుంది.

Baking Soda (ETV Bharat)

ఉప్పు :

మనం ఏ కూర వండినా సరిపడా ఉప్పు వేయకపోతే రుచి అంతగా ఉండదు. అయితే, ఉప్పుతో కూడా చాపింగ్​ బోర్డును డీప్​ క్లీన్​ చేయచ్చు. ఇందుకోసం చాపింగ్ బోర్డుపై నీళ్లు చల్లి కొద్దిగా ఉప్పు వేయండి. ఆపై నిమ్మ చెక్కతో కాసేపు రుద్దండి. తర్వాత ఓ పది నిమిషాలు చాపింగ్​ బోర్డుని పక్కన ఉంచి, గోరువెచ్చని నీటితో క్లీన్​ చేస్తే సరి!

White Vinegar (ETV Bharat)

వెనిగర్​ :

వంటల్లో, ఇంటి శుభ్రతలో వెనిగర్‌ వాడడం మనలో చాలా మందికి అలవాటే. వెనిగర్​తో చాపింగ్​ బోర్డుని కూడా శుభ్రం చేయవచ్చు. ఇందుకోసం చిన్న గిన్నెలో నీళ్లు తీసుకుని, కొద్దిగా వెనిగర్​ కలపండి. ఆపై మిశ్రమాన్ని చాపింగ్​ బోర్డుపై చల్లండి. ఒక 10 నిమిషాల తర్వాత మృదువైన స్క్రబ్బర్​తో రుద్దుతూ చాపింగ్​ బోర్డుని క్లీన్​ చేస్తే సరిపోతుంది.

మరికొన్ని చిట్కాలు :

• కూరగాయలు కట్​ చేసిన ప్రతిసారీ గోరువెచ్చని నీటితో చాపింగ్ బోర్డు శుభ్రం చేస్తే మంచిది. ఇలా వెంటనే కడగడం వల్ల మరకలు పడడం, దుర్వాసన రావడం వంటి సమస్యలు ఉండవు.
• అలాగే చాపింగ్​ బోర్డును క్లీన్ చేయడానికి మెటల్ స్క్రబ్బర్లను వాడకూడదని గుర్తుంచుకోండి.
• ఎందుకంటే ఇవి కటింగ్​ బోర్డు నాణ్యతను దెబ్బతీస్తాయి.
• చాపింగ్ బోర్డు బాగా ఆరబెట్టి తర్వాతే దాచుకోవాలని నిపుణులు సూచిస్తున్నారు.