How to Make Prawn Pickle in Telugu : చాలా మంది ఇష్టపడే సీ ఫుడ్ ఐటమ్స్లో ఒకటి.. రొయ్యలు. వీటితో నిల్వ పచ్చడి పెట్టుకుంటే రుచి ఎంతో అద్భుతంగా ఉంటుంది. మరి.. పక్కా ఈ పచ్చడి ఎలా ప్రిపేర్ చేసుకోవాలో ఇప్పుడు చూద్దాం.
మారినేషన్ కోసం :
- రొయ్యలు - అర కేజీ(పొట్టు తీసినవి)
- పసుపు - అర టీస్పూన్
- ఉప్పు - 1 టీస్పూన్
మసాలా పొడి కోసం :
- దాల్చిన చెక్క - 1
- లవంగాలు - 4
- యాలకులు - 2
- ధనియాలు - 1 టేబుల్ స్పూన్
పచ్చడి కోసం :
- నూనె - 150ఎంఎల్
- అల్లం వెల్లుల్లి పేస్ట్ - 2 టేబుల్స్పూన్లు
- ఉప్పు - తగినంత
- పసుపు - 1 టీస్పూన్
- కారం - 4 టేబుల్ స్పూన్లు
- నిమ్మకాయలు - 2
తయారీ విధానం :
- ఇందుకోసం ముందుగా మీడియం సైజ్లో ఉండే రొయ్యలను కిలో ఎంచుకోవాలి.
- వాటి పైపొట్టును తొలగించుకుంటే అవి అరకేజీ అవుతాయి. ఆపై వాటిని నాలుగైదు సార్లు శుభ్రంగా వాష్ చేసుకోవాలి.
- ఆ తర్వాత రొయ్యలకి పసుపు, ఒక టీస్పూన్ ఉప్పు పట్టించి ఒక 30 నిమిషాల పాటు పక్కన పెట్టేయాలి. ఇలా చేయడం ద్వారా రొయ్యలలో ఉండే నీచు వాసన పోతుంది.
- ఆ లోపు పచ్చడిలోకి కావాల్సిన మసాలా పొడిని ప్రిపేర్ చేసుకోవాలి. ఇందుకోసం.. స్టౌపై పాన్ పెట్టుకొని లో ఫ్లేమ్ మీద దాల్చిన చెక్క, యాలకులు, లవంగాలు, ధనియాలు వేసి అవి రంగు మారేంత వరకు వేయించుకోవాలి.
- అనంతరం అవి చల్లారాక మిక్సీ జార్లో వేసుకొని మెత్తని పౌడర్లా గ్రైండ్ చేసుకొని పక్కన పెట్టుకోవాలి.
- ఇప్పుడు స్టౌపై.. లోతుగా ఉండే కడాయి పెట్టుకొని ఆయిల్ వేసుకోవాలి. నూనె వేడెక్కాక.. అందులో ముందుగా మారినేట్ చేసి పక్కన పెట్టుకున్న రొయ్యలను వేసుకోవాలి. ఆపై మంటను మీడియం ఫ్లేమ్లో ఉంచి గరిటెతో కలుపుకుంటూ వాటిని ఫ్రై చేసుకోవాలి.
- ఇలా రొయ్యలను దాదాపు 15 నుంచి 20 నిమిషాల పాటు వేయించుకోవాలి. అంటే.. రొయ్యలనేవి గోల్డెన్ బ్రౌన్ కలర్లోకి రావాలి.
- పైన కొంచం క్రిస్పీగా అవ్వాలి. అంతవరకు వాటిని ఫ్రై చేసుకోవాలి. అప్పుడే పచ్చడి ఎక్కువ రోజులు నిల్వ ఉంటుందనే విషయాన్ని గుర్తుంచుకోవాలి.
- ఆ విధంగా ఫ్రై చేసుకున్నాక వాటిని ఒక ప్లేట్లోకి తీసుకొని పక్కన ఉంచుకోవాలి.
- ఇప్పుడు మంటను లో ఫ్లేమ్లోకి టర్న్ చేసుకొని అదే కళాయిలో ఫ్రెష్గా రుబ్బిపెట్టుకున్న అల్లంవెల్లుల్లి పేస్ట్ను వేసి 5 నిమిషాల పాటు బాగా ఫ్రై చేసుకోవాలి.
- అల్లం వెల్లుల్లి పేస్ట్ బాగా వేగి గోల్డెన్ కలర్లోకి వచ్చాక.. అందులో ఉప్పు వేసుకొని ఒక నిమిషం పాటు గరిటెతో అలా కదుపుతూ ఉండాలి.
- అనంతరం దానిలో పసుపు, కారం వేసుకొని ఒకసారి మిశ్రమం మొత్తాన్ని బాగా మిక్స్ చేసుకోవాలి.
- ఆ తర్వాత ముందుగా ప్రిపేర్ చేసుకున్న మసాలా పొడిని ఆ మిశ్రమంలో వేసి స్టౌ లో-ఫ్లేమ్లో ఉంచి ఒక నిమిషం పాటు గరిటెతో కలుపుతూ వేడి చేసుకోవాలి. లేదంటే.. పచ్చడి చేదు వస్తుందనే విషయాన్ని గుర్తుంచుకోవాలి.
- అప్పుడు స్టౌ ఆఫ్ చేసుకొని.. ఆ మిశ్రమంలో ముందుగా వేయించి పెట్టుకున్న రొయ్యలను వేసి బాగా కలుపుకోవాలి. ఆపై పాన్ను పక్కన పెట్టుకొని చల్లార్చుకోవాలి.
- ఆ మిశ్రమం పూర్తిగా చల్లారిందనుకున్నాక.. అందులో నిమ్మరసం పిండుకోవాలి. ఇక చివరగా ఓసారి ఉప్పు సరిపోయిందో లేదో చెక్ చేసుకొని దాన్ని గాలి చొరబడని కంటైనర్లో స్టోర్ చేసుకోవాలి. అంతే.. నోరూరించే "రొయ్యల నిల్వ పచ్చడి" రెడీ!
- ఈ పచ్చడి దాదాపు నెలన్నర నుంచి 2 నెలల పాటు నిల్వ ఉంటుంది! డౌట్ ఉన్నవాళ్లు దీన్ని ఫ్రిజ్లో కూడా స్టోర్ చేసుకోవచ్చు.
ఇవీ చదవండి :
ఆంధ్రా స్టైల్లో చికెన్ పచ్చడి - ఇలా ప్రిపేర్ చేశారంటే సూపర్ టేస్ట్!
"ఆంధ్ర స్టైల్ మటన్ మసాలా" కర్రీ - ఒక్కసారి ఇలా చేసి చూడండి! - టేస్ట్ అద్దిరిపోతుంది!
