పులావ్, బిర్యానీలోకి సూపర్ సైడ్ డిష్ "మఖానా రైతా" - అద్దిరిపోయే రుచితో చేసుకోండిలా!

-రెగ్యూలర్​ రైతాను మించిన సూపర్​ టేస్ట్​ -ఈ టిప్స్​ పాటిస్తే నిమిషాల్లో రెడీ

How to Make Makhana Raita Recipe: దసరా వేళ ఒక సూపర్ సైడ్ డిష్ తీసుకొచ్చాం. అదే.. "మఖానా రైతా". పండగ రోజు మీ ఇంట్లో బిర్యానీ, పులావ్ చేసుకుంటే అందులోకి సైడ్ డిష్​గా ఎప్పటిలా మజ్జిగ, చారు కాకుండా.. ఈ రైతాను ప్రిపేర్ చేసి ఇవ్వండి. తిన్న ఎవరైనా సరే ఎలా చేశావు.. సూపర్​గా ఉంది అని పొగడక మానరు. అంత రుచికరంగా ఉంటుంది ఈ రైతా! మరి, ఇంకెందుకు ఆలస్యం ఈ సూపర్ టేస్టీ మఖానా రైతా తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఈ స్టోరీలో తెలుసుకుందాం.

కావాల్సిన పదార్థాలు :

• నెయ్యి - అర టీస్పూన్
• ఫూల్ మఖానా(తామర గింజలు) - 1 పెద్ద కప్పు
• పెరుగు - 1 పెద్ద కప్పు
• సన్నని అల్లం తురుము - 1 టీస్పూన్
• ఉప్పు - రుచికి సరిపడా
• కొత్తిమీర తరుగు - కొద్దిగా
• పచ్చిమిర్చి - 2(సన్నగా తరుక్కోవాలి)
• మిరియాల పొడి - కొద్దిగా
• చాట్ మసాలా - చిటికెడు
• నూనె - 1 టేబుల్​స్పూన్
• ఆవాలు - అర టీస్పూన్
• ఎండుమిర్చి - 2
• జీలకర్ర - అర టీస్పూన్
• కరివేపాకు - 2 రెమ్మలు
• పసుపు - పావు చెంచా

తయారీ విధానం :

• ఇందుకోసం మందుగా స్టౌపై పాన్ పెట్టుకొని నెయ్యి వేసుకోవాలి. అది కరిగాక అందులో ఫూల్ మఖానాను వేసుకోవాలి. ఆపై స్టౌను లో ఫ్లేమ్​లో ఉంచి కలుపుతూ మఖానా పెళపెళమంటూ పేలిపోయే వరకు వేయించుకోవాలి.
• అలా వేయించుకునేటప్పుడే అందులో కాస్త ఉప్పు వేసుకోవాలి. మఖానా ఇంకా మంచిగా వేగుతాయి. అవి క్రిస్పీగా వేగిన తర్వాత పాన్​ని దింపి పూర్తిగా చల్లార్చుకోవాలి.
• ఇప్పుడు ఒక మిక్సింగ్ బౌల్​లో బాగా కూల్​గా ఉండే చిలికిన పెరుగును తీసుకొని అందులో.. సన్నని అల్లం తురుము, కొద్దిగా ఉప్పు, కొత్తిమీర, పచ్చిమిర్చి తరుగు, మిరియాల పొడి, చాట్ మసాలా వేసి అన్నీ కలిసేలా పెరుగును బాగా మిక్స్ చేసుకోవాలి.
• తర్వాత దాన్ని మరో పెద్ద బౌల్​లోకి ట్రాన్స్​ఫర్ చేసుకొని వేయించుకొని చల్లార్చుకున్న మఖానాను కూడా అందులో వేసి మరోసారి మిశ్రమాన్ని బాగా కలుపుకొని పక్కన పెట్టుకోవాలి.

• ఇప్పుడు స్టౌపై పాన్ పెట్టుకొని ఆయిల్ వేసుకోవాలి. నూనె వేడెక్కాక.. ముందుగా ఆవాలు, ఎండుమిర్చిని తుంపి వేసుకొని చిటపటలాడనివ్వాలి. ఆ తర్వాత జీలకర్ర, కరివేపాకు వేసుకొని వేయించుకోవాలి.
• తాలింపు వేగాక.. స్టౌ ఆఫ్ చేసుకొని పసుపు వేసుకొని కలుపుకోవాలి. ఇలా చేస్తే పసుపు మాడదు.
• ఆ తర్వాత ఈ తాలింపును ముందుగా ప్రిపేర్ చేసుకొని పెట్టుకున్న మఖానా మిశ్రమంలో వేసి కలుపుకోవాలి. అంతే.. ఎంతో రుచికరంగా ఉండే "మఖానా రైతా" రెడీ!
• ఇక దీన్ని గంటపాటు ఫ్రిజ్​లో ఉంచి తర్వాత వేడివేడి పులావ్, బిర్యానీలో వేసుకొని తింటుంటే ఆ టేస్ట్ అద్దిరిపోతుంది! అంతేకాదు.. ఈ రైతా ఆరోగ్యానికీ ఎంతో మేలు చేస్తుంది!