How to Make Kodiguddu Vellulli Kaaram : కోడి గుడ్డుతో ఎన్నో రకాల రెసిపీలు చేస్తుంటారు. అందులో దేనికదే ప్రత్యేకం. అలాంటి రెసిపీల్లో ఒకటి "కోడిగుడ్డు వెల్లుల్లి కారం". నిమిషాల్లోనే ప్రిపేర్ అయ్యే ఈ రెసిపీ అద్దిరిపోతుంది. నోరు చప్పగా ఉండి ఏది తినబుద్ధికానప్పుడు కూడా ఈ కర్రీ సూపర్బ్ అనేలా ఉంటుంది. నాలుకకు మంచి రుచి తలుగుతుంది! అంతేకాదు.. దీన్ని ప్రిపేర్ చేసుకోవడం కూడా చాలా ఈజీ. ఆ వివరాలు ఈ స్టోరీలో తెలుసుకుందాం.
కావాల్సిన పదార్థాలు :
- వెల్లుల్లిపాయ - 1(పెద్ద సైజ్లో ఉన్నది)
- జీలకర్ర - 1 టీస్పూన్
- మిరియాలు - అర టీస్పూన్
- లవంగాలు - 3
- యాలకులు - 2
- కారం - 2 టేబుల్ స్పూన్లు
- ఉప్పు - రుచికి తగినంత
కోడిగుడ్డు వెల్లుల్లి కారం కోసం :
- గుడ్లు - 6
- నూనె - 4 టేబుల్ స్పూన్లు
- ఆవాలు - అర టీస్పూన్
- జీలకర్ర - అర టీస్పూన్
- మినప పప్పు - అర టీస్పూన్
- ఎండుమిర్చి - 2
- పచ్చిమిర్చి - 2
- పసుపు - చిటికెడు
- కరివేపాకు - కొద్దిగా
తయారీ విధానం :
- ఇందుకోసం ముందుగా వెల్లుల్లి కారం ప్రిపేర్ చేసుకోవాలి. దానికోసం మొదటగా వెల్లుల్లిని పాయలుగా విడదీసుకొని పొట్టుతీసుకొని పక్కన ఉంచుకోవాలి.
- ఇప్పుడు మిక్సీ జార్ తీసుకొని అందులో జీలకర్ర, మిరియాలు, లవంగాలు, యాలకులు వేసుకొని కచ్చాపచ్చాగా గ్రైండ్ చేసుకోవాలి.
- ఆ తర్వాత అందులోనే పొట్టు తీసి పక్కన పెట్టుకున్న వెల్లుల్లి రెబ్బలు, కారం, ఉప్పు వేసుకొని మరో మిశ్రమాన్ని మిక్సీ పట్టుకోవాలి.
- ఇప్పుడు.. వెల్లుల్లి కారం రెడీ అవుతుంది. దాన్ని ఒక ప్లేట్లోకి తీసుకొని పక్కన ఉంచుకోవాలి.
- తర్వాత స్టౌపై.. పాన్ పెట్టుకొని ఆయిల్ వేసుకోవాలి. నూనె కొద్దిగా వేడెక్కాక.. ఆవాలు, జీలకర్ర, మినప పప్పు వేయించుకోవాలి. అవి వేగాక ఎండుమిర్చి, నిలువుగా కట్ చేసుకున్న పచ్చిమిర్చి ముక్కలు, కరివేపాకు వేసుకొని మరోసారి కాసేపు ఫ్రై చేసుకోవాలి.
- తాలింపు బాగా వేగిందనుకున్నాక.. గుడ్లను పగులకొట్టి అందులో పోసుకోవాలి.
- ఆపై పసుపు చల్లుకొని మంటను మీడియం ఫ్లేమ్లో ఉంచి మూతపెట్టి కలుపకుండా రెండు నిమిషాల పాటు ఉడికించుకోవాలి.
- తర్వాత గరిటెతో మరీ పొడిపొడి కాకుండా.. ఎగ్స్ మిశ్రమాన్ని కాస్త పెద్ద ముక్కలుగా ఉండేట్లు కట్ చేసుకొని మరోవైపు తిప్పేసుకోవాలి. ఆపై మరో నిమిషం పాటు ఫ్రై చేసుకోవాలి.
- ఇప్పుడు గుడ్డు మిశ్రమం బాగా వేగిందనుకున్నాక.. దాన్ని ఒక సైడ్కి అనుకొని ముందుగా ప్రిపేర్ చేసుకున్న వెల్లుల్లి కారం అందులో వేసుకోవాలి.
- వన్సైడ్లో కాసేపు వెల్లుల్లి కారాన్ని ఫ్రై చేసుకుని తర్వాత ఎగ్ మిశ్రమంలో కలిసేలా మొత్తాన్ని బాగా కలుపుకోవాలి.
- తర్వాత మంటను మీడియం ఫ్లేమ్లో ఉంచి మరో నాలుగు నిమిషాల సేపు వేయించుకోవాలి.
- అప్పుడు పచ్చివాసన పోయి మిశ్రమం బాగా ఫ్రై అవుతుంది. ఇక చివరగా కొద్దిగా ఉప్పు వేసుకొని కలిపి దింపేసుకుంటే చాలు. అంతే.. సూపర్ టేస్టీగా ఉండే "కోడిగుడ్డు వెల్లుల్లి కారం" రెడీ!
ఇవీ చదవండి :
ఎగ్ దోశ చేయడం ఇప్పుడు చాలా ఈజీ - ఈ టిప్స్ పాటించండి - టేస్ట్ ఎంజాయ్ చేయండి!
మీరు ఎప్పుడూ తినని "కోడిగుడ్డు చట్నీ" - మీ నోటికి ఎన్నడూ తగలని టేస్ట్! - ఈజీగా ఇలా ప్రిపేర్ చేయండి!
