How to Prepare Mutton Pulao Recipe in Pressure Cookee: మీకు మటన్ పులావ్ అంటే ఇష్టమా? కానీ వండాలంటే చాలా కష్టమని, పెద్ద ప్రక్రియ అని ఆలోచిస్తున్నారా? ఇప్పుడు చెప్పబోయే పద్ధతిలో చేస్తే బ్యాచిలర్స్తో పాటు వంట సరిగ్గా రాని వాళ్లు సైతం ఈ రెసిపీని చాలా ఈజీగా చేసుకుంటారు. మరి ఇంకెందుకు ఆలస్యం..? ఇందులోకి కావాల్సిన పదార్థాలు ఏంటి? తయారీ విధానం ఎలాగో ఇప్పుడు తెలుసుకుందాం.
కావాల్సిన పదార్ధాలు
- 4 టేబుల్ స్పూన్ల నూనె/నెయ్యి
- 2 ఇంచుల దాల్చిన చెక్క
- ఒక అనాస పువ్వు
- 6 లవంగాలు
- 6 యాలకలు
- ఒక టీ స్పూన్ షాజీరా
- ఒక నల్ల యాలక
- ఒక బిర్యానీ ఆకు
- ఒక కప్పు ఉల్లిపాయ ముక్కలు
- 6 పచ్చిమిరపకాయలు
- 1 టీ స్పూన్ గరం మసాలా
- రెండు చిటికెల పసుపు
- అర టీ స్పూన్ వేయించిన జీలకర్ర పొడి
- రుచికి సరిపడా ఉప్పు
- ఒకటిన్నర టేబుల్ స్పూన్ అల్లం వెల్లుల్లి పేస్ట్
- 2 టేబుల్ స్పూన్ల ఎండిన గులాబీ రేకులు/ రోజ్ వాటర్
- ఒకటిన్నర కప్పుల బాస్మతి బియ్యం
- 300 గ్రాముల లేత మటన్
తయారీ విధానం
- ముందుగా మటన్ను తీసుకుని శుభ్రంగా కడిగి అందులో రెండు టేబుల్ స్పూన్ల ఉప్పు వేసి రెండు గంటల పాటు నానబెట్టుకోవాలి.
- మరోవైపు బాస్మతి బియ్యాన్ని కూడా శుభ్రంగా కడిగి సుమారు గంటపాటు పక్కకు పెట్టుకోవాలి.
- ఇప్పుడు స్టౌ వెలిగించి ప్రెషర్ కుక్కర్లో నూనె పోసి అందులో బిర్యానీ ఆకు, అనాస పువ్వు, లవంగాలు, దాల్చిన చెక్క, నల్ల యాలక, యాలకలు, షాజీరా వేసి కాసేపు వేయించుకోవాలి.
- మసాలాలు వేగుతున్న సమయంలోనే ఉల్లిపాయ ముక్కలు వేసి ఎర్రగా వేయించుకుని.. ఆ తర్వాత పచ్చిమిరపకాయలు, అల్లం వెల్లులి పేస్ట్ వేసుకుని వేగనివ్వాలి.
- ఇప్పుడు మటన్ వేసి సుమారు 5 నిమిషాలు వేయించుకోవాలి. ఇందులోనే జీలకర్ర పొడి, ఉప్పు, గరం మసాలా, పసుపు వేసి మరో నిమిషం పాటు ఫ్రై చేయాలి.
- ఆ తర్వాత ఇందులో ఒకటిన్నర కప్పుల నీళ్లు పోసి మటన్ మెత్తగా అయ్యేవరకు ఉడికించుకోవాలి.
- మటన్ ఉడికిన తర్వాత అందులోనే మరో కప్పు నీరు, ఉప్పు, పుదీనా, కొత్తిమీర, నానబెట్టిన బాస్మతి బియ్యం, ఎండిన గులాబీ రేకులు వేసి కుక్కర్ మూత పెట్టి మీడియం ఫ్లేమ్పై ఒక విజిల్ వచ్చేవరకు చూడాలి.
- ఇప్పుడు స్టౌ ఆఫ్ చేసి సుమారు 20 నిమిషాల పాటు పక్కన పెట్టి ఆ తర్వాత అడుగు నుంచి ఒకసారి బాగా కలపాలి.
- అంతే ప్రెషర్ కుక్కర్లో టేస్టీ మటన్ పులావ్ రెడీ! దీనిని మిర్చీ కా సాలన్ ఇంకా పెరుగుతో సర్వ్ చేసుకుంటే అద్దిరిపోతుంది.
అసలు సిసలైన ఆంధ్రా స్టైల్ "నాటుకోడి వేపుడు" - ఈ పద్ధతిలో చేశారంటే తినేకొద్దీ తినాలనిపిస్తుంది!
తెలంగాణ పెళ్లిళ్ల స్పెషల్ "రెడ్ చికెన్" - ఈ పద్ధతిలో చేస్తే టేస్ట్ అదుర్స్!
