Godhuma Pindi Dosa Recipe in Telugu: మనలో చాలా మందికి దోశలు అంటే చాలా ఇష్టం. కానీ దోశల తయారీ విధానం చూసి కాస్త వెనుకడగు వేస్తుంటారు. ఎందుకంటే దోశలు చేసుకోవాలంటే ముందు రోజు నుంచి అన్నీ రెడీ చేసుకోవాల్సిందే. ఇక అలాంటి టెన్షన్ అక్కర్లేకుండా ఇన్స్టంట్గా దోశలు వేసుకోవచ్చు. అది కూడా ఎప్పుడు రొటీన్గా చేసేవి కాకుండా వెరైటీగా గోధుమ పిండి ఉల్లిదోశ చేసుకోవచ్చు. ఇంకా దీనిని చాలా సులభంగా చేసుకోవచ్చు. మరి ఇంకెందుకు ఆలస్యం ఇందులోకి కావాల్సిన పదార్థాలు ఏంటి? తయారీ విధానం ఎలాగో ఇప్పుడు తెలుసుకుందాం.
గోధుమపిండి దోశ తయారీకి కావాల్సిన పదార్థాలు:
- అర కప్పు గోధుమ పిండి
- ఒక చెంచా బియ్యం పిండి
- పావు కప్పు ఉల్లిపాయ ముక్కలు
- రుచికి సరిపడా ఉప్పు
- కొద్దిగా కొత్తిమీర
- ఒక చెంచా నూనె
- ఒక టీ స్పూన్ ఆవాలు
- ఒక టీ స్పూన్ జీలకర్ర
- ఒక టీ స్పూన్ శనగపప్పు
- ఒక కరివేపాకు రెమ్మ
- 4 పచ్చిమిరపకాయ ముక్కలు
- పావు కప్పు టమాటా ముక్కలు
- పావు టీ స్పూన్ అల్లం తురుము
- పావు చెంచా పసుపు
గోధుమపిండి దోశ తయారీ విధానం:
- ముందుగా స్టౌ ఆన్ చేసి ఒక కడాయిలో నూనె వేసుకొని వేడి చేసుకోవాలి.
- ఇప్పుడు అందులోనే ఆవాలు, జీలకర్ర, శనగపప్పు, కరివేపాకు వేసి కాసేపు వేగనివ్వాలి.
- ఆ తర్వాత సన్నగా తరిగిన ఉల్లిపాయ ముక్కలు కూడా వేసుకుని రంగు మారేదాకా మగ్గనివ్వాలి.
- అనంతరం అందులోనే పచ్చిమిర్చి, అల్లం తరుగు కూడా వేసి ఓ నిమిషం పాటు వేయించాలి.
- ఇప్పుడు టమాటా ముక్కలు కూడా వేసుకుని మూత పెట్టి మెత్తగా అయ్యేవరకు మగ్గనివ్వాలి. ఆ తర్వాత పసుపు వేసుకుని కలిపి స్టౌ ఆఫ్ చేసుకోవాలి.
- దోశ కోసం తాలింపు రెడీ అయినట్లే.
- మరోవైప ఓ పెద్ద గిన్నె తీసుకుని అందులో గోధుమపిండి, బియ్యం పిండి, ఉప్పు వేసుకుని ఒకసారి పొడిగానే బాగా కలపాలి.
- ఆ తర్వాత కొద్దికొద్దిగా నీళ్లు పోసుకుంటూ ఎలాంటి ఉండలు లేకుండా కలుపుతూ దోశ పిండిలాగా చేసుకోవాలి.
- ఇప్పుడు ఇందులోనే ముందుగా రెడీ చేసి పెట్టుకున్న తాళింపు మిశ్రమం, కొద్దిగా కొత్తిమీర తరుగు కూడా వేసుకుని బాగా కలపాలి.
- అంతే.. ఆ తర్వాత దోశలు వేసుకోవడమే. అయితే.. సాధారణ దోశల కన్నా కాస్త మందంగా పోసుకోవాలి.
- అంచుల వెంబడి నూనె వేసుకుంటూ రెండు వైపులా కాల్చుకోవాలి.
- దోశపై మూత పెట్టి నిమిషం ఉంచి తీస్తే దోశ త్వరగా బాగా ఉడుకుతుంది
- రెండు వైపులా రంగు మారేదాకా రెండు నిమిషాలు కాల్చుకుని తీసేస్తే క్రిస్పీ, టేస్టీ ఇన్స్టంట్ గోదుమపిండి ఉల్లిదోశ రెడీ.
- దీనిని ఏ చట్నీతోనైనా సర్వ్ చేసుకోవచ్చు. లేదా నేరుగా అలానే కూడా తినేయొచ్చు.
