Chilli Garlic Ghee Rice Preparation: చాలా మంది తల్లులు.. పిల్లల లంచ్ బాక్స్లోకి రోజూ రొటీన్ అన్నం పెడుతుంటారు. అన్నంతో పాటు ఏదో ఒక కర్రీ పెట్టి స్కూల్కు పంపిస్తుంటారు. ఫలితంగా రోజూ ఇలాంటి భోజనం తినడానికి చాలా మంది పిల్లలు అంతగా ఇష్టపడరు. అందుకే.. కొన్నిసార్లు అన్నం కొంచెం తిని పడేయడం లేదా బాక్స్ మొత్తం అలాగే ఇంటికి పట్టుకురావడం చేస్తుంటారు.
అందుకే.. పిల్లల లంచ్ బాక్స్లోకి ఎప్పుడూ రొటీన్గా కాకుండా వివిధ రకాల వెరైటీ రెసిపీలను పెడుతుండాలి. ఇలాంటి ఒక మంచి లంచ్ బాక్స్ రెసిపీని ఇప్పుడు పరిచయం చేయబోతున్నాం. అదే చిల్లీ గార్లిక్ ఘీ రైస్. ఒక్కసారి ఇలా చెప్పిన విధంగా చేశారంటే పిల్లలు ఒక్క మెతుకు కూడా మిగల్చకుండా బాక్స్ మొత్తం ఖాళీ చేసి వస్తారు. మరి, ఈ రెసిపీని ఎలా ప్రిపేర్ చేయాలో ఇప్పుడు చూసేద్దాం.
కావాల్సిన పదార్థాలు..
- ఒక కప్పు బాస్మతి బియ్యం
- 25 వెల్లుల్లి పాయలు
- 2 పచ్చిమిరపకాయలు
- 2 టేబుల్ స్పూన్ల నెయ్యి
- ఒక టేబుల్ స్పూన్ జీలకర్ర
- ఒక ఇంచు దాల్చిన చెక్క
- 2 లవంగాలు
- 2 బిర్యానీ ఆకులు
- 2 యాలకులు
- ఒక అనాస పువ్వు
- రెండు ఉల్లిపాయ ముక్కలు
- రుచికి సరిపడా ఉప్పు
- ఒక టేబుల్ స్పూన్ నెయ్యి
- 15 జీడిపప్పులు
తయారీ విధానం..
- ముందుగా బాస్మతి బియ్యాన్ని తీసుకుని బాగా కడగాలి.
- ఆ తర్వాత దానిలో మంచినీటిని పోసి సుమారు అరగంటపాటు నానబెట్టాలి.
- మరోవైపు పొట్టు తీసేసిన వెల్లుల్లి పాయలు, పచ్చిమిరపకాయలు మిక్సీలో వేసి గ్రైండ్ చేసుకొని పక్కకు పెట్టుకోవాలి.
- ఆ తర్వాత స్టౌ ఆన్ చేసి కుక్కర్లో నెయ్యి వేసి వేడి చేసుకోవాలి.
- అనంతరం జీలకర్ర, దాల్చిన చెక్క, లవంగాలు, బిర్యానీ ఆకులు, అనాస పువ్వు, యాలకులు వేసి కలుపుకోవాలి.
- ఇవన్నీ కాసేపు వేయించిన తర్వాత సన్నగా తరిగిన ఉల్లిపాయ ముక్కలు వేసి వేయించుకోవాలి.
- ఇవి ఎర్రగా వేగిన తర్వాత ముందుగా మిక్సీ పట్టుకున్న పచ్చిమిర్చీ- వెల్లుల్లి మిశ్రమాన్ని ఇందులో వేసి బాగా కలపాలి.
- అనంతరం ఇందులోనే ముందుగా నానబెట్టుకున్న బాస్మతి బియ్యాన్ని, ఉప్పును వేసి బాగా కలపాలి.
- ఆ తర్వాత ఒకటిన్నర కప్పుల నీటిని పోసి కలిపి మూత పెట్టుకోవాలి.
- హై-ఫ్లేమ్ పెట్టి కుక్కర్ ఒక విజిల్ వచ్చే వరకు ఉంచుకుని ఆ తర్వాత దించేసి మరోసారి బాగా కలపాలి.
- ఇప్పుడు మరో గిన్నెను స్టౌపై పెట్టుకుని అందులో నెయ్యి పోసి వేడి చేసుకోవాలి.
- ఆ తర్వాత అందులోనే జీడిపప్పు వేసి ఎర్రగా వేగనివ్వాలి.
- అనంతరం స్టౌ ఆఫ్ చేసి దానిని తీసుకువచ్చి బిర్యానీలో వేసి బాగా కలిపి స్టౌ ఆఫ్ చేసుకోవాలి.
- ఇంకా కాస్త కొత్తిమీర వేసి గార్నిష్ చేసుకుని సర్వ్ చేసుకుంటే టేస్టీ చిల్లీ గార్లిక్ ఘీ రైస్ రెడీ అయిపోతుంది.
