Pure Veg Bread Omelette Recipe : మనలో చాలా మందికి ఇష్టమైన స్నాక్స్లో బ్రెడ్ ఆమ్లెట్ ఒకటి. ఇంట్లో గుడ్లు, బ్రెడ్ ఉంటే చాలు క్షణాల్లో టేస్టీగా బ్రెడ్ ఆమ్లెట్ చేసుకుని తింటుంటాం. అయితే.. కొంతమంది ఎగ్ ముట్టుకోరు. ఇలాంటి వారు టేస్టీగా "ప్యూర్ వెజ్ బ్రెడ్ ఆమ్లెట్" రుచిని ఆస్వాదించవచ్చు. ఈ స్టోరీలో చెప్పిన విధంగా చేస్తే నిమిషాల్లోనే వేడివేడి కమ్మటి బ్రెడ్ ఆమ్లెట్ మీ ముందుంటుంది. వెజ్ బ్రెడ్ ఆమ్లెట్ ఎలా తయారు చేయాలో ఇప్పుడు చూద్దాం.
కావాల్సిన పదార్థాలు :
- శనగపిండి - ఒకటిన్నర కప్పు
- బ్రెడ్ స్లైసెస్ - 4 లేదా 5
- బియ్యం పిండి - 1/2 కప్పు
- చాట్ మసాలా - అర టీస్పూన్
- ఉప్పు - రుచికి సరిపడా
- మిరియాల పొడి - పావు టీస్పూన్
- బేకింగ్ పౌడర్ - టేబుల్ స్పూన్
- పసుపు - పావు టీస్పూన్
- టమాటా తరుగు - 3 టేబుల్స్పూన్లు
- ఉల్లిపాయ తరుగు - 2 టేబుల్స్పూన్లు
- పచ్చిమిర్చి తరుగు - 1 టేబుల్స్పూన్
- కొత్తిమీర తరుగు - 3 టేబుల్స్పూన్లు
- బటర్- తగినంత (మీరు నూనె కూడా వాడుకోవచ్చు)
తయారీ విధానం :
- ముందుగా ఒక మిక్సింగ్ బౌల్లో శనగపిండి, బియ్యం పిండి, చాట్ మసాలా వేసుకోవాలి.
- అలాగే రుచికి సరిపడా ఉప్పు, పసుపు, బేకింగ్ పౌడర్, మిరియాల పొడి వేసుకొని బాగా మిక్స్ చేసుకోవాలి. (ఈ రెసిపీకి బేకింగ్ పౌడర్ మాత్రమే ఉపయోగించాలి. బేకింగ్ సోడా కాదు)
- తర్వాత ఆ మిశ్రమంలో తగినన్ని నీళ్లు పోసుకుంటూ.. నాలుగు నిమిషాల పాటు బాగా బీట్ చేసుకోవాలి.
- ఆ విధంగా మిక్స్ చేసుకున్నాక.. అందులో టమాటా ముక్కలు, సన్నగా తరిగిన ఉల్లిపాయ, పచ్చిమిర్చి, కొత్తిమీర తరుగు వేసుకోవాలి. ఆపై మిశ్రమాన్ని బాగా మిక్స్ చేసుకోవాలి.
- తర్వాత ఆ మిశ్రమాన్ని 10 నిమిషాల పాటు మూతపెట్టి పక్కన ఉంచుకోవాలి.
- ఇప్పుడు స్టౌపై పాన్ పెట్టుకొని బటర్ కొద్దిగా వేసుకోవాలి.
- ఆపై ఒక శాండ్విచ్ బ్రెడ్ స్లైస్ ఉంచి బాగా కాల్చుకోవాలి. తర్వాత రెండోవైపు కూడా బ్రెడ్పై కొద్దిగా బటర్ వేసుకొని క్రిస్పీగా కాల్చుకోవాలి.
- ఇలానే మిగతా బ్రెడ్ స్లైస్లను కాల్చుకొని పక్కన పెట్టుకోవాలి.
- ఇప్పుడు మరోసారి స్టౌపై పాన్ పెట్టుకొని ఒక టీస్పూన్ బటర్ వేసుకోవాలి.
- ఆపై ముందుగా ప్రిపేర్ చేసి పెట్టుకున్న శనగపిండి మిశ్రమాన్ని కొద్దిగా పోసుకుని పాన్ మొత్తం సర్దుకోవాలి. (మరీ పల్చగా స్ప్రెడ్ చేయకుండా.. కొద్దిగా మందంగానే ఉండేలా చూసుకోవాలి.)
- ఆపై అంచుల వెంట అక్కడక్కడ కొద్దిగా బటర్ వేసుకొని స్టౌ మీడియం ఫ్లేమ్లో ఉంచి నిదానంగా రోస్ట్ చేసుకోవాలి.
- తర్వాత పిండి మధ్యలో కాస్త తడిగా ఉన్నప్పుడు.. ముందుగా కాల్చుకున్న ఒక బ్రెడ్ స్లైస్ను ఉంచి అంచులను 4 పక్కల లోపలికి ఫోల్డ్ చేసుకోవాలి.
- ఇప్పుడు రెండువైపులా కాస్త బటర్ వేసుకొని కాల్చుకోవాలి.
- ఇదేవిధంగా మిగతా పిండి, బ్రెడ్ స్లైస్లను కాల్చుకుంటే సరిపోతుంది.
- అంతే.. ఇలా చేస్తే ఎంతో టేస్టీగా ఉండే 'ప్యూర్ వెజ్ బ్రెడ్ ఆమ్లెట్' మీ ముందుంటుంది.
ఇవి కూడా చదవండి :
ఈవెనింగ్ స్నాక్స్గా "ఉల్లి వడలు" - ఇలా ప్రిపేర్ చేశారంటే పకోడిని మించిన టేస్ట్!
