How to Make Instant Soft Idli in Telugu : హెల్దీ బ్రేక్ఫాస్ట్ అంటే చాలా మందికి ఇడ్లీ గుర్తుకు వస్తుంది. ఎందుకంటే టేస్ట్తోపాటు తేలిగ్గా అరుగుతూ ఆరోగ్యానికి మేలు చేస్తుందనే ఉద్దేశంతో.. ఎక్కువ మంది దీనిని అల్పాహారంగా తింటుంటారు. అయితే.. వీటిని ఇంట్లో తయారు చేసుకోవాలంటే కాస్త ఎక్కువగా శ్రమించాల్సి ఉంటుంది. ఈ టిఫిన్ కోసం మినప పప్పు నానబెట్టుకొని.. రుబ్బుకోవాలి. అందులోకి రవ్వ కలిపి పులియబెట్టాలి. ఆ తర్వాత ఇడ్లీలు తయారు చేసుకోవాలి. ఇదంతా చాలా ప్రాసెస్ ఉంటుంది. అయితే.. ఈ ప్రాసెస్ లేకుండా.. పప్పు నానబెట్టే అవసరమే లేకుండా కేవలం నిమిషాల్లో ఎంతో మృదువైన, రుచికరమైన ఇడ్లీలు తయారు చేసుకోవచ్చు. మరి ఆ విధానం ఏంటో ఈ స్టోరీలో తెలుసుకుందాం..
కావాల్సిన పదార్థాలు:
- మందపాటి అటుకులు - 1 కప్పు
- పుల్లటి పెరుగు - ఒకటిన్నర కప్పు
- వంట సోడా - అర టీ స్పూన్
- బొంబాయి రవ్వ - 1 కప్పు
- నీరు - తగినన్ని
- ఉప్పు- రుచికి సరిపడా
తయారీ విధానం:
- ముందుగా ఓ గిన్నెలోకి అటుకులు తీసుకుని నీళ్లు పోసి శుభ్రంగా కడగాలి. ఆ తర్వాత అవి మునిగే వరకు నీళ్లు పోసి ఓ 30 నిమిషాలు నాననివ్వాలి.
- ఇప్పుడు మరో గిన్నెలోకి పుల్లటి పెరుగు, వంట సోడా వేసుకుని ఉండలు లేకుండా బాగా కలపాలి. బాగా విస్క్ చేసిన తర్వాత ఓ 5 నిమిషాలు పక్కకు పెట్టాలి. ఇలా చేయడం వల్ల పెరుగు పొంగుతుంది.
- ఇప్పుడు పొంగిన పెరుగులోకి బొంబాయి రవ్వ బాగా కలుపుకోవాలి. బాగా కలిపిన తర్వాత 30 నిమిషాలు పక్కకు పెట్టుకోవాలి.
- 30 నిమిషాల తర్వాత బాగా నానిన రవ్వ మిశ్రమాన్ని కలుపుకోవాలి. ఆ తర్వాత అంతకుముందు నానబెట్టుకున్న అటుకులను మిక్సీ జార్లో వేసుకుని అర కప్పు నీళ్లు పోసి మెత్తని పేస్ట్లాగా గ్రైండ్ చేసుకోవాలి.
టిఫెన్ సెంటర్ స్టైల్ "ఇడ్లీ కారం పొడి" - ఇలా తయారు చేస్తే ఎంతో కమ్మగా ఉంటుంది!
- ఈ పేస్ట్ను రవ్వ మిశ్రమంలో కలుపుకోవాలి. ఆ తర్వాత కొద్దికొద్దిగా నీళ్లు పోసుకుంటూ ఇడ్లీ పిండిని ఎలా కలుపుకుంటామో అంత జారుగా కలుపుకోవాలి. ఇక్కడే ఓ ట్రిక్ ఉంటుంది. రవ్వను, అటుకుల మిశ్రమాన్ని ఎంత ఎక్కువ సేపు కలిపితే ఇడ్లీలు అంత సాఫ్ట్గా వస్తాయి.
- ఆ తర్వాత అందులోకి రుచికి సరిపడా ఉప్పు వేసుకుని మరోసారి బాగా కలిపి పక్కకు పెట్టుకోవాలి.
- ఇప్పుడు స్టవ్ ఆన్ చేసి ఇడ్లీ పాత్ర పెట్టి సరిపడా నీళ్లు పోసుకుని వాటిని మరిగించుకోవాలి.
- ఈ లోపు ఇడ్లీ ప్లేట్లు తీసుకుని వాటి మీద పల్చటి తెల్లని వస్త్రాన్ని తడిపి వేయాలి. ఇలా చేస్తే ఇడ్లీ చేతికి అంటుకోకుండా బాగా వస్తాయి.
- ఇప్పుడు ఆ క్లాత్ మీద ప్రిపేర్ చేసుకున్న ఇడ్లీ మిశ్రమాన్ని వేసి క్లాత్ను క్లోజ్ చేయాలి.
- ఇప్పుడు ఆ ప్లేట్లను మరుగుతున్న ఇడ్లీ పాత్రలో పెట్టి మూత పెట్టి హై-ఫ్లేమ్ మీద 5 నిమిషాలు, లో-ఫ్లేమ్ మీద మరో 3 నిమిషాలు ఉంచి స్టవ్ ఆఫ్ చేయాలి. అయితే వెంటనే ఇడ్లీలు బయటికి తీయకుండా స్టవ్ ఆఫ్ చేసిన మూడు నిమిషాల తర్వాత తీసి సర్వ్ చేసుకోవాలి. ఇలా చేయడం వల్ల ఆ వేడికి ఇడ్లీలు మరింత సాఫ్ట్గా ఉడుకుతాయి.
- ఆ తర్వాత వాటిని తీసి ప్లేట్లోకి సర్వ్ చేసుకుని కారప్పొడి చల్లి పల్లీ చట్నీ, నెయ్యితో తింటే "నభూతో" అనాల్సిందే. అంత టేస్టీగా, పట్టుకుంటే విరిగిపోతాయేమో అనేంత మృదువుగా ఉంటాయి. ఓ సారి మీరు కూడా ఇంట్లో ట్రై చేయండి..
ఇడ్లీ/దోశ పిండి బాగా పులిసిపోయిందని పారేస్తున్నారా ? - ఇలా చేస్తే తాజాగా మారిపోతుంది!
ఇంట్లోనే ఘుమఘుమలాడే "ఉడిపి సాంబార్" - ఇడ్లీ, వడల్లోకి సూపర్ కాంబినేషన్ - ఇలా చేసేయండి!
