How To Make Green Chicken Curry : నాన్ వెజ్ ప్రియులు.. ఇంట్లో చికెన్ కర్రీ చేశారంటే ఎగిరి గంతేస్తారు. వారంలో కనీసం రెండుమూడు రోజులు చికెన్ తినేవారు చాలా మందే! అయితే.. ఇంట్లో ఎప్పుడూ ఒకేలా చికెన్ కర్రీ వండితే అంతగా టేస్ట్ దొరకదు. మీకు కూడా ఇలానే అనిపిస్తోందా ? అయితే.. హైదరాబాద్ స్టైల్లో అద్దిరిపోయే ఒక చికెన్ రెసిపీని మీకు పరిచయం చేయబోతున్నాం. అదే "గ్రీన్ చికెన్ కర్రీ". ఒక్కసారి ఈ కోడికూర తిన్నారంటే.. ఇంట్లో వాళ్లందరూ ఫిదా అయిపోతారు. అంత బాగుంటుంది దీని టేస్ట్. చాలా త్వరగా.. ఎంతో రుచికరంగా గ్రీన్ చికెన్ కర్రీని ఇంట్లో ఎలా వండాలో ఇప్పుడు చూద్దాం.
కావాల్సిన పదార్థాలు :
- చికెన్ - అరకిలో
- నూనె- 3 టేబుల్స్పూన్లు
- పెరుగు -పావు కప్పు
- పసుపు -టీస్పూన్
- అల్లం ముక్కలు - 2
- వెల్లుల్లి రెబ్బలు-10
- జీడిపప్పులు-10
- మిరియాల పొడి- అరటీస్పూన్
- గరంమసాలా-అరటీస్పూన్
- కారం - టీ స్పూన్
- కొత్తిమీర- కప్పు
- పుదీనా- కప్పు
- నిమ్మరసం- కొద్దిగా
- పచ్చిమిర్చిలు- 12
- ఉల్లిపాయలు-2
- దాల్చిన చెక్క- చిన్నది
- బిర్యానీ ఆకు-1
- యాలకులు-4
- లవంగాలు-3
- ఉప్పు-రుచికి సరిపడా
తయారీ విధానం :
- ముందుగా చికెన్ బాగా శుభ్రం చేసుకుని పక్కన పెట్టుకోవాలి.
- ఇప్పుడు మిక్సీ జార్లోకి అల్లం ముక్కలు, వెల్లుల్లి రెబ్బలు, పచ్చిమిర్చిలు, కొత్తిమీర, పుదీనా, పెరుగు, జీడిపప్పులు వేసి మెత్తగా గ్రైండ్ చేసుకోవాలి. అవసరమైతే మీరు కొన్ని నీళ్లు కూడా పోసుకోవచ్చు.
- గ్రైండ్ చేసుకున్న మిశ్రమాన్ని చికెన్ గిన్నెలో వేసి బాగా మిక్స్ చేయాలి. ఇందులో కొద్దిగా నిమ్మరసం, పసుపు, ఉప్పు వేసుకుని మరొసారి కలుపుకోవాలి. దీనిని ఒక 20 నిమిషాలు పక్కన పెట్టుకోవాలి.
- ఇప్పుడు స్టౌపై పాన్ పెట్టి ఆయిల్ వేయాలి. ఇందులోకి బిర్యానీ ఆకు, లవంగాలు, యాలకులు, షాజీరా వేసుకుని కలుపుకోవాలి. తర్వాత ఉల్లిపాయ ముక్కలు వేసే రంగు మారేదాకా ఫ్రై చేసుకోవాలి.
- తర్వాత మారినేట్ చేసుకున్ని చికెన్ వేసి రెండు నిమిషాలు ఉడికించుకోవాలి. ఇప్పుడు గరంమసాలా, మిరియాల పొడి, కొన్ని నీళ్లు వేసుకుని కలుపుకోవాలి.
- కొద్దిసేపటి తర్వాత మీ రుచికి సరిపడా విధంగా ఉప్పు వేసుకుని, కొద్దిగా కారం వేసుకుని మూత పెట్టాలి.
- సన్నని మంటమీద చికెన్ బాగా ఉడికించుకోవాలి. చివర్లో కొద్దిగా కొత్తిమీర చల్లుకుని చికెన్ సర్వ్ చేసుకుంటే టేస్ట్ అద్దిరిపోతుంది.
- ఈ గ్రీన్ చికెన్ కర్రీ వేడివేడి అన్నంలోకి, చపాతీల్లోకి సూపర్ టేస్టీగా ఉంటుంది.
- నచ్చితే మీరు కూడా కాస్త కొత్తగా ఈ గ్రీన్ చికెన్ కర్రీ చేసేయండి!
ఇవి కూడా చదవండి :
"అమృత్ సరి" చికెన్ రెసిపీ - ఈ పంజాబీ స్టైల్ కర్రీ తిన్నారంటే "భల్లే భల్లే" అనాల్సిందే!
ఘాటు తక్కువ, ఘుమాయింపు ఎక్కువ - "రెస్టారెంట్ స్టైల్ బటర్ చికెన్" - ఇలా ఈజీగా ప్రిపేర్ చేసుకోండి!
