ఘాటైన "వెల్లుల్లి రసం" - వేడివేడి అన్నంతో తింటే జలుబు, పొడిదగ్గు నుంచి రిలీఫ్​!

సూపర్ టేస్టీ వెల్లుల్లి రసం - ఇలా చేస్తే నిమిషాల్లోనే మీ ముందు!

How To Make Garlic Rasam at Home : వాతావరణ మార్పుల కారణంగా ఇటీవల చాలా మంది పొడి దగ్గు, జలుబు వంటి పలు రకాల అనారోగ్య సమస్యలతో ఇబ్బంది పడుతున్నారు. ఇలాంటి సందర్భాల్లో వేడివేడి అన్నంలో ఘాటుగా ఉండే "వెల్లుల్లి రసం"తో తింటే కాస్త ఉపశమనం లభిస్తుంది! అయితే, కొందరికి ఈ రసం చేయడం రాదు. అలాంటి వారు ఒక్కసారి ఈ స్టోరీలో చెప్పిన విధంగా రసం ట్రై చేయండి. రుచి చాలా బాగుంటుంది. మరి సూపర్​ టేస్టీ వెల్లుల్లి రసం తయారీకి కావాల్సిన పదార్థాలు, ప్రిపరేషన్​ ఇప్పుడు చూద్దాం.

కావాల్సిన పదార్థాలు:

• జీలకర్ర - 1 టీ స్పూన్​
• మిరియాలు - 1 టీ స్పూన్​
• వెల్లుల్లి రెబ్బలు - 25
• నూనె - ఒకటిన్నర టీ స్పూన్​
• పచ్చిమిర్చి - 3
• కరివేపాకు రెమ్మలు - 2
• కొత్తిమీర తరుగు - కొద్దిగా
• టమాటా - 1
• చింతపండు - నిమ్మగాయ సైజంతా
• పసుపు - అర టీ స్పూన్​
• ఉప్పు - రుచికి సరిపడా
• నీళ్లు - సరిపడా
• తాలింపు కోసం :
• నూనె - 1 టేబుల్​ స్పూన్​
• ఆవాలు - టీ స్పూన్​
• జీలకర్ర - అర టీ స్పూన్​
• ఎండుమిర్చి - 4
• కరివేపాకు - 2 రెబ్బలు
• దంచిన వెల్లుల్లి రెబ్బలు - 4
• ఇంగువ - చిటికెడు

తయారీ విధానం :

• ముందుగా చింతపండు నీటిలో 10 నిమిషాలు నానబెట్టి రసం సిద్ధం చేసుకోవాలి.
• అలాగే వెల్లుల్లి రెబ్బలను పొట్టు తీసి పక్కన ఉంచాలి. టమాటా, పచ్చిమిర్చి సన్నగా కట్​ చేసి ఒక ప్లేట్లోకి తీసుకోవాలి.
• ఇప్పుడు జీలకర్ర, మిరియాలను రోట్లో వేసి కచ్చాపచ్చాగా దంచాలి. ఆపై అందులోనే పొట్టు తీసిన వెల్లుల్లి రెబ్బలు వేసి మరోసారి కచ్చాపచ్చగా దంచి ఓ గిన్నెలోకి తీసుకోండి.
• రసం చేయడం కోసం స్టవ్​ గిన్నె పెట్టండి. ఇందులో నూనె పోసి అది​ హీటెక్కిన తర్వాత పచ్చిమిర్చి చీలికలు, కాడలతో సహా కరివేపాకు వేసి కొద్దిసేపు ఫ్రై చేయాలి.
• ఆపై దంచిన వెల్లుల్లి మిశ్రమాన్ని వేసి లైట్​ గోల్డెన్​ బ్రౌన్​ కలర్​ వచ్చే వరకు మగ్గించుకోవాలి.
• వెల్లుల్లి వేగిన తర్వాత టమాటా ముక్కలు వేసి ఫ్రై చేసుకోవాలి. ఇప్పుడు చింతపండు రసం పోసి ఓ పొంగు వచ్చే వరకు ఉడికించుకోవాలి.
• అనంతరం పసుపు, రుచికి సరిపడా ఉప్పు వేసి కొద్దిసేపు మగ్గించాలి.
• ఇప్పుడు రసంలో సరిపడా నీళ్లు పోసి మూత పెట్టి మీడియం ఫ్లేమ్​ మీద ఓ 15 నిమిషాలు మరిగించుకోవాలి. అనంతరం కాస్త కొత్తిమీర తరుగు వేసి గిన్నె పక్కన పెట్టండి
• ఇప్పుడు తాలింపు కోసం స్టవ్​ పై పాన్​ పెట్టి నూనె వేసుకోవాలి. ఆయిల్​ వేడయ్యాక ఆవాలు, జీలకర్ర వేసి వేయించుకోవాలి.
• అలాగే ఎండుమిర్చి, కరివేపాకు, దంచిన వెల్లుల్లి రెబ్బలు, ఇంగువ వేసి వేయించుకోవాలి.
• తాలింపు దోరగా వేగిన తర్వాత వేడివేడి రసంలో పోసుకుని కలుపుకోవాలి. అంతే ఇలా సింపుల్​గా చేసుకుంటే ఘుమఘుమలాడే ఘాటైన వెల్లుల్లి రసం మీ ముందుంటుంది.
• ఈ వెల్లుల్లి రసం మీకు నచ్చితే ఓ సారి తప్పక ట్రై చేయండి.