Egg Double Masala Dum Biryani in Rice Cooker: బిర్యానీ తయారు చేయాలంటే.. అది చాలా పెద్ద ప్రాసెస్. కానీ.. చాయ్ పెట్టినంత సులువుగా ఎగ్ దమ్ బిర్యానీ తయారు చేసేయొచ్చు. రైస్ కుక్కర్ ద్వారా ఈజీగా ఫినిష్ చేసేయొచ్చు. ఈ బిర్యానీ తిన్నారంటే వారెవ్వా అనాల్సిందే. మరి దీనికి కావాల్సిన పదార్థాలు, తయారీ విధానం ఈ స్టోరీలో చూద్దాం..
కావాల్సిన పదార్థాలు:
మసాలా కోసం:
- ఉప్పు - సరిపడా
- పసుపు - పావు టీ స్పూన్
- ధనియాల పొడి - 1 టీ స్పూన్
- జీలకర్ర పొడి - అర టీ స్పూన్
- గరం మసాలా - 1 టీ స్పూన్
- కసూరి మేతీ - 1 టీ స్పూన్
- కారం - 1 టేబుల్ స్పూన్
- నూనె - 3 టేబుల్ స్పూన్లు
- అల్లం వెల్లుల్లి పేస్ట్ - 2 టీ స్పూన్లు
- ఫ్రైడ్ ఆనియన్స్ - కప్పు
- కొత్తిమీర, పుదీనా తరుగు - కొద్దిగా
- పెరుగు - 1 కప్పు
బిర్యానీ కోసం :
- ఉప్పు - 1 టేబుల్ స్పూన్
- దాల్చిన చెక్క - 1 ఇంచ్
- లవంగాలు - 5
- యాలకులు - 3
- షాజీరా - అర టీ స్పూన్
- మరాఠీ మొగ్గ - 1
- అనాస పువ్వు - 1
- జాపత్రి - కొద్దిగా
- నూనె - 2 టేబుల్ స్పూన్లు
- నిమ్మరసం - 2 టీ స్పూన్లు
- ఉడికించిన కోడి గుడ్లు - 6
- బాస్మతి బియ్యం - అర కేజీ
- పచ్చిమిర్చి చీలికలు - కొన్ని
- నెయ్యి - 2 టేబుల్ స్పూన్లు
- ఫుడ్ కలర్ - చిటికెడు
తయారీ విధానం:
- ముందుగా రైస్ కుక్కర్లో కుక్కర్ గిన్నె పెట్టి రెండు లీటర్ల నీరు పోసి మరిగించుకోవాలి. అలాగే బాస్మతీ బియ్యాన్ని శుభ్రంగా కడిగి నానబెట్టుకోవాలి. కుక్కర్లోనే ఫ్రైడ్ ఆనియన్స్ రెడీ చేసుకోవాలి. లేదంటే సూపర్ మార్కెట్స్లో ఫ్రైడ్ ఆనియన్స్ అందుబాటులో ఉంటాయి. వాటిని తీసుకోవచ్చు. అలాగే పుదీనా, కొత్తిమీరను సన్నగా కట్ చేసుకోవాలి. కోడిగుడ్లను ఉడికించి పొట్టు తీసి కొద్దిగా గాట్లు పెట్టి పక్కకు పెట్టుకోవాలి.
- ఇప్పుడు మసాలా సిద్ధం చేసుకోవాలి. అందుకోసం ముందుగా ఓ గిన్నె తీసుకుని అందులోకి ఉప్పు, పసుపు, ధనియాల పొడి, జీలకర్ర పొడి, గరం మసాలా, కసూరి మేతి, కారం, నూనె వేసుకుని కలుపుకోవాలి. ఆ తర్వాత అందులోకి అల్లం వెల్లుల్లి పేస్ట్, కొన్ని ఫ్రైడ్ ఆనియన్స్, కొద్దిగా పుదీనా, కొత్తిమీర తరుగు, పెరుగు వేసుకుని మొత్తం కలుపుకుని పక్కకు పెట్టుకోండి.
- రైస్ కుక్కర్లోని నీరు మరుగుతున్నప్పుడు ఉప్పు, దాల్చిన చెక్క, లవంగాలు, యాలకులు, షాజీరా, మరాఠీ మొగ్గ, అనాస పువ్వు, జాపత్రి, నూనె, నిమ్మరసం, నానబెట్టుకున్న బాస్మతీ బియ్యం వేసి కలిపి మూత పెట్టి 70 శాతం ఉడికించాలి.
- ఇప్పుడు మరో రైస్ కుక్కర్ గిన్నె తీసుకుని.. అందులో 70 శాతం ఉడికిన అన్నాన్ని కొద్దిగా జల్లెడ సాయంతో తీసుకుని ఒక లేయర్గా వేసుకోవాలి. ఆపై ఉడికించిన కోడి గుడ్లు పెట్టి ముందే ప్రిపేర్ చేసుకున్న మసాలా వేసుకోవాలి. ఆ తర్వాత కొన్ని పచ్చిమిర్చి చీలికలు, ఫ్రైడ్ ఆనియన్స్, పుదీనా, కొత్తిమీర తరుగు, కొద్దిగా నిమ్మరసం వేసుకోవాలి. ఆపైన మిగిలిన అన్నాన్ని వేసుకోవాలి. ఆ తర్వాత రైస్ ఉడికించిన నీళ్లు కొద్దిగా(సుమారు 100ml), ఫ్రైడ్ ఆనియన్స్, పుదీనా, కొత్తిమీర, నెయ్యి, ఫుడ్ కలర్ వేసుకోవాలి.
- ఆ తర్వాత మూత పెట్టి గిన్నెను రైస్ కుక్కర్లో పెట్టి ట్రిప్ అయ్యే వరకు ఉడికించుకోవాలి.
- 15 నిమిషాల తర్వాత తీసి సర్వ్ చేసుకుంటే టేస్టీ అండ్ యమ్మీగా ఉండే ఎగ్ డబుల్ మసాలా దమ్ బిర్యానీ రెడీ. దీన్ని వేడి వేడిగా తింటే సూపర్గా ఉంటుంది. మరి మీరూ ట్రై చేస్తారా..!
ఇవీ చదవండి:
సండే స్పెషల్ - నోరూరించే ప్రాన్స్ బిర్యానీ! ఇలా చేశారంటే మళ్లీ మళ్లీ తినడం పక్కా!
సండే స్పెషల్ - టేస్టీ "రాజుగారి కోడి పులావ్" - ఇలా చేస్తే ఆహా అనాల్సిందే!
