దివాళీకి జీడిపప్పు కొంటున్నారా? - నకిలీని ఇలా గుర్తుపట్టండి బాస్​!

-మార్కెట్లో నకిలీ జీడిపప్పు హల్​చల్​ -డిమాండ్​ని సొమ్ము చేసుకుంటున్న వ్యాపారులు

How To Identify Fake Cashews : వెలుగుల పండగ దీపావళి కోసం అందరూ ఎంతగానో ఎదురు చూస్తున్నారు. దేశవ్యాప్తంగా ఈ పండగను చిన్న పిల్లల నుంచి పెద్దల వరకు అందరూ ఎంతో సంతోషంగా జరుపుకుంటారు. ఈ క్రమంలోనే చాలా మంది పండగ సందర్భంగా తమకు ఇష్టమైన వారికి డ్రై ఫ్రూట్స్​ గిఫ్ట్​గా అందించి శుభాకాంక్షలు తెలియజేస్తుంటారు. అయితే, డ్రై ఫ్రూట్స్​లో అందరూ ఇష్టంగా తినేది జీడిపప్పు. వీటికి మార్కెట్లో డిమాండ్​ అధికంగా ఉంటుంది. దీనిని అవకాశంగా తీసుకుని కొందరు వ్యాపారులు నకిలీ జీడిపప్పు అమ్ముతున్నారు. అయితే, మార్కెట్లో నకిలీ జీడిపప్పును గుర్తించడానికి నిపుణులు కొన్ని టిప్స్​ చెబుతున్నారు. ఆ చిట్కాలు ఏంటో మీరు చూసేయండి..

కలర్​ చూడండి : అసలైన జీడిపప్పు తెల్లగా లేదా క్రీమ్ కలర్​లో ఉంటుంది. మీరు మార్కెట్లో కొనే జీడిపప్పు కాస్త పసుపు రంగులో ఉంటే దానిని కొనకపోవడమే మంచిది. ఎందుకంటే పసుపు రంగులో ఉంటే అది నకిలీది కావొచ్చు. కాబట్టి, ఎల్లప్పుడు తెలుపు లేదా క్రీమ్​ కలర్లో ఉండే జీడిపప్పు కొనుగోలు చేయండి.

మచ్చలు ఉండవు : నాణ్యమైన జీడిపప్పుపై నలుపు మచ్చలు, రంధ్రాలు ఇవేవీ ఉండవు. నకిలీ జీడిపప్పులపైనే మచ్చలు ఉంటాయి. కాబట్టి, జీడిపప్పు కొనేటప్పుడు వాటిపైన నలుపు మచ్చలు ఉన్నాయా లేదా అనేది తప్పకుండా చూడండి.

త్వరగా పాడైపోతుంది : మేలు రకం జీడిపప్పు త్వరగా పాడవకుండా ఎక్కువ రోజులు తాజాగా ఉంటుంది. అదే నకిలీ జీడిపప్పు త్వరగా పాడైపోతుంది. అలాగే ఇందులో కీటకాలు, పురుగుల వంటివి కూడా ఏర్పడవచ్చు. అయితే, క్వాలిటీ జీడిపప్పు కనీసం 6 నెలల వరకైనా చెడిపోకుండా ఉంటుందట. కాబట్టి జీడిపప్పు కొనేముందు ఒకటికి రెండు సార్లు పరిశీలించి మంచి జీడిపప్పును కొనుగోలు చేయాలని నిపుణులు సూచిస్తున్నారు.

సైజ్​ చూడాలి : మంచి క్వాలిటీ జీడిపప్పు ఒక అంగుళం పొడవు, కాస్త మందంగా ఉంటుంది. చిన్నగా, మందం తక్కువగా ఉంటే అవి ఫేక్​ జీడిపప్పు అని గుర్తుపట్టాలి. ఇలా చిన్నగా, మందం తక్కువగా ఉన్నవి కొనుగోలు చేయకపోవడమే మంచిది.

రుచి చూడండి : మీరు మార్కెట్లో జీడిపప్పు కొనేటప్పుడు ముందు.. షాప్‌ అతని నుంచి రెండు మూడు జీడిపప్పులను అడిగి తినండి. నాణ్యమైన జీడిపప్పు తిన్నప్పుడు అది దంతాలకు అంటుకోదు. అవే ఫేక్​ జీడిపప్పులు దంతాలకు అంటుకుంటాయి. అలాగే అసలైన జీడిపప్పులు సులభంగా ముక్కలుగా విరిగిపోతాయి. ఇంకా మంచి జీడిపప్పు రుచి చాలా బాగుంటుంది. నకిలీవి చేదుగా ఉంటాయి.

మంచివి నీటిలో మునిగిపోతాయి : మీరు కొన్న జీడిపప్పు నాణ్యమైందా లేదా అనే విషయం వాటర్​ టెస్ట్​ ద్వారా తెలిసిపోతుంది. ఇందుకోసం ఒక గాజు గ్లాసులో నీటిని నింపి జీడిపప్పులు వేయండి. అరగంట తర్వాత పరిశీలించండి. మంచి జీడిపప్పు నీటిలో మునిగిపోతుంది. నకిలీదైతే పైన తేలుతుంటుంది.

ఇలా కూడా :

• మంచి నాణ్యమైన జీడిపప్పులు కాస్త బరువుగా ఉంటాయి. నకిలీవి చాలా తేలికగా ఉంటాయి.
• అసలైన జీడిపప్పుల పైన మృదువుగా ఉంటుంది. అదే నకిలీ వాటిపైన కొంచెం గరుకుగా ఉండవచ్చు. కాబట్టి, జీడిపప్పు కొనేముందు చేతిలోకి తీసుకుని పరిశీలించాలని నిపుణులు చెబుతున్నారు.