Israel Attacks Lebanon : పశ్చిమాసియాలో మరోసారి పరిస్థితులు తీవ్రరూపుదాల్చాయి. ఇజ్రాయెల్, హెజ్‌బొల్లా ఉగ్రసంస్థ పరస్పరం దాడులు ప్రతిదాడులకు దిగాయి. ఆదివారం తెల్లవారుజామున దక్షిణ లెబనాన్‌లోని హెజ్‌బొల్లా స్థావరాలపై వరుస క్షిపణులతో ఇజ్రాయెల్ మెరుపుదాడి చేసింది. వంద యుద్ధ విమానాలు, 40 రాకెట్లు, క్షిపణులతో హెజ్‌బొల్లా స్థావరాలే లక్ష్యంగా ఇజ్రాయెల్ సైన్యం విరుచుకుపడింది. ఈ విషయాన్ని ఇరు దేశాలు ధ్రువీకరించాయి. హెజ్‌బొల్లా తమపై వేలాది రాకెట్లతో భారీ దాడికి సిద్ధమైందని దీన్ని ముందే గుర్తించి తాము దాడి చేసినట్లు ఇజ్రాయెల్ సైన్యం తెలిపింది.
100 యుద్ధ విమానాలు లెబనాన్‌లోకి!
దాదాపు 6 వేల రాకెట్లు, డ్రోన్లతో హెజ్‌బొల్లా దాడికి సిద్ధమైనట్లు ఇజ్రాయెల్ ఆరోపించింది. ఆత్మ రక్షణలో భాగంగానే ముందస్తు దాడులు చేసినట్లు పేర్కొంది. అక్టోబర్‌ 7 ఘటనకు మించి అతిభారీ విధ్వంసానికి సిద్ధమైన హెజ్‌బొల్లా కుట్రను భగ్నం చేసినట్లు ఇజ్రాయెల్ ప్రకటించింది. తమ సైన్యానికి చెందిన 100 యుద్ధ విమానాలు లెబనాన్‌లోకి చొచ్చుకెళ్లి అనేక రాకెట్‌ లాంచర్లను ధ్వంసం చేసినట్లు ఒక ప్రకటనలో వెల్లడించింది. తమపై దాడి చేసే వారిపై ప్రతిదాడి తప్పదని ఇజ్రాయెల్ ప్రధాని బెంజమిన్‌ నెతన్యాహు హెచ్చరించారు. దేశాన్ని రక్షించేందుకు అవసరమైన అన్ని చర్యలు తీసుకుంటామన్నారు.
320 కత్యూషా రాకెట్ల ప్రయోగం!
దాదాపు 200 హెజ్‌బొల్లా స్థావరాలను ఇజ్రాయెల్ ధ్వంసం చేసినట్లు అంతర్జాతీయ మీడియా కథనాల వెల్లడించాయి. ఇజ్రాయెల్‌పై హెజ్‌బొల్లా ఉగ్రవాద ముఠా విస్తృత స్థాయి దాడికి సిద్ధమవుతోందని ఇజ్రాయెల్ సైనిక అధికార ప్రతినిధి అడ్మిరల్‌ డేనియల్‌ హగారీ హెచ్చరించివ కాసేపటికే ఉత్తర ఇజ్రాయెల్‌లోని పౌరులను అప్రమత్తం చేస్తూ సైరన్లు మోగాయి. అటు తమ దేశ దక్షిణ ప్రాంతంలో దాడులు జరిగినట్లు పేర్కొంటూ లెబనాన్‌లోని మీడియాలో కథనాలు వెలువడ్డాయి. ఇజ్రాయెల్ దాడులు చేస్తున్న తరుణంలో తమ పౌరులను లెబనాన్‌ అప్రమత్తం చేసింది. హెజ్‌బొల్లా స్థావరాల సమీపంలో ఉన్న పౌరులు అక్కడి నుంచి సురక్షిత ప్రాంతాలకు తరలివెళ్లాలని సూచించారు. దాడికి ప్రతీకారంగా ఇజ్రాయెల్‌పై హెజ్‌బొల్లా ఉగ్రసంస్థ ప్రతిదాడులు చేసింది. 11 ఇజ్రాయెల్ స్థావరాలను లక్ష్యంగా చేసుకుని 320 కత్యూషా రాకెట్లను ప్రయోగించింది. బీరుట్‌లో తమ కమాండర్‌ ఫాద్‌ షుక్ర్‌ హత్యకు ప్రతీకారంగా ఇజ్రాయెల్‌పై డ్రోన్లతో దాడులు చేసినట్లు హెజ్‌బొల్లా ప్రకటించింది.
దేశంలో 48 గంటల పాటు ఎమర్జెన్సీ
ఇజ్రాయెల్ సైనిక స్థావరాలు సహా గగనతల రక్షణ వ్యవస్థ ఐరన్‌ డోమ్‌ను లక్ష్యంగా చేసుకొని దాడులు చేసినట్లు తెలిపింది. తమ తొలి విడత దాడి పూర్తయిందని హెజ్‌బొల్లా ప్రకటించింది. ఈ దాడులతో హమాస్‌కు మద్దతుగా ఇజ్రాయెల్‌పై అప్పుడప్పుడూ దాడులకు దిగిన హెజ్‌బొల్లా ఇప్పుడు నేరుగా యుద్ధంలోకి అడుగుపెట్టినట్లు స్పష్టమవుతోందని అంతర్జాతీయ మీడియా విశ్లేషించింది. తాజా దాడుల నేపథ్యంలో ఇజ్రాయెల్‌లోని బెన్‌ గురియన్‌ ఇంటర్నేషనల్‌ విమానాశ్రయం పలు విమానాలను దారి మళ్లించింది. టేకాఫ్‌ కావాల్సిన మరికొన్నింటిని ఎక్కడికక్కడ నిలిపివేసింది. మరోవైపు తాజా సైనిక కార్యకలాపాలను ప్రధాని బెంజమిన్‌ నెతన్యాహు, రక్షణ మంత్రి యోవ్‌ గాలంట్‌ టెల్‌ అవీవ్‌లోని మిలిటరీ ప్రధాన కేంద్రం నుంచి పర్యవేక్షిస్తున్నట్లు అధికారులు వెల్లడించారు. దేశంలో 48 గంటల పాటు ఎమర్జెన్సీని ప్రకటించినట్లు ఇజ్రాయెల్ రక్షణ మంత్రి యోవ్‌ గాలంట్‌ ప్రకటించారు. తమ పౌరుల రక్షణే తమకు తొలి ప్రాధన్యమని తెలిపారు.
అమెరికా ఒత్తిడి వల్లే!
ఈ దాడులు గురించి అమెరికా రక్షణ మంత్రి లాయిడ్‌ ఆస్టిన్‌ ఇజ్రాయెల్ రక్షణ మంత్రి యోవ్‌ గాలంట్‌తో ఫోన్‌లో మాట్లాడారు. ఇజ్రాయెల్ రక్షణకు తాము కట్టుబడి ఉన్నట్లు ఆస్టిన్‌ హామీ ఇచ్చారు. అమెరికా అధ్యక్షుడు జోబైడెన్‌ ఇజ్రాయెల్-లెబనాన్‌ మధ్య పరిస్థితిని జాగ్రత్తగా గమనిస్తున్నట్లు చెప్పారు. టెల్‌ అవీవ్‌ ఆత్మరక్షణ హక్కును కాపాడుకునేందుకు తాము సహకరిస్తామని పేర్కొన్నారు. మరోవైపు హెజ్‌బొల్లాతో దాడులు మొదలైనా ఇజ్రాయెల్ నిఘా సంస్థలైన మొస్సాద్‌, షిన్‌బెట్‌ చీఫ్‌లు కైరోలో బందీల విడుదల చర్చలకు వెళ్లారు. అమెరికా ఒత్తిడి కారణంగానే ఈ సమావేశానికి వెళ్లినట్లు తెలుస్తోంది.
