Houthis Attack On US Ship : గల్ఫ్‌ ఆఫ్ ఎడెన్‌లో వాణిజ్య నౌకలపై యెమెన్‌లోని హౌతీ తిరుగుబాటుదారుల దాడులు కొనసాగుతున్నాయి. తాజాగా అమెరికాకు చెందిన వాణిజ్య నౌకపై హౌతీ రెబెల్స్‌ మూడు యాంటీ షిప్‌ బాలిస్టిక్‌ క్షిపణులను ప్రయోగించారు. ఈ విషయాన్ని అమెరికా సెంట్రల్‌ కమాండ్‌ సామాజిక మాధ్యమం ఎక్స్‌లో పోస్ట్‌ చేసింది. హౌతీ రెబెల్స్‌ వాణిజ్య నౌక లక్ష్యంగా మూడు క్షిపణులను ప్రయోగించినట్లు తెలిపింది. అందులో ఒక క్షిపణి సముద్రంలో పడిపోగా, మరో రెండు క్షిపణులను అమెరికాకు చెందిన గైడెడ్ మిస్సైల్ డిస్ట్రాయర్ USS గ్రేవ్లీ సమర్థవంతంగా నేలకూల్చింది. వాణిజ్య నౌకకు ఎలాంటి నష్టం కలగలేదని, ఎవరికీ ఎలాంటి గాయాలు కాలేదని అమెరికా సెంట్రల్‌ కమాండ్‌ ప్రకటించింది.
మరోవైపు, గల్ఫ్‌ ఆఫ్ ఎడెన్‌, బాబ్ అల్-మందాబ్ జలసంధిలో తాము పలు అమెరికా యుద్ధ నౌకలతో పోరాడినట్లు హౌతీ గ్రూప్‌ ప్రకటించింది. పాలస్తీనా ప్రజలకు మద్దతుగా, తమ దేశంపై అమెరికా-బ్రిటన్‌ దాడికి ప్రతీకారంగా తాము ఈ పోరాటం చేస్తున్నట్లు తెలిపింది. తాము ప్రయోగించిన క్షిపణులు అమెరికా యుద్ధనౌకను నేరుగా తాకాయని, అమెరికాకు చెందిన రెండు వాణిజ్య నౌకలు ఎర్ర సముద్రంలోకి ప్రవేశించకుండా వెనుదిరిగాయని హౌతీ గ్రూప్‌ ప్రకటించింది.
గాజాపై ఇజ్రాయెల్ దాడుల తర్వాత ఎర్ర సముద్రంలో ఒక్కసారిగా ఉద్రిక్తతలు పెరిగాయి. గాజాకు మద్దతుగా ఇజ్రాయెల్ సహా పశ్చిమదేశాలకు చెందిన నౌకలపై హౌతీ రెబెల్స్‌ ఎర్ర సముద్రం, గల్ఫ్‌ ఆఫ్ ఎడెన్‌లో దాడులకు పాల్పడుతున్నారు. ఆ మార్గంలో విదేశీ వాణిజ్య నౌకలు ప్రయాణించడానికి భయపడుతున్నాయి. చుట్టూ తిరిగి వెళ్లడం వల్ల ప్రయాణ ఖర్చు భారీగా పెరిగింది. ఈ నేపథ్యంలో అమెరికా, బ్రిటన్‌, యెమెన్‌లోని హౌతీ రెబెల్స్‌ స్థావరాలపై వైమానిక దాడులు నిర్వహిస్తున్నాయి.
10మంది హౌతీలు హతం
Houthis Red Sea America : ఎర్రసముద్రంలో రవాణా నౌకలపై దాడులకు తెగబడుతున్న 10మంది హౌతీ తిరుగుబాటుదారులను ఇటీవల అమెరికా మట్టుబెట్టింది. హెలికాప్టర్ల దాడులు జరిపి హౌతీలను చంపింది. డెన్మార్క్ షిప్పింగ్ సంస్థ మెర్చ్ హంగ్జౌ రవాణా నౌకను హౌతీ తిరుగుబాటుదారులు హైజాక్ చేసేందుకు ప్రయత్నించారు. ఈ పూర్తి వార్త కోసం ఇక్కడ క్లిక్ చెయ్యండి.
ఇజ్రాయెల్కు బిగ్ షాక్- మిలిటెంట్ దాడిలో 21 మంది సైనికులు మృతి
నైట్రోజన్ గ్యాస్తో ఖైదీకి మరణ శిక్ష! ప్రపంచంలోనే తొలిసారి- వ్యతిరేకిస్తున్న ఐరాస
