What is Baby Botox : ఎల్లప్పుడూ ముఖం అందంగా ఉండాలని.. చర్మం మెరుస్తూ కనిపించాలని అందరూ కోరుకుంటారు. కానీ.. కొందరికి చిన్న వయసులోనే ముఖం మీద ముడతలు, గీతలు కనిపిస్తాయి. దీంతో.. చాలా మంది మేకప్‌ వేస్తూ ముడతలను కవర్‌ చేస్తుంటారు. మరికొందరు.. బొటాక్స్ ట్రీట్మెంట్ చేసుకుంటుంటారు. దీనివల్ల గ్లామర్ పెరుగుతుంది. అయితే, ఈ మధ్య కాలంలో ముడతలు కనిపించకుండా ఉండడానికి బేబీ బొటాక్స్ కాస్మెటిక్ ట్రీట్మెంట్ కూడా చేయించుకుంటున్నారు. మరి.. ఈ "బేబీ బొటాక్స్" అంటే ఏంటి ? ముడతలు రాకుండా నేచురల్గా ఎలాంటి చిట్కాలు పాటించాలి? అనే ప్రశ్నలకు ప్రముఖ సౌందర్య నిపుణురాలు డాక్టర్ శైలజ సూరపనేని సమాధానం చెబుతున్నారు. ఆ వివరాలు మీ కోసం..
బేబీ బొటాక్స్.. దీనినే 'మైక్రో బొటాక్స్' అని పిలుస్తారు. బేబీ బొటాక్స్ చికిత్సకు సంప్రదాయ బొటాక్స్‌కీ పెద్ద తేడా ఏమీ ఉండదు. కాకపోతే బేబీ బొటాక్స్ అనేది.. చాలా తక్కువ మొత్తంలో సమస్య ఉన్నచోట ఇంజెక్ట్‌ చేస్తారు.
పెదవుల మీద గీతలు, ముడతలు పోవడానికీ, నుదురు, మెడ దగ్గర చర్మం సాగిపోయి గీతలు కనిపిస్తున్న వారికి బేబీ బొటాక్స్ బాగా పనిచేస్తుంది. సాధారణంగా 30-50 ఏళ్లలోపు వారికి ముడతలు, గీతలు కాస్త తక్కువగా ఉంటాయి. కాబట్టి, వారు ఈ చికిత్స చేసుకోవడం వల్ల మంచి ఫలితం ఉంటుంది. కానీ ఇక్కడ ఒక విషయం గుర్తుంచుకోవాలి. అదేంటంటే.. బేబీ బొటాక్స్ చికిత్స నాలుగు నెలలే పని చేస్తుంది. ముఖంపై ముడతలు, గీతలు తీవ్రంగా ఉంటే బొటాక్స్ చేసుకోవాలి.
చిన్నవయసులోనే ముడతలు ఎందుకు వస్తాయి ?
ప్రస్తుత కాలంలో మన జీవనశైలి, ఆహారపు అలవాట్లు పూర్తిగా మారిపోయాయి. అలాగే చుట్టూ కాలుష్యం పెరిగిపోయింది. ఇంకా ఉద్యోగంలో ఒత్తిడి, రాత్రి సరిగా నిద్రపోకపోవడం వంటి వివిధ కారణాల వల్ల చాలా మందిలో చిన్నవయసులో ముఖంపై ముడతలు కనిపిస్తున్నాయి. ముడతలు తగ్గడానికి బొటాక్స్‌ని తక్కువ మొత్తంలోనే ఇవ్వాలి. లేకపోతే ముఖం అసహజంగా ఎలాంటి స్పందనా లేనట్లు కనిపిస్తుంది. కాబట్టి, ముడతలు పోయి, నేచురల్గా కనిపించేలా చేసే బేబీ బొటాక్స్ చికిత్స చేసుకోవడం ఎంతో మేలు.
ముడతలు తగ్గడానికి ఇలా చేయండి..
ఇప్పుడిప్పుడే ముడతలు మొదలయ్యే వారు చర్మతీరుకు తగ్గ స్కిన్‌ కేర్‌ రొటీన్‌ని ప్రారంభించడం వల్ల మంచి ఫలితం ఉంటుంది. ఇందుకోసం ఆల్కహాల్‌ లేని, గ్లిజరిన్, యాంటీ ఆక్సిడెంట్లు ఉన్న టోనర్, విటమిన్‌ సి, రెటినాల్, కొల్లాయిడల్‌ ఓట్‌ మీల్, పెప్టైడ్స్‌ ఉన్న క్రీములు వాడుకోవాలి. ఇవి వాడుకుంటే ముడతలు, గీతలు పెరగకుండా ఉంటాయి. వారానికి ఒకసారికి స్క్రబ్‌ చేసుకోవాలి.
రోజూ మైల్డ్‌ క్లెన్సర్, సన్‌స్క్రీన్‌ తప్పకవాడాలి. రోజంతా ఏసీలో ఉన్నా కనీసం మూడు లీటర్ల వాటర్ తాగాలి. కెమికల్‌ పీల్స్‌నీ ఉపయోగించొచ్చు. వీటన్నింటితో పాటు రోజూ సమతులాహారం తీసుకోవాలి. అలాగే డైలీ కనీసం 8 గంటలు నిద్రపోవాలి. ముఖంపై రోజూ ఆలివ్‌ నూనె, కలబంద, అరటి గుజ్జుతో మసాజ్ చేసుకుంటే చర్మం హెల్దీగా ఉంటుంది. ఈ టిప్స్ అన్నీ పాటించడం వల్ల ముడతలు రాకుండా అడ్డుకోవచ్చని డాక్టర్ శైలజ సూరపనేని చెబుతున్నారు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
చిన్నవయసులోనే నుదుటి మీద ముడతలు, గీతలా? - ఈ సమస్యకు ఇలా చెక్‌ పెట్టండి!
మెడపై ముడతలు ఎబ్బెట్టుగా కనిపిస్తున్నాయా? - ఇలా చేస్తే ఈజీగా తగ్గిపోతాయి!
