Tattoo Skin Care Tips: ఈ రోజుల్లో టాటూలు వేయించుకోవడం ఒక ట్రెండ్‌గా మారింది. కొందరు ఇష్టమైన వారిపై ప్రేమను చూపడానికి టాటూ వేయించుకుంటే, కొందరు ఫ్యాషన్‌ కోసం, మరికొందరు సినీతారలు, క్రీడాకారులపై ఉన్న మక్కువతో వాళ్ల పేర్లు, ఇంకొందరు నచ్చిన సింబల్స్‌, దేవుళ్లు, కోట్స్‌ పచ్చబొట్టుగా వేయించుకుంటూ ఉంటారు. టాటూ వేయించిన తర్వాత వాటిని చూసుకొని మురిసిపోవడం కాకుండా, అక్కడి స్కిన్ విషయంలో కచ్చితమైన జాగ్రత్తలు తీసుకోవాలని నిపుణులు హెచ్చరిస్తున్నారు. లేకపోతే పచ్చబొట్టు పొడిపించుకున్న చర్మం, దాని చుట్టూ అలర్జీలు, ర్యాషెస్‌ వచ్చే అవకాశాలు ఎక్కువగా ఉన్నాయంటున్నారు. మరి అందుకోసం పాటించాల్సిన టిప్స్ ఈ స్టోరీలో చూద్దాం..
తేమ: టాటూ వేయించుకునే క్రమంలో అక్కడి చర్మ కణాలు దెబ్బతింటాయి. తద్వారా ఆ ప్రాంతమంతా తేమను కోల్పోయి నిర్జీవంగా మారిపోతుంది. అయితే అక్కడ కొత్తకణాల ఉత్పత్తిని ప్రేరేపించడానికి మాయిశ్చరైజర్‌ ఉపయోగపడుతుంది. అందుకే రోజుకు రెండుసార్లు ఆ ప్రాంతాన్ని సబ్బు, చల్లటి నీటితో శుభ్రం చేయాలి. ఆపై మాయిశ్చరైజర్‌ అప్లై చేయాలి. ఈ తరహా మాయిశ్చరైజర్‌ ఆ చర్మానికి చల్లదనాన్ని అందించడంతో పాటు అక్కడ కొత్త కణాలు ఉత్పత్తి అయ్యేలా చేస్తుంది. అలాగని మరీ ఎక్కువ మొత్తంలో క్రీములు, లోషన్లు వాడారంటే అక్కడి చర్మ రంధ్రాలు మూసుకుపోతాయి. కాబట్టి తగిన మోతాదులో ఉపయోగించాలనే విషయం గుర్తుంచుకోవాలి.
సన్‌ స్క్రీన్‌: టాటూ వేయించుకున్న చర్మాన్ని ఎండ నుంచి కాపాడుకోవడం కూడా ముఖ్యమే అంటున్నారు నిపుణులు. ఎందుకంటే UV కిరణాల వల్ల పచ్చబొట్టు కోసం వాడిన కొన్ని రకాల ఇంకుల రంగు వెలిసిపోయే ప్రమాదం ఉంది. అంతేకాదు, ఈ కిరణాల వల్ల ఆ చర్మ ప్రాంతంలో అలర్జీ వచ్చే అవకాశాలూ ఉన్నాయి. కాబట్టి ఎండ నుంచి రక్షణం పొందడానికి SPF 30 సన్‌స్క్రీన్‌ను బయటికి వెళ్లడానికి పావుగంట ముందు అప్లై చేసుకోవాలి. అలాగే ప్రతి రెండు గంటలకోసారి దీన్ని అప్లై చేసుకోవడం మర్చిపోవద్దు.
టాటూ.. వేసుకుంటున్నారా? కాస్త జాగ్రత్త గురూ!
మాస్క్: టాటూ వేయించుకున్న చర్మం చాలా సున్నితంగా ఉంటుంది. కాబట్టి అక్కడ కొత్త కణాలు పుట్టుకొచ్చే దాకా అంటే సుమారుగా రెండు నుంచి మూడు వారాల పాటు ఆ భాగంలో బ్యూటీ మాస్కులు, స్క్రబ్‌లు, వ్యాక్స్‌లు వంటివి అస్సలు ఉపయోగించకూడదు. ఎందుకంటే వీటివల్ల ఇన్ఫెక్షన్లు, ఇతరత్రా సమస్యలు వచ్చే అవకాశం ఎక్కువ. అలాగే చర్మానికి బిగుతుగా ఉండే దుస్తులు వేసుకుంటే గాయం మరింత ఎక్కువయ్యే ప్రమాదం ఉంటుంది. కాబట్టి శరీరానికి వదులుగా, గాలి తలిగేలా ఉండే కాటన్ దుస్తుల్ని ఎంచుకోవాలి.
స్విమ్మింగ్: కొత్తగా టాటూ వేయించుకున్న వారు సుమారుగా మూడు వారాల వరకు ఈత కొట్టడం మానుకోమంటున్నారు నిపుణులు. ఎందుకంటే పూల్స్‌లోని నీటిలో ఉప్పు, క్లోరిన్‌ ఎక్కువగా ఉంటుంది. ఇది పచ్చబొట్టు వేయించుకున్న చర్మాన్ని మరింత పొడిబారేలా చేస్తుంది. అంతేకాదు టాటూ కూడా త్వరగా రంగు వెలిసిపోయే ప్రమాదం ఉంటుంది. కాబట్టి ఈ విషయంలో జాగ్రత్త వహించడం ముఖ్యం.
డాక్టర్‌ని అప్పుడే సంప్రదించాలి: అయితే ఇన్ని జాగ్రత్తలు తీసుకున్నా పచ్చబొట్టు వేయించుకున్న దగ్గర చర్మం కోలుకోవడానికి కాస్త సమయం పడుతుంది. చర్మం మరీ సున్నితంగా ఉన్న వారిలో బ్యాక్టీరియా దాడి చేసే ప్రమాదమూ లేకపోలేదంటున్నారు నిపుణులు. ఫలితంగా అలర్జీ, ఎరుపెక్కడం, ర్యాషెస్‌ వంటివి దాడి చేస్తాయి. ఇలాంటప్పుడు ఆలస్యం చేయకుండా డెర్మటాలజిస్ట్ను సంప్రదించాలి.
అయోధ్య రాముడికి ముస్లిం యువకుడి స్పెషల్ గిఫ్ట్- 51 వేల మందికి ఉచితంగా టాటూలు
