అలర్ట్​: నోరు తెరిచి నిద్ర పోతున్నారా? - ఈ ప్రాణాంతక సమస్యలు ఎటాక్​ చేయడం గ్యారెంటీ! - Mouth Breathing Side Effects

Mouth Breathing: చాలా మంది నోరు తెరిచి నిద్రపోతుంటారు. పైగా ఇది కామన్​ అని లైట్​ తీసుకుంటారు. కానీ.. ఈ లక్షణం అతి ప్రమాదకరమైన సమస్య అంటున్నారు వైద్యులు. పూర్తి వివరాల కోసం ఈ స్టోరీపై ఓ లుక్కేయండి.

Mouth Breathing Side Effects: జలుబు చేసినప్పుడు ముక్కు దిబ్బడ కారణంగా నోరు తెరిచి నిద్ర పోవడం కామన్​. అయితే జలుబు లేకపోయినా కూడా నోరు తెరిచి నిద్రపోయే అలవాటు ఉంటే మాత్రం అలర్ట్​ కావాల్సిందే అంటున్నారు నిపుణులు. ఇలా దీర్ఘకాలికంగా నోరు తెరిచి నిద్రపోయే అలవాటు ఉన్న వారిలో ప్రమాదకరమైన ఆరోగ్య సమస్యలు వచ్చే అవకాశం ఉందని చెబుతున్నారు వైద్యులు. పూర్తి వివరాలు ఇప్పుడు చూద్దాం..

నోటి ద్వారా శ్వాస ఎందుకు: ముక్కులో నుంచి గాలి మృదువైన మార్గం ద్వారా ఊపిరితిత్తులను చేరుకోవాలి. అలా చేరుకోవడంలో అడ్డంకులు ఏర్పడినప్పుడు నోటి ద్వారా శ్వాస తీసుకోవడం జరుగుతుంది. అలాగే టాన్సిల్స్ పెద్దవిగా పెరిగినా, ఒత్తిడి అధికమైనా, మానసిక ఆందోళనలు ఎక్కువైనా, ముక్కులో పాలిప్స్ పెరిగినా లేదా కణితులు ఉన్నా, బరువు పెరిగినా కూడా ఇలా నోటి ద్వారా శ్వాస తీసుకునే అలవాటు పెరుగుతుందని నిపుణులు అంటున్నారు.

నోటి ద్వారా శ్వాస తీసుకుంటే కనిపించే లక్షణాలు: చాలా మందికి నోరు తెరిచి నిద్రపోతున్నామని కూడా తెలియదు. అయితే ఈ లక్షణాలు కనిపిస్తే మీరు నోటి ద్వారా శ్వాస తీసుకుంటున్నారని అర్థమని అంటున్నారు నిపుణులు.

• నోరు పొడి బారడం
• శ్వాస వాసన చెడుగా రావడం
• స్వరం బొంగురు పోవడం
• అలసిపోయినట్టు అనిపించడం
• దీర్ఘకాలికంగా అలసట
• కళ్ల కింద డార్క్​ సర్కిల్స్​

నోటి ద్వారా శ్వాస తీసుకుంటే వచ్చే సమస్యలు:

శ్వాసకోశ సమస్యలు: నోరు తెరిచి నిద్ర పోయేటప్పుడు నోరు, గొంతు పొడిబారుతుందని, దగ్గు రావడం, గురక వంటి సమస్యలు రావచ్చని నిపుణులు అంటున్నారు. కాలక్రమేణా, ఇది నిద్రాపక్షవాతం వంటి తీవ్రమైన శ్వాసకోశ సమస్యలకు దారితీస్తుందని హెచ్చరిస్తున్నారు. 2016లో స్లీప్​ జర్నల్​లో ప్రచురితమైన అధ్యయనం ప్రకారం.. నోటి ద్వారా శ్వాస తీసుకునే వ్యక్తులలో నిద్రాపక్షవాతం వచ్చే అవకాశం 2.5 రెట్లు ఎక్కువగా ఉందని కనుగొన్నారు.

దంత సమస్యలు: నోరు తెరిచి నిద్ర పోవడం వల్ల నోరు పొడిబారుతుందని.. దీని వల్ల దంత క్షయం, చిగుళ్ల వ్యాధి వంటి దంత సమస్యలు రావచ్చని అంటున్నారు.

ముఖంపై ముడతలు: నోరు తెరిచి నిద్ర పోవడం వల్ల ముఖ కండరాలపై ఒత్తిడి పెరుగుతుందని.. దీని వల్ల ముఖంపై ముడతలు ఏర్పడతాయని హెచ్చరిస్తున్నారు. అంతే కాకుండా నోరు తెరిచి నిద్ర పోవడం వల్ల చెవి నొప్పి, తలనొప్పి, నిద్రలేమి, ఏకాగ్రత లోపం వంటి ఇతర సమస్యలు కూడా రావచ్చని హెచ్చరిస్తున్నారు.

ఆస్తమా: నోటి ద్వారా శ్వాస తీసుకోవడం వల్ల ఊపిరితిత్తుల పనితీరు కూడా మందగిస్తుందని నిపుణులు అంటున్నారు. ఆస్తమాతో బాధపడుతున్న వ్యక్తులకు ఇలా జరిగితే ఆ సమస్య మరింతగా పెరిగిపోయే అవకాశాలు ఉన్నట్టు పలు అధ్యయనాలు చెబుతున్నాయని అంటున్నారు.

హార్ట్​ ఫెయిల్యూర్​: ముక్కు ద్వారా శ్వాస తీసుకున్నప్పుడు.. గాలి శ్వాస మార్గాలలో వేడెక్కి తేమతో కూడి ఉంటుంది. ఇది ఊపిరితిత్తుల నుంచి రక్తంలోకి ఆక్సిజన్ బదిలీని సులభతరం చేస్తుంది. అదే నోటి ద్వారా శ్వాస తీసుకున్నప్పుడు.. గాలి శ్వాస మార్గాల గుండా వెళ్లేటప్పుడు వేడెక్కదు. దీని వల్ల రక్తంలోకి తక్కువ ఆక్సిజన్ చేరుతుంది. ఇది అలసట, తలనొప్పి, ఏకాగ్రత లోపం వంటి లక్షణాలకు దారితీస్తుంది. దీర్ఘకాలికంగా రక్తంలో ఆక్సిజన్​ తగ్గితే అధిక రక్తపోటు, గుండె వైఫల్యం వంటి తీవ్రమైన ఆరోగ్య సమస్యలకు దారితీస్తుందని హెచ్చరిస్తున్నారు.

2019లో అమెరికన్ జర్నల్ ఆఫ్ రెస్పిరేటరీ అండ్ క్రిటికల్ కేర్ మెడిసిన్​లో ప్రచురితమైన అధ్యయనం ప్రకారం నోటి ద్వారా శ్వాస తీసుకునే వ్యక్తులలో రక్తంలో ఆక్సిజన్ స్థాయిలు తక్కువగా ఉన్నాయని, అలాగే అధిక రక్తపోటు, గుండె వైఫల్యం ప్రమాదం ఎక్కువగా ఉందని కనుగొన్నారు. ఈ పరిశోధనలో న్యూయార్క్​లోని మౌంట్ సినాయి స్కూల్ ఆఫ్ మెడిసిన్‌లో పల్మనరీ అండ్​ క్రిటికల్ కేర్ మెడిసిన్ ప్రొఫెసర్ డాక్టర్ స్మిత్ పాల్గొన్నారు.