బెల్లం ఎన్ని రకాలు? ఏది తింటే ఆరోగ్యానికి మంచిది? రోజూ తినాలని ఎందుకు చెబుతారు? - Health Benefits Of Jaggery

Jaggery Health Benefits : రోజూ బెల్లం కొంచెమైనా తింటే ఆరోగ్యానికి ఎంతో మంచిదని పెద్దలు, వైద్యులు చెబుతుంటారు. మరి బెల్లం ఎన్ని రకాలు ఉంటుందో తెలుసా? ఏది తింటే ఆరోగ్యానికి మంచిది?

Jaggery Health Benefits : సహజంగా తీపి గుణం కలిగిన బెల్లం అనేక ఆరోగ్య ప్రయోజనాలను కలిగిస్తుంది. రోజూ కొంచెం బెల్లమైనా తింటే ఆరోగ్యానికి మేలు కలుగుతుందని పెద్దలు, నిపుణులు చెబుతుంటారు. మార్కెట్​లో బెల్లం వివిధ రకాలుగా లభిస్తుంది. ఒక్కో బెల్లం ఒక్కో రకమైన ప్రయెజనాలను కలిగిస్తుందట. అసలు బెల్లం ఎన్ని రకాలుగా ఉంటుంది? ఏది తింటే ఆరోగ్యానికి చాలా మేలు కలుగుతుందో చూద్దాం.

బెల్లం రకాలు
1. చెరుకు బెల్లం: చెరుకుతో తయారు చేసే బెల్లం చాలా సాధారణ రకం. వాస్తవానికి బెల్లం ఎంత ముదురు రంగులో ఉంటే అంత మంచిదట. ఈ రకంగా చూస్తే చెరుకు బెల్లం అనేక రకాల ప్రయోజనాలను కలిగిస్తుంది. దీన్ని రోజూ తినడం వల్ల జీర్ణక్రియ మెరుగవుతుంది, నిర్విషీకరణకు అవసరమైన పోషకాలు ఇందులో మెండుగా ఉంటాయి.

2. తాటి బెల్లం:
తాటి చెట్ల రసంతో తయారు చేసే తాటి బెల్లంలో ఐరన్ కంటెంట్ ఎక్కువగా ఉంటుంది. ఐరన్ మనిషి శారీరక ఎదుగుదలకు బాగా సహాయపడుతుంది.

3. ఖర్జూర బెల్లం:
ఖర్జూర చెట్టు ఆకుల రసం నుంచి తీసుకునేదే ఖర్జూర బెల్లం. దీన్నే ఖజూర్ బెల్లం అని కూడా పిలుస్తారు. ఇందులో ఖనిజాలు, యాంటీఆక్సిడెంట్లు పుష్కలంగా ఉంటాయి. దీన్ని చాలా మంది వంటకాల్లో ఉపయోగిస్తుంటారు.

4. కొబ్బరి బెల్లం:
కొబ్బరి చెట్ల నుంచి తయారుచేసే కొబ్బరి బెల్లంలో పొటాషియానికి గొప్ప మూలం. రుచిలో పంచదార పాకంలా ఉండే ఈ కొబ్బరి బెల్లం చెరుకు బెల్లం కన్నా ఎక్కువ ప్రయోజనాలను కలిగిస్తుందట.

5. నల్ల బెల్లం:
సంప్రదాయ ఆయుర్వేద ఔషధాల్లో నల్ల బెల్లానికి ఎక్కువ ప్రాధాన్యం ఉంది. ఇది అనేక రకాల ఔషధ గుణాలు కలిగి ఉంటుందట. పలు రకాల మూలికలు, సుగంధ ద్రవ్యాల తయారీలో నల్ల బెల్లాన్ని ఎక్కువగా ఉపయెగిస్తారు.

6. నువ్వుల బెల్లం:
వేయించిన నువ్వులతో తయారు చేసే ఈ బెల్లం ఆరోగ్యానికి చాలా రకాల ప్రయెజనాలను కలిగిస్తుందట. వీటిలోని కాల్షియం ఎముకల ఆరోగ్యాన్ని పెంచుతాయి.

రోజూ బెల్లం తింటే ఏమవుతుంది?
పోషకాల గని:
బెల్లంలో ఇనుము, మెగ్నీషియం, పొటాషియం వంటి ఖనిజాలకు మూలం. ఇందులో శరీరానికి అవసరమైన బీ విటమిన్లు, యాంటీ ఆక్సిడెంట్లు కూడా ఉంటాయి.

శక్తిని పెంచుతాయి:
కార్బోహైడ్రేట్లు పుష్కలంగా ఉండే బెల్లం శరీరానికి సహజమైన శక్తిని అందిస్తుంది. ఇది అలసట, నీరసం వంటి వాటి నుంచి త్వరిత ఉపశమనం కలిగిస్తుంది.

అరుగుదల:
భోజనం చేసిన తర్వాత బెల్లం తీసుకోవడం వల్ల జీర్ణక్రియకు బాగా సహాయపడుతుంది. మలబద్దకం, అజీర్తి లాంటి సమస్యలను తగ్గించి జీర్ణ ఆరోగ్యాన్ని మెరుగుపరుస్తుంది.

నిర్విషీకరణ:
బెల్లం మన ప్రాణాధారమైన కాలేయం ఎప్పుడూ డీహైడ్రేట్ కాకుండా కాపాడుతుంది. శరీరంలోని టాక్సిన్లను బయటకు పంపి రక్తన్ని శుద్ధి చేయడానికి బెల్లం చక్కగా సహాయపడుతుందట.

శ్వాసకోశ ఆరోగ్యం:
దగ్గు, జలుబు వంటి శ్వాసకోశ సమస్యల చికిత్సకు బెల్లం బాగా ఉపయోగపడుతుంది. బెల్లాన్ని కాస్త అల్లంతో కలిపి తీసుకోవడం వల్ల శ్వాసకోశ సమస్యల నుంచి త్వరిత ఉపశమనం లభిస్తుంది.

రక్తహీనత నివారణ:
బెల్లంలోని ఐరన్ కంటెంట్ రక్తహీనత నివారిణిగా పనిచేస్తుంది. ఐరన్ డెఫీషియన్సీ, అనీమియా వంటి వాటి చికిత్సతో పాటు ఎర్ర రక్త కణాల ఉత్త్పత్తికి బెల్లం బాగా దోహద పడుతుంది.

బరువు నియంత్రణ:
బరువు తగ్గాలనుకునే వారు శుద్ధి చేసిన చక్కెరకు బదులుగా బెల్లాన్ని ఉపయోగించుకోవచ్చు. ఇది తక్కువ కేలరీలు, ఆరోగ్యకరమైన తీపిదనం కలిగి ఉండి మీ బరువును ఎప్పుడూ నియంత్రణలో ఉంచుతుంది.

చర్మానికి:
బెల్లంలోని యాంటీఆక్సిడెంట్లు చర్మ ఆరోగ్యాన్ని మెరుగుపరచడంలో చక్కగా సహాయపడతాయి. ముఖ్యంగా వృద్ధాప్య ఛాయలు తగ్గించడానికి రోజూ కొంచెం బెల్లం తప్పక తినాలని సౌందర్య నిపుణులు చెబుతున్నారు.