How To Prevent Childhood Obesity : పిల్ల‌లు బొద్దుగా ఉంటేనే బాగా క‌నిపిస్తారు. చాలా మంది ఇలానే అభిప్రాయ‌ప‌డ‌తారు. ఇదే న‌మ్మ‌కంతో వారు ఉండాల్సిన దాని క‌న్నా ఎక్కువ బ‌రువున్నా ప‌ట్టించుకోం. పిల్లల్లో అయినా పెద్ద‌ల్లో అయినా బ‌రువు అనేది ఆరోగ్యానికి గుదిబండే. అందుకే స్థూలకాయం అనేది పెద్ద స‌మ‌స్య‌గా మారుతుంది. చిరుతిళ్లు, జంక్ ఫుడ్స్కు అలవాటు ప‌డ‌టం, శారీర‌క శ్ర‌మ లేక‌పోవ‌డం వ‌ల్ల పిల్ల‌ల ఒంట్లో కొవ్వు నిల్వ‌లు పేరుకుపోతున్నాయి. ఈ నేప‌థ్యంలో పిల్ల‌లో స్థూలకాయానికి దారితీస్తున్న మార్గాలు, బ‌రువు త‌గ్గించుకునే మార్గాల గురించి తెలుసుకుందాం. అధిక బ‌రువు, స్థూల కాయం, ఉబ‌కాయం ఇలా పేరేదైనా సమస్య ఒక్క‌టే. ఈ కాలంలో ఈ సమస్య పెద్ద‌ల‌కే కాదు పిల్ల‌ల‌కూ గుది బండ‌లా మారుతోంది. ఒక‌వైపు పిల్ల‌ల మీది ప్రేమ‌తో వారు కోరిన‌వ‌న్నీ తినిపించ‌డం, అతిగా జంక్ ఫుడ్ను అలవాటు చేయ‌డం మ‌రోవైపు ఆట‌లు, శారీర‌క వ్యాయామాలు లేక‌పోవ‌డంతో పిల్ల‌లు సుల‌భంగా బ‌రువు పెరిగిపోతున్నారు.
కార‌ణాలు అనేకం
'కొంత మంది పిల్లల్లో థైరాయిడ్, పిట్యుట‌రీ గ్రంథుల్లో స‌మ‌స్య‌లు ఉంటాయి. ఇలాంటి సంద‌ర్భాల్లోనూ వారు బ‌రువు పెరిగిపోతూ ఉంటారు. పిల్లల్లో టైప్-1 మ‌ధుమేహం ఉన్న‌ప్పుడు కూడా బ‌రువ‌నేది స‌మ‌స్య‌గా మారుతుంది. క్యాన్స‌ర్ కాని కొన్ని క‌ణితులు మెద‌డులో హైపోథల‌మ‌స్ ప్రాంతంలో పెరిగినా పిల్ల‌లు బ‌రువు పెరుగుతారు. ఈ సమస్య ఉన్న‌ప్పుడు ఆక‌లి తీరిన సమాచారం మెదడుకు అంద‌క వారు ఆప‌కుండా తింటూనే ఉంటారు. ఇది క్ర‌మంగా స్థూలకాయానికి దారి తీస్తుంది' అని వైద్యులు చెబుతున్నారు.
స‌మ‌స్య‌లివే
స్థూలకాయం అనేది బ‌లం అని చాలా మంది అపోహ ప‌డుతుంటారు. కానీ అది నిజం కాదు. అది పిల్ల‌ల శ‌రీరంలో అనేక రుగ్మ‌త‌ల్ని తెచ్చి పెడుతుంది. స్థూల కాయంతో బాధ‌ప‌డే పిల్ల‌లు శ‌రీరాన్ని బ‌లంగా లాగుతున్న‌ట్లు న‌డుస్తారు. నిద్ర‌లో గురక పెడుతూ ఉంటారు. నిద్ర‌లో ఊపిరి అంద‌క హ‌ఠాత్తుగా లేచి కూర్చుంటారు. జ్ఞాప‌క శ‌క్తి త‌క్కువ‌గా ఉంటుంది. త‌ర‌చూ ఆయాస ప‌డుతుంటారు. ఎక్కువగా విశ్రాంతి తీసుకోవ‌డానికి ఇష్ట‌ప‌డుతుంటారు.
పెద్ద‌లు చేయాల్సిన ప‌నులు
పిల్ల‌లు స్థూల‌కాయంతో బాధ‌పడుతున్న‌ప్పుడు ఆల‌స్యం చేయ‌కుండా వైద్యుల్ని సంప్ర‌దించాలి. హార్మోన్ల‌లో హెచ్చుతగ్గులు, మెద‌డులో క‌ణితులు, ఇత‌ర శారీర‌క స‌మ‌స్య‌లు కార‌ణ‌మైతే వాటిని స‌రిదిద్దే చికిత్స అందిస్తే స‌రిపోతుంది. అలా కాకుండా ఎలాంటి ఆరోగ్య స‌మ‌స్యా లేకుండా లావుగా త‌యారైతే జీవ‌న శైలి, ఆహార‌పు అల‌వాట్ల‌లో మార్పులు చేస్తే స‌రిపోతుంది. పిల్ల‌లో స్థూలకాయాల‌న్ని త‌గ్గించ‌డానికి పెద్ద‌లు ఓ క‌న్నేసి ఉంచాలి. వారు ఏం తింటున్నారు? ఎలా తింటున్నార‌ని ఎప్ప‌టిక‌ప్పుడు ప‌రిశీలిస్తూ ఉండాలి. వారు వేళ‌కు భోజం చేసేలా చూడాలి. వారి ఆహారంలో జంక్ ఫుడ్కు స్థానం క‌ల్పించ‌డ‌కూడ‌దు. శీత‌ల పానియాల్లో చ‌క్కెర స్థాయి ఎక్కువ కాబ‌ట్టి వాటిని పిల్ల‌ల‌కు దూరంగా ఉంచాలి. వాటి బ‌దులుగా పండ్లు కానీ, పండ్ల ర‌సాలు కానీ ఇవ్వాలి. ప్యాకేజ్డ్ ఫుడ్ పూర్తిగా మాన్పించాలి.
ఆన్లైన్లో ఆర్డ‌ర్ పెట్టి ఇంటికి ఆహారం తెప్పించుకుని తినే అల‌వాటును పెద్ద‌లు మానుకోవాలి. పిల్ల‌ల లంచ్ బాక్స్ ఇంటి నుంచే వెళ్లాలి. ఉద‌యం అల్పాహారం తినిపించ‌కుండా గ్లాసు పాలు తాగించేసి పిల్ల‌ల్ని స్కూలుకు పంప‌కూడ‌దు. రోజూ క‌నీసం గంట‌సేపైనా ఆడుకునేలా చూడాలి. త‌గినంత శారీర‌క శ్ర‌మ‌ను పిల్ల‌కు క‌ల్పించాలి. ఈ జాగ్రత్తలు పిల్ల‌ల బ‌రువును అదుపులో ఉంచుతాయి. పైగా ఇవి మ‌న ప‌రిధిలోని ప‌నులే కాబ‌ట్టి కాస్త స‌మ‌యం కేటాయించి పాటించేలా చేయండి.
- " class="align-text-top noRightClick twitterSection" data="">
ముఖ్య గమనిక :
ఈ వెబ్సైట్లో మీకు అందించిన ఆరోగ్య సమాచారం, వైద్య చిట్కాలు, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
పెయిన్ కిల్లర్స్ ఎక్కువగా వాడుతున్నారా? అల్సర్స్ రావడానికి అదే కారణమవ్వచ్చు!
గోళ్లు పెంచుతున్నారా? - వాటి కింద ఏం పెరుగుతూ ఉంటుందో తెలుసా?
