Health Benefits of Eating Gulkand: ఎండాకాలంలో చాలా మందిని గ్యాస్ట్రిక్, ఎసిడిటీ, మలబద్ధకం.. వంటి జీర్ణ సంబంధిత సమస్యలు వేధిస్తాయి. ఈ క్రమంలో శరీరానికి చల్లదనాన్ని అందించే పదార్థాల్ని తీసుకోవాలని అంటుంటారు. అలా బాడీకి చలువ చేసే ఫుడ్స్లో గుల్కంద్ ఒకటని పోషకాహార నిపుణులు అంటున్నారు. ఈ వేసవిలో రోజుకో టీస్పూన్ చొప్పున దీన్ని తీసుకుంటే చక్కటి ఫలితం ఉంటుందంటున్నారు. అంతేకాదు.. మహిళలకు సంబంధించిన నెలసరి సమస్యలకూ పరిష్కారం దొరుకుతుందంటున్నారు. ఈ క్రమంలో గుల్కంద్ వల్ల కలిగే ఆరోగ్య ప్రయోజనాలు ఏంటి? దీనిని ఎలా తయారు చేసుకోవాలో ఈ స్టోరీలో చూద్దాం..
గుల్కంద్.. గులాబీ పూరేకలతో చేసే ఈ జామ్ చూడగానే తినాలన్నంత ఆకర్షణీయంగా ఉండడమే కాదు.. చక్కటి రుచి, సువాసనను కూడా కలిగి ఉంటుంది. ఇక ఈ వేసవిలో దీన్ని రోజూ తీసుకోవడం వల్ల వేసవి తాపానికి దూరంగా ఉండచ్చు. ఇక ఇతర ప్రయోజనాలు చూస్తే..
- ప్రస్తుతం చాలా మంది మహిళలు పీసీఓఎస్‌(PCOS)తో బాధపడుతున్నారు. వీరిలో హార్మోన్ల అసమతుల్యత వల్ల మేని ఛాయ తగ్గడం, చర్మంపై క్రాక్స్, అవాంఛిత రోమాలు, మొటిమలు.. వంటి ఎన్నో సమస్యలు ఉత్పన్నమవుతాయి. అలాంటి వారు రోజుకో టీస్పూన్ చొప్పున గుల్కంద్ తీసుకుంటే చక్కటి ఫలితం ఉంటుందంటున్నారు నిపుణులు.
- థైరాయిడ్‌తో బాధపడుతోన్న వారికి పీరియడ్స్ ముందు స్పాటింగ్, బ్లాక్ డిశ్చార్జ్, బ్రౌన్ డిశ్చార్జ్.. వంటివి కామన్. అలాంటప్పుడు ఈ గుల్‌కంద్‌ని రోజువారీ ఆహారంలో భాగం చేసుకుంటే సమస్యల నుంచి ఉపశమనం పొందవచ్చని సూచిస్తున్నారు.
- శరీరంలో బ్లడ్ తక్కువగా ఉన్న వారు గుల్‌కంద్‌ని తీసుకోవడం వల్ల రక్తాన్ని పెంచుకోవచ్చని చెబుతున్నారు. అలాగే రక్తంలో చక్కెర స్థాయుల్ని అదుపు చేయడానికీ ఇది తోడ్పడుతుందని అంటున్నారు.
- మలబద్ధకంతో బాధపడే వారు గుల్కంద్ తీసుకోవడం వల్ల ఎలాంటి దుష్ప్రభావాలు తలెత్తకుండా ఈ సమస్య నుంచి బయటపడచ్చని నిపుణులు అంటున్నారు. అలాగే చాలా మంది పిల్లల్లో మలబద్ధకం సమస్య ఉంటుంది. అలాంటివారికీ దీన్ని అందిస్తే సత్వర పరిష్కారం దొరుకుతుంది. 2019లో పిడియాట్రిక్ గ్యాస్ట్రోఎంటరాలజీ అండ్ హెపటాలజీ జర్నల్లో ప్రచురితమైన అధ్యయనం ప్రకారం గుల్కంద్ తీసుకున్న పిల్లల్లో మలబద్ధకం సమస్య తగ్గినట్లు కనుగొన్నారు. ఈ పరిశోధనలో దిల్లీలోని AIIMS లో పనిచేసే గ్యాస్ట్రోఎంట్రాలజిస్ట్ డా. అశోక్ కుమార్ అగర్వాల్ పాల్గొన్నారు. మలబద్ధకంతో బాధపడుతున్న పిల్లలకు గుల్కంద్ సురక్షితమైన, సమర్థవంతమైన చికిత్స అని ఆయన పేర్కొన్నారు.
- అలసటను దూరం చేసుకొని శక్తిని పెంచుకోవడానికి, చర్మాన్ని మృదువుగా మార్చుకోవడానికి, అజీర్తిని దూరం చేసుకోవడానికి.. ఇలా అన్ని సమస్యలకు గుల్కంద్ పరిష్కారం చూపుతుంది.
- ఎసిడిటీ వల్ల చాలా మందికి రాత్రుళ్లు నిద్ర పట్టదు. అలాంటివారు రాత్రి నిద్ర పోయేముందు ఓ గ్లాసు పాలల్లో టీస్పూన్ గుల్కంద్ కలుపుకొని తీసుకుంటే హాయిగా నిద్ర పడుతుందంటున్నారు.
- కొంతమందికి భోజనం తర్వాత స్వీట్ తినాలనిపిస్తుంటుంది. మరికొంతమంది టీ/కాఫీ తాగాలనిపిస్తుంది. ఇలాంటి వారు గుల్‌కంద్‌తో ఈ కోరికల్ని అదుపులో పెట్టుకోవచ్చు. ఇందుకోసం భోంచేశాక టీస్పూన్ గుల్కంద్ తింటే సరిపోతుంది.
- పరగడుపున, భోజనం తిన్న తర్వాత టీస్పూన్ గుల్కంద్ తింటే జీర్ణవ్యవస్థ పనితీరు మెరుగుపడి ఆహారం ఈజీగా జీర్ణమవుతుంది.
- బాలింతలు, దీర్ఘకాలిక జీర్ణ సంబంధ సమస్యలున్న వారు, ఐరన్-ఫోలికామ్లం లోపంతో బాధపడుతున్నవారు.. తమలపాకుపై టీస్పూన్ గుల్‌కంద్‌ని వేసుకొని పాన్‌లాగా చుట్టుకుని.. రోజూ భోజనం తర్వాత తీసుకుంటే ఐరన్ స్థాయులు పెరుగుతాయని చెబుతున్నారు.
ఎలా తయారుచేసుకోవాలంటే..?
Gulkand Making Process:
- ఒక గ్లాస్ జార్‌లో అడుగు భాగంలో కొన్ని గులాబీ పూరేకల్ని ఉంచి.. దానిపై కాస్త చక్కెర పోయాలి.
- ఆపై గులాబీ రేకలు-చక్కెర.. ఇలా జార్ మొత్తాన్ని ఈ రెండు పదార్థాలతో లేయర్లుగా నింపుకోవాలి.
- ఇప్పుడు ఈ జార్ మొత్తాన్ని సూర్యరశ్మి తగిలే చోట పది రోజుల పాటు ఉంచితే రుచికరమైన గుల్కంద్ తయారవుతుంది.
- గుల్కంద్ తయారీలో ఒకవేళ చక్కెర వద్దనుకుంటే - బెల్లం పౌడర్ వాడుకోవచ్చు.
నెలరోజుల పాటు డైలీ నట్స్ తింటే - మీ శరీరంలో జరిగే మార్పులివే! - Benefits of Eating Nuts Daily
