చాపింగ్​ బోర్డ్​ నుంచి బాత్​రూమ్​లో మరకలు తొలగించడం వరకు - ఎండిన నిమ్మకాయలతో ఈ ప్రయోజనాలు! - Dried Lemons Uses

Dried Lemon Benefits For Kitchen : చాలా మంది తాజా నిమ్మకాయలను మాత్రమే ఉపయోగిస్తుంటారు. అవి ఏ మాత్రం ఎండిపోయినట్లు ఉన్నా పనికిరావని చెత్తబుట్టలో పడేస్తుంటారు. మీరు కూడా ఇలానే చేస్తున్నారా ? అయితే, ఈ స్టోరీ మీ కోసమే! వీటిని బయట పడేసేముందు.. ఇలా ఉపయోగిస్తే పలు ప్రయోజనాలు లభిస్తాయని నిపుణులు అంటున్నారు.

Uses For Lemon In Kitchen : నిమ్మకాయలతో ఎన్ని ఆరోగ్య ప్రయోజనాలున్నాయో మనందరికీ తెలిసిందే. అందుకే చాలా మంది నిమ్మకాయలను ఎక్కువగా కొంటుంటారు. అయితే, నిమ్మకాయలను ఎక్కువ కాలం వాడకపోతే ఎండిపోతుంటాయి. ఇలా ఎండిపోయిన వాటిని పనికి రావని అందరూ డస్ట్‌బిన్‌లో పడేస్తుంటారు. మీరు కూడా ఇలానే ఎండిపోయిన నిమ్మకాయలను పారేస్తున్నారా ? అయితే, ఈ స్టోరీ తప్పక చదవండి. ఎండిన నిమ్మకాయలో ఉండే కొన్ని గుణాలు క్లీనింగ్‌ ఏజెంట్‌గా, క్రిమి సంహారిణిగా పనిచేస్తాయని నిపుణులంటున్నారు. మరి, ఈ నిమ్మకాయలను దేనికోసం వాడచ్చు? తెలుసుకుందాం రండి..

ఇలా చేస్తే శుభ్రం : రోజూ మనం కిచెన్‌లో కూరగాయలు కట్‌ చేయడానికి చాపింగ్‌ బోర్డు వాడుతుంటాం. అయితే, దీనిని శుభ్రం చేయడానికి ఒక ఎండిన నిమ్మకాయను తీసుకుని కట్‌ చేసి చాపింగ్‌ బోర్డుపైన రుద్దండి. తర్వాత వాటర్‌తో క్లీన్‌ చేయండి. ఇలా చేయడం ద్వారా బ్యాక్టీరియా చనిపోవడంతో పాటు, దుర్వాసన పోతుందని నిపుణులంటున్నారు.

2022లో "Food Control" జర్నల్‌లో ప్రచురించిన అధ్యయనం ప్రకారం.. చాపింగ్ బోర్డుల నుంచి వచ్చే దుర్వాసనను తగ్గించడంలో నిమ్మరసం సమర్థవంతంగా పనిచేస్తుందని పరిశోధకులు గుర్తించారు. ఈ పరిశోధనలో అమెరికాలోని ఒహియో స్టేట్ యూనివర్సిటీలో ఆహార విజ్ఞానం, టెక్నాలజీ ప్రొఫెసర్ డాక్టర్‌ John G. Fadel పాల్గొన్నారు. చాపింగ్ బోర్డులను శుభ్రం చేయడానికి ఎండిన నిమ్మకాయలు బాగా ఉపయోగపడతాయని ఆయన పేర్కొన్నారు.

దుస్తులపై మరకలు : కొన్ని సార్లు మనకు ఎంతో ఇష్టమైన దుస్తులపై టీ, కాఫీ, కూర మరకలు పడుతుంటాయి. ఈ మరకలు పోవడానికి ముందుగా కట్‌ చేసిన నిమ్మకాయను తీసుకుని దుస్తులపై మరకలున్నచోట రుద్దండి. తర్వాత నీటితో శుభ్రం చేస్తే సరిపోతుంది. దుస్తులపై మరకలు మొత్తం పోతాయి.

సింక్‌ : వంటింట్లోని సింక్‌ని తరచూ శుభ్రం చేయకపోతే మరకలు ఏర్పడి, దుర్వాసన వస్తుంటుంది. ఇలాంటప్పుడు ఎండిన నిమ్మకాయలను తీసుకుని సింక్‌ మొత్తం రుద్దండి. ఆ తర్వాత నీటితో క్లీన్‌ చేయండి. ఇలా చేస్తే మరకలు మాయమవడంతో పాటు, బ్యాడ్‌ స్మెల్‌ కూడా తొలగిపోతుందని నిపుణులు చెబుతున్నారు.

పాత్రలు శుభ్రం : అలాగే వంటింట్లో జిడ్డుగా ఉండే పాత్రలను శుభ్రం చేయడానికి కూడా ఎండిన నిమ్మకాయలను ఉపయోగించవచ్చంటున్నారు నిపుణులు. ముందుగా జిడ్డు మరకలపై కాస్త రాళ్ల ఉప్పు వేసి నిమ్మకాయతో రుద్ది శుభ్రం చేస్తే పాత్రలపైన ఉన్న మురికి, జిడ్డు పోతాయని అంటున్నారు.

• అలాగే ఇంటిని శుభ్రం చేసేటప్పుడు ఆ నీటిలో ఎండిన నిమ్మకాయలను వేసి ఓ రెండు నిమిషాలు నానబెట్టి తర్వాత రసం పిండి.. ఆ తర్వాత ఫ్లోర్‌ క్లీన్‌ చేస్తే మరకలు పోవడంతో పాటు, బ్యాక్టీరియా కూడా చనిపోతుందని అంటున్నారు.
• ఇంకా బాత్‌రూమ్‌లో టైల్స్‌పైన ఉన్న సబ్బు మరకలు, ట్యాప్‌లపైన ఉన్న జిడ్డు మరకలు పోవడానికి కూడా ఎండిన నిమ్మకాయలను వాడవచ్చని చెబుతున్నారు.