అలర్ట్​: డయాబెటిస్​ ఉన్నవారు ఈత కొట్టడం మంచిదేనా? - నిపుణుల సమాధానమిదే! - Does Swimming Control Blood Sugar

Diabetes: డయాబెటిస్​.. ఈ సమస్య బారిన పడిన వారి జీవితం పూర్తిగా మారిపోతుంది. ఏది చేయాలన్నా, ఏది తినాలన్నా ఆచితూచి వ్యవహరించాల్సి ఉంటుంది. ఈ క్రమంలోనే షుగర్​ ఉన్నవారు స్విమ్మింగ్​ చేయవచ్చా? చేస్తే డయాబెటిస్​ పెరుగుతుందా? తగ్గుతుందా? అనే డౌట్​ చాలా మందికి ఉంటుంది. మరి, దీనికి నిపుణులు ఏం చెబుతున్నారో ఈ స్టోరీలో చూద్దాం..

Does Swimming Control Blood Sugar : నేటి కాలంలో వయసు, జెండర్​తో సంబంధం లేకుండా సమస్త మానవాళిని పట్టిపీడిస్తున్న అతిపెద్ద సమస్య డయాబెటిస్! ఇది ఒక్కసారి ఎటాక్​ అయ్యిందంటే.. జీవితాంతం తొలగిపోదు. జీవితం మొత్తం పూర్తిగా మారిపోతుంది. కఠినమైన ఆహార నియమాలు ఫాలో అవ్వాలి. షుగర్ లెవల్స్ కంట్రోల్​లో ఉంచుకోవడానికి డైలీ ఎన్నో మందులు వాడాలి. అంతే కాకుండా పలు శారీరక వ్యాయామాలు కూడా చేయాలి. అయితే..షుగర్​ వ్యాధిగ్రస్థులు స్విమ్మింగ్​ చేయడం మంచిదేనా? స్విమ్​ చేస్తే లాభమా? నష్టమా? అనే డౌట్​ చాలా మందికి ఉంటుంది. మరి దీనికి నిపుణులు ఆన్సర్​ ఏంటో ఈ స్టోరీలో చూద్దాం..

డయాబెటిస్​ ఉన్నవారు హ్యాపీగా స్విమ్​ చేయొచ్చని నిపుణులు అంటున్నారు. రోజూ ఈత కొడితే రక్తంలో చక్కెర స్థాయిలు అదుపులో ఉంటాయని చెబుతున్నారు. 2018లో "Diabetes Care" జర్నల్​లో ప్రచురితమైన అధ్యయనం ప్రకారం.. వారానికి 150 నిమిషాలు ఈత కొట్టిన వారి రక్తంలో చక్కెర స్థాయిలు గణనీయంగా తగ్గాయని కనుగొన్నారు. ఈ పరిశోధనలో చైనా షాంఘైలోని జియా టంగ్ యూనివర్సిటీ ఆఫ్ మెడిసిన్​లో డిపార్ట్మెంట్ ఆఫ్ ఎండోక్రినాలజీ అండ్​ మెటబాలిజంలో ప్రొఫెసర్ డాక్టర్​ షైన్ షి పాల్గొన్నారు.

ఈత కొట్టడం వల్ల షుగర్​ కంట్రోల్లో ఉండటమే కాకుండా.. అనేక రకాల ప్రయోజనాలు కలుగుతాయని అంటున్నారు. అవేంటంటే..

• ఈత కొట్టడం ఒక కార్డియో వ్యాయామం. దీని వల్ల చెడు కొలెస్ట్రాల్ స్థాయిలు తగ్గుతాయని.. మంచి కొలెస్ట్రాల్ స్థాయిలు పెరుగుతాయని నిపుణులు అంటున్నారు.
• ఇది గుండె జబ్బులు, స్ట్రోక్ వంటి హృదయనాళ వ్యాధుల ప్రమాదాన్ని తగ్గిస్తుందని చెబుతున్నారు.
• హైబీపీని కూడా ఈత అదుపులో ఉంచుతుందని.. కాబట్టి హైబీపీ ఉన్నవారు ప్రతిరోజూ ఈత కొట్టాలని సూచిస్తున్నారు.
• ఈత కొట్టడం వల్ల కేలరీలు బర్న్​ అవుతాయని.. ఇది బరువు తగ్గడానికి సహాయపడుతుందని చెబుతున్నారు. గంట పాటు ఈత కొట్టడం వల్ల సుమారు 700 కేలరీలు కరిగిపోతాయని అంటున్నారు.
• స్విమ్మింగ్​ కీళ్లపై ఒత్తిడిని తగ్గిస్తుందని, కీళ్ల నొప్పులతో బాధపడేవారికి ఉపశమనం ఇస్తుందని పేర్కొన్నారు.
• ఈత కొట్టడం ఒత్తిడి, ఆందోళన వంటి సమస్యలను తగ్గిస్తుందని చెబుతున్నారు. ఈత కొట్టేటప్పుడు విడుదలయ్యే ఎండార్ఫిన్లు మెదడును ఉత్తేజపరచడానికి, మానసిక స్థితిని మెరుగుపరచడానికి సహాయపడతాయని అంటున్నారు.
• స్విమ్​ చేయడం శరీరాన్ని అలసిపోయేలా చేస్తుందని.. ఇది మెరుగైన నిద్రకు దారితీస్తుందని అంటున్నారు.
• ఈత కొట్టడం శరీరంలోని తెల్ల రక్త కణాలను పెంచుతుందని.. ఇవి ఇన్ఫెక్షన్లతో పోరాడటానికి సహాయపడతాయని అంటున్నారు నిపుణులు.
• ఈత కొట్టడం మెదడుకు రక్త ప్రసరణను పెంచుతుందని.. ఇది జ్ఞాపకశక్తి, ఏకాగ్రతను మెరుగుపరచడంలో సహాయపడుతుందని అంటున్నారు.
• అయితే ఆస్తమా ఉన్నవారు ఈత కొట్టేముందు ఒకసారి వైద్యులను సంప్రదించుకోవాల్సిన అవసరం ఉందని సూచిస్తున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.