Protein Shakes in Breakfast is Good or Not? ప్రస్తుత ఆధునిక జీవనశైలిలో ప్రొటీన్ షేక్లు తీసుకోవడం విపరీతంగా పెరిగిపోయింది. శక్తికి, కండరాల పెరుగుదల, బరువు తగ్గడం, పెరగడం లాంటి సమస్యల పరిష్కారానికి ప్రొటీన్ షేక్ను ఆప్షన్గా భావిస్తున్నారు. అయితే చాలా మంది బ్రేక్ఫాస్ట్లో ప్రొటీన్ షేక్లను తీసుకుంటుంటారు. మరి ఇలా బ్రేక్ఫాస్ట్లో ప్రొటీన్ షేక్ను తీసుకోవడం ఆరోగ్యానికి మంచిదా? అన్న విషయాన్ని ఈ స్టోరీలో తెలుసుకుందాం.
ఉదయాన్నే ప్రొటీన్ షేక్ తీసుకోవడం మంచిదా?: ప్రతిరోజు బ్రేక్ఫాస్ట్లో ప్రొటీన్ షేక్ను తీసుకోవడం సురక్షితమే కాకుండా శరీరానికి అనేక ఆరోగ్య ప్రయోజనాలను అందిస్తుందని నిపుణులు తెలుపుతున్నారు. ఉదయాన్నే ఎక్కువ ప్రొటీన్లను తీసుకోవడం వల్ల ఆ రోజంతా యాక్టివ్గా ఉండేలా చేస్తుందని అంటున్నారు. అయితే, బ్రేక్ఫాస్ట్లో ప్రొటీన్ షేక్లు మంచివి కదా అని విపరీతంగా తీసుకోవద్దని.. అలాగే సరైన ప్రొటీన్ షేక్లను ఎంపిక చేసుకోవాల్సి ఉంటుందని సూచిస్తున్నారు.
2020లో ఇంటర్నేషనల్ సొసైటీ ఆఫ్ స్పోర్ట్స్ న్యూట్రిషన్ జర్నల్లో ప్రచురితమైన అధ్యయనం ప్రకారం.. బ్రేక్ఫాస్ట్లో ప్రొటీన్ షేక్స్(National Library of Medicine రిపోర్ట్) తీసుకోవడం వల్ల బరువు తగ్గడం, కండరాలు బలంగా మారేందుకు ప్రయోజనకరంగా ఉంటుందని కనుగొన్నారు. ఈ పరిశోధనలో కెనడాలోని మెక్‌మాస్టర్ యూనివర్సిటీలో కినిసాలజీ విభాగంలో అసిస్టెంట్ ప్రొఫెసర్ డాక్టర్ Daniel W. West పాల్గొన్నారు.
ఏ ప్రొటీన్ ఉత్తమం?: మీ ప్రొటీన్ అవసరాలపై ఆధారపడి మీకు ఏ ప్రొటీన్ షేక్ బెస్ట్ అనేది తెలుసుకోవాలని నిపుణులు అంటున్నారు. ఇందులో రెండు రకాలు ప్రొటీన్ పౌడర్లు ఉన్నాయని.. ప్రతి రకం విభిన్న ప్రయోజనాలను అందిస్తాయని అంటున్నారు.
వే ప్రొటీన్ : ఆవు పాల నుంచి తీసే ఈ వే ప్రొటీన్ను చాలా మంది వినియోగిస్తారు. ఇది త్వరగా శరీరంలో కలిసిపోయి కండరాల బలోపేతానికి కృషి చేస్తుందని తెలుపుతున్నారు. ఈ వే ప్రొటీన్ మార్కెట్లో చాలా రకాలుగా అందుబాటులో ఉండగా.. వీటిలో ప్రొటీన్, కొవ్వులు ఒక్కోదానిలో వేర్వురుగా ఉంటాయంటున్నారు. అయితే, మీరు శరీరంలో కొవ్వు తగ్గాలని చూస్తుంటే మాత్రం వే ప్రొటీన్ బెస్ట్ ఆప్షన్గా చెబుతున్నారు వైద్యులు. ఎందుకంటే ఇందులో ఎక్కువ ప్రొటీన్లు, తక్కువ మోతాదులో కార్బోహైడ్రేట్లు, కొవ్వులు ఉంటాయని వివరిస్తున్నారు.
మొక్కల ఆధారిత ప్రొటీన్లు : అయితే, మీరు మొక్కల ఆధారిత ప్రొటీన్ల కోసం చూస్తుంటే సోయా, బఠానీ, బియ్యం మంచి ప్రత్యామ్నాయాలని వైద్యులు చెబుతున్నారు. ఇందులో ఫైబర్ అధికంగా ఉండమే కాకుండా కొవ్వులు తక్కువగా ఉంటాయని తెలుపుతున్నారు. జంతువుల ఉత్పత్తులను తీసుకోకుండా ప్రొటీన్లు కావాలనుకునే వారికి ఇది మంచి ఆప్షన్ అని సూచిస్తున్నారు.
అయితే.. బయట మార్కెట్లో లభించే ప్రొటీన్ పౌడర్స్ లేదా ప్యాకెట్స్లలో కొన్ని కెమికల్స్ కలిసే అవకాశం ఉందంటున్నారు. కాబట్టి ఆరోగ్యకరమైన ప్రొటీన్ షేక్స్ కావాలంటే వాటిని ఇంట్లోనే అప్పటికప్పుడు ప్రిపేర్ చేసుకోవడం మంచిదంటున్నారు. అలాగే కొన్ని ఆహారా పదార్థాలను ప్రొటీన్ పౌడర్లకు ప్రత్యామ్నాయాలుగా చెబుతున్నారు. అవేంటంటే..
శనగలు(పుట్నాలు) : సహజంగా ప్రొటీన్ తీసుకోవాలని అనుకునేవారికి శనగలు మంచిగా ఉపయోగపడతాయంటున్నారు. ఈ శనగల పిండిని పాలు లేదా నీటిలో కలిపి ఈజీగా తీసుకోవచ్చని వివరిస్తున్నారు.
హోమ్ మేడ్ ప్రొటీన్ పౌడర్ : ఈ ప్రొటీన్ షేక్ను గింజలు, విత్తనాల మిశ్రమంతో తయారు చేస్తారని చెబుతున్నారు. దీని వల్ల ప్రొటీన్ పౌడర్ను నిల్వ చేసే ప్రిజర్వేటివ్స్, రసాయనాల బారిన పడకుండా ఉండొచ్చని తెలుపుతున్నారు.
మొలకెత్తిన విత్తనాలు, పప్పులు : నానబెట్టిన విత్తనాలు, పప్పుల్లో పుష్కలంగా ప్రొటీన్లు ఉంటాయని వైద్యులు చెబుతున్నారు. వీటిని సలాడ్, సూప్లలో సులభంగా కలుపుకోవచ్చని తెలిపారు.
పనీర్ : ఇందులో ప్రొటీన్ అధికంగా ఉంటుందని.. వివిధ అల్పాహారాల్లో దీనిని కలుపుకోవచ్చని వివరిస్తున్నారు.
పీనట్ బటర్ : మీరు రుచితో పాటు ప్రొటీన్ల కోసం చూస్తుంటే పీనట్ బటర్ మంచి ఆప్షన్. ప్రొటీన్లు పుష్కలంగా ఉండే పీనట్ బటర్ను శాండ్విచ్ లేదా సూప్లలో కలుపుకోవచ్చని తెలిపారు.
సోయా ఉత్పత్తులు : సోయా పాలు ప్రొటీన్ షేక్లకు ప్రత్యామ్నాయంగా తీసుకోవచ్చని చెబుతున్నారు. ఇక చివరిగా బ్రేక్ఫాస్ట్లో కేవలం ప్రొటీన్ షేక్స్ మాత్రమే తీసుకోకుండా.. ఇతర పోషకాహారాలతో కలిపి ప్రొటీన్ షేక్స్ తీసుకుంటే మరిన్ని ప్రయోజనాలు పొందవచ్చని చెబుతున్నారు.
NOTE: ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
