Anemia Deficiency Symptoms : రక్తం మన శరీరంలో కీలక పాత్ర పోషిస్తుంది. బ్లడ్లో ఏ చిన్న సమస్య వచ్చినా కూడా అది పెను ప్రమాదంగా మారే అవకాశం ఉంటుంది. శరీరంలో తగినంత రక్తం లేకపోతే దానిని 'ఎనీమియా' అంటారు. శరీరంలో తగినంత ఐరన్ లేకపోవడం, విటమిన్ లోపం కూడా రక్తహీనతకు ప్రధాన కారణాలని నిపుణులు చెబుతున్నారు. అయితే, చాలా మంది ఈ సమస్యతో బాధపడుతున్నా, తమకు రక్తహీనత ఉన్నట్లు తెలియదు. తీవ్రమైన అనారోగ్య సమస్యలతో ఆస్పత్రిలో చేరినప్పుడు బ్లడ్ టేస్ట్ చేయడం ద్వారా ఈ ప్రాబ్లమ్ ఉందని గుర్తిస్తారు. అయితే, ఇలా కాకుండా రక్త హీనత ఉన్న వారు కొన్ని లక్షణాలను గుర్తించి, చికిత్స తీసుకోవడం వల్ల ఆరోగ్యంగా ఉండవచ్చు. ఎనీమియా ఉన్నవారిలో ఎలాంటి లక్షణాలు కనిపిస్తాయో హైదరాబాద్కు చెందిన ప్రముఖ "డాక్టర్ వుక్కల రాజేష్" (జనరల్ ఫిజీషియన్) చెబుతున్నారు. ఆ వివరాలు మీ కోసం.
లివర్, కిడ్నీ, గుండె వంటి దీర్ఘకాలిక వ్యాధులతో బాధపడేవారు, ఎక్కువ రోజుల నుంచి మందుల వాడే వారిలో ఈ సమస్య ఎక్కువగా కనిపిస్తుంది. ఇంకా క్యాన్సర్ చికిత్సలో భాగమైన కీమోథెరపీ ట్రీట్మెంట్ చేసుకున్న వారిలో రక్తహీనత వచ్చే అవకాశం ఉంది. సాధారణంగా ఏర్పడే ఎనీమియా ఐరన్ లోపం వల్ల ఏర్పడుతుంది. ఆహారం ద్వారా ఐరన్ లభించకపోవడం లేదా శరీరంలోని కణాలు ఆహారంలోని ఐరన్ని శోషించకపోవడం వల్ల ఈ రకం ఎనిమియా ఏర్పడుతుంది.
తీవ్రమైన అలసట :
రక్తహీనతతో బాధపడేవారు బాగా విశ్రాంతి తీసుకున్నప్పటికీ తీవ్రమైన నీరసంతో బాధపడుతుంటారు. రోజువారి పనులకు కూడా అలసిపోతారు. అలాగే వీరిలో చేయాల్సిన పనుల పట్ల ధ్యాస ఉండదు.
తలనొప్పి : రక్తహీనత ఉన్నవారిలో విపరీతమైన తలనొప్పి ఉంటుంది. అలాగే మైకం కమ్మినట్లుగా అనిపిస్తుంది.
"మన దేశంలో రక్తహీనత సమస్య ఎక్కువగా ఉంది. ఈ సమస్య ఉన్నవారు ఏ పని చెప్పినా చేయలేరు. గుండె దడగా ఉంటుంది. చెవుల్లో గుయ్ మని శబ్ధం వినిపిస్తుంది. ఆలోచన విధానం తక్కువగా ఉంటుంది. మనిషి చూస్తేనే పేలవంగా కనిపిస్తారు. ఇలాంటివన్నీ కూడా రక్తహీనత ప్రధాన లక్షణాలు." - డాక్టర్ వుక్కల రాజేష్ (జనరల్ ఫిజీషియన్)
- ఐరన్ లోపంతో బాధపడే వారిలో హిమోగ్లోబిన్ స్థాయిలు తగ్గడం కారణంగా పెదవులు, గోర్లు, చర్మం పాలిపోయినట్లు కనిపిస్తాయి.
- శ్వాస తీసుకోవడం కష్టంగా మారుతుంది. ఇంకా ఛాతీలో నొప్పి వస్తుంటుంది.
- మన శరీరంలో తగినంత ఐరన్ లేకపోతే రక్తంలో ఆక్సిజన్ ప్రసరణ తగ్గుతుంది. దీనివల్ల వేడి వాతావరణంలో కూడా కాళ్లు, చేతులు చల్లగా మారతాయి.
- ఐరన్ లోపం కారణంగా రెస్ట్లెస్ లెగ్స్ సిండ్రోమ్ తలెత్తుంది. ఈ సమస్య కారణంగా కాళ్లు కదులుతాయి. దీనివల్ల రాత్రి సమయంలో నిద్రకు ఆటంకం కలుగుతుంది.
- జుట్టు పొడిబారుతుంది.
- గోర్లు పెళుసుగా మారి త్వరగా విరిగిపోతాయని డాక్టర్ వుక్కల రాజేష్ చెబుతున్నారు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
ఇవి కూడా చదవండి :
బిగ్ అలర్ట్: కొద్దిసేపు పనిచేయగానే నీరసం ముంచెత్తుతోందా? కారణం ఇదే కావొచ్చు - చెక్ చేసుకోండి!
