SS Rajamouli Oscar Academy : దర్శకధీరుడు రాజమౌళి గురించి ప్రత్యేకంగా చెప్పనక్కర్లేదు. ఈగ, బాహుబలి 1, 2 చిత్రాలతో తెలుగు సినిమాను ప్రపంచవేదికపై సగౌరవంగా నిలబెట్టారు. ఇక ఆర్ఆర్ఆర్ చిత్రంతో ఏకంగా ఆస్కార్ అవార్డును దక్కించుకున్నారు. హాలీవుడ్ అంతా మనవైపు తిరిగి చూసేలా చేశారు.
అయితే తాజాగా జక్కన్న మరో ఘనతను కూడా అందుకున్నారు. అకాడమీ ఆఫ్ మోషన్ పిక్చర్ ఆర్ట్స్ అండ్ సైన్సెస్(AMPAS) సింపుల్‌గా చెప్పాలంటే ఆస్కార్స్ అకాడమీలో మెంబర్గా ఉండేందుకు రాజమౌళికి ఆహ్వనం దక్కింది. మొత్తంగా ప్రపంచవ్యాప్తంగా 57 దేశాల నుంచి 487 మందికి ఈ ఆహ్వానం దక్కగా, వీరిలో జక్కన్నతో పాటు ఆయన సతీమణి రమా రాజమౌళికి కూడా అకాడమీ నుంచి ఆహ్వానం రావడం మరో విశేషం. దర్శకుల విభాగంలో రాజమౌళికి, కాస్టూమ్ డిజైనర్స్ కేటగిరీలో రమా రాజమౌళికి ఈ అరుదైన గౌరవం దక్కనుంది. దీంతో 2025 ఆస్కార్‌లలో ఓటు వేసేందుకు ఈ మెంబర్లంతా అర్హత పొందారు. కాగా, ఈ గౌరవం దక్కించుకున్న రాజమౌళి దంపతులకు అభిమానులు అభినందనలు తెలుపుతున్నారు.
ఇంకా ఎవరెవరికి చోటు దక్కిందంటే? - రాజమౌళి, రమా రాజమౌళితో పాటు మన దేశం తరఫున రితేశ్ సిధ్వాని, షబానా అజ్మీ, రీమా దాస్, రవి వర్మన్, ఆనంద్ కుమార్ టక్కర్, శీతల్ శర్మ, హేమల్ త్రివేది, నిషా పహుజా, గితేశ్ పాండ్యాలకు కూడా అకాడమీ నుంచి ఆహ్వానం దక్కింది. గత ఏడాది యంగ్ టైగర్ జూనియర్ ఎన్టీఆర్, మెగా పవర్ స్టార్ రామ్ చరణ్, చంద్రబోస్, ఎంఎం కీరవాణి, కె కె సెంథిల్ కుమార్, సాబు సిరిల్ వంటి వారికి అకాడమీలో చోటు దక్కింది.
SSMB 29 Movie Update : ఇకపోతే ప్రస్తుతం రాజమౌళి సూపర్ స్టార్ మహేశ్ బాబుతో SSMB 29 సినిమా చేస్తున్నారు. ప్రస్తుతం ప్రీ ప్రొడక్షన్ వర్క్ జరుపుకుంటోంది. సెట్స్పైకి ఎప్పుడు వెళ్తుందో స్పష్టంగా తెలీదు. ఫారెస్ట్ అడ్వెంచర్ బ్యాక్డ్రాప్తో మూవీ తెరకెక్కనుంది. దీని కోసం ప్రపంచవ్యాప్తంగా సినీ అభిమానులు ఎదురుచూస్తున్నారు.
దీపిక ఫేవరెట్ తెలుగు హీరో ఎవరో తెలుసా? - ప్రభాస్ మాత్రం కాదు! - Kalki 2898 AD Deepika Padukone
